2 Koleentë 12 - N’KANGULU WUMOONË

Byeendë-meeso i manë Fumu kuzabikini Poolë

¹ Yifwenikini kuyinyemi, keti lyaawu lilë kaambu kuba liboti. Kasi yin'toombë kutubë buyifanwabu byeendë-meeso i tuzaabu tunë Fumu wakun'zabikini.

² Yizabisi citamaanë cimweekë, yeekë kuumi mivu na, wunangunu tee kunë salaangë yilu, buni kubë mu nyitwaandi? (Miinu yisye zaabë ko ningë cyelikë bën'nangunë kaambofo ningë cyeendë-meeso kumonë, kasi Nzaambi vwiili na wulizabisi.)

^3-4 Cibeeni, miinu yizabisi ti, na muutu be woowo wunangunu mu nyitwaandi kaambofo mu nyitwaandi ko, yisye zaabë ko, Nzaambi wulizabisi muutu be woowo wunangunë kunë salaangë yilu i wuyuwu mëbuungu mëkaambu mëtubulu i mëkaambu kuveewu n'swa ke wosuku muutu mu kube mëtubilë

⁵ Miinu yin'vaangë lunyemu mu cibilë ci muutu be woowo – kasi mu miveekë, yiyinyemi mu buboonvi bwaami – .

⁶ Ningë miinu yizolë kuyinyemi, yilë ba lilawu ko, cibilë miinu yin'tubë cyelikë. Kasi yim'maangë kwaami kuyinyemi, cibilë yisë n'zolë ko baatu bëba simbalulu sin'vyokilë mo bëm'monë miinu kuvaangë kaambofo mu kuwu manë yin'tubë.

⁷ Abu lyekilë obo, bwiinji ti miinu mu kumaangë kuba yi lunaangu mu cibilë ti tuzabukunu tu kwaatë-yekë, mpasi yinenë bëkun'tuulë mu nyitu, dedë mweekë ciluumbi ci Satënë, cyo bëfilë mu kum'bulë i mu kumaangë miinu kuwaalë yi lunaangu.

⁸ Fë vyaasi tatu miinu yasambilë Fumu mu kun'yobulë mu mpasi be yooyi.

⁹ Naandi wusë kum'putulilë : « Muulaami mu njeeyi wufweeni. Luleendo lwaami lum'monikaangë cyelikë mooti njeeyi wavolë bitu. » Cyelikë miinu yizolisi kuyinyemisi bo yike yivolë, bwiinji luleendo lu Kliistu lukalilë mu miinu.

¹⁰ Mu bwaawu, yin'sangilë mu bitu bivolë, mu bifiingu, mu simpasi, mu sinkwamusu i mu tusweenu yilë mu kuvitikë mu Kliistu. Cibilë mooti miinu yike bitu bivolë, mati mu bwaawu yim'beelë yi n'viingu.

Lusweenu lu Poolë mu basë Koleentë

¹¹ Miinu yilë mu kutubë dedë mweekë yabë lilawu, kasi beeno lwakun'kacikë. Nkanë beeno lufitë kun'nwaninë cikaangë. Ningë miinu muutu kwaandi vwiili, yikeeli ko cilesi fë ntwaalë mimbunziinu yinenë.

¹² Mëvaangë manë mën'leesi ti miinu m'bunzi mëvangënë fë meeyiinu yimunë mpungë-moonyi: mëvaangë be moomo mën'leesi bimakë i bimaaku bi mpilë ku mpilë.

¹³ Mu lyaambu mbici bëkaambu kululengilë moonyi buke bingangë bimesi, nkanë bo miinu yimaangë beeno kun'zudi? Mu lyalyooli, ndenvukilaanu!

¹⁴ Miinu awu yabelëmë mu kwiisë ke beeno mu vyaasi yin'tatu i miinu yisë m'ba lizitë ko mu beeno. Mati beeno yin'toombë, yaaku ti simboongo siinu. Mu bwaawu, yaaku ti baanë ba bën'kuungë simboongo sitaatë i mamë, kasi taatë i mamë mu baanë baawu.

¹⁵ Mu miinu, yim'ba mu liyaanji mu kuvaanë byosuku bike yaami i mu kuyivaanë miveekë mu beeno. Ningë yibe lutilë kuluzolë, lukun'zolë fwaati?

¹⁶ Miinu yisë ba lizitë ko mu beeno. Kasi baatu bëm'balë ti mungë lupuutu yikeeli, miinu yalubutikë mu n'taambu mu tumbulyaami.

¹⁷ Buni! Yibe lusasi lukaambu kufutu mu wun'viipë, mu banë yafilë ke beenwe?

¹⁸ Miinu yibondililë Tiitë mu kwiisë ke beeno i yisë n'filë yimunë mwaanë nguli wo luzabisi. Buni! Tiitë wulusasi i wusye lufutë kwe? Tusye vangilë bo bumweekë naandi yi miinu i simbalulu syo simweekë, mu kulaandë nzilë yo yimweekë?

¹⁹ Bunë yim'balë beeno, kutoonë mwa mbooyi bilumbu, beeso tulutoombaangë mu kuyinwaninë cikaangë fë ntwaaliinwe? Monikoo! Tun'tubilë mu lubundunu yimunë Kliistu, fë nduunzi Nzaambi i beeso tun'tubilë makë mooso omo, beeno bayiitu, bwiinji ciminu ciinu cyeendë ntwaalë.

²⁰ Mu lwisulwaami ke beeno boomë yilë mu kumonë nkanë yikuluzakini bunë miinu yin'zolë i lukun'zakënë bunë beeno lun'zolilë. Miinu yim'monë boomë mu beeno kuba mu twambulu i kuba mu likwaafi, mu fiti i mu cimpalë, bifiingu i tusuungu i lunaangu i n'vuusu.

²¹ Mu lwisulwaami lumwaali, miinu boomë yim'monë ti Nzaambi wukun'fwiisi sisonyi fë meesë miinu i yim'ba mu kulilë mu cibilë ci mpaapë bëlë mu kubweelë kusumukë dedë mweekë bunë bubeelë ntamë i bisye biikë libi ko, cin'duumbë i busafu manë bëlësalilaangë.