2 Koleentë 11 - N’KANGULU WUMOONË

Poolë i Mimbunzi yi lupuutu

¹ Ningë tokë beeno lun'vitikaanu mwa bulawu bwaami! Ngete, mpitikyaanu!

² Miinu, yike likwaafi mu beeno, lin'fuminë ke Nzaambi : beeno yilukanyi kukweesi ke n'nunyi mweekë, Kliistu i yin'tiisi kulukwiindulë ke naandi dedë mweekë cinkumbë cilyoomë.

³ Kasi, dedë mweekë Eevë, wunë wuvukumukë mu lupuutu lu nyokë, miinu boomë ti mëlyeelë miinu mëleembu kupuutu i kulunatë cinaanu mu lutatumunu lusulëmë i lulyoomë mu Kliistu.

⁴ Licyelikë, beeno lun'vitikë buboti ti wun'viipë wun'kwisë mu kulutendulilë Yeesu wuvyakënë yimunë wunë twabë tulutendulilë. Beeno yivaandi lubeliminë mu kuvitikë ciluunzi i saangu bivyakënë yi Ciluunzi i Mpolu Mboti yinë lutambulë ke beeso.

⁵ Yim'balë ti bakë booso lun'teelë beeno mimbunzi yinenë bësye kum'pyokilë mu cin'velë ko!

⁶ Lyaawu kupodi kubeelë boobo ti, mu nteku yikutubilë, miinu yicili cilesi, kasi mu luzaabu: beeso tululeesi fë ciyalëlë mu luvoto looso i mu makë mooso.

⁷ Bunë yilutendulilë Mpolu Mboti yi Nzaambi, yilivangilë buunë kwaandi. Miinu yisë kulukë bwiinji beeno luzangëmë. Abu miinu libi yivaangë mu kusiilë boobwe?

⁸ Miinu yicikunë lifutë yi bingangë bin'ka i mu kuzingilë mu mëkanë maawu, mu kulusalilë.

⁹ Bunë yiba ke beeno, yisye ba mu luzudi lu muutu ko, bunë yaba mu n'ciinzë, cibilë baanë bë nguli bëfuminë ku Masedwaanë bën'twalilë binë biyabë yaamë n'ciinzë. Miinu yimaangë kuba mu lizitë mu beeno mu cyosuku ciimë i yin'tatëmënë mu nzingulu be yooyi.

¹⁰ Mu cyelikë ci Kliistu cike mu miinu, yin'tubë: muutu ve wukun'kakini. Mu n'samu wu lunyemu mu likomë lyooso li Akaayi.

¹¹ Cibilë-mbici yin'tubilë katyoobo? Bubeelë obo cibilë miinu yisye luzolo kwe? Nzaambi wuzabisi!

¹² Miinu yim'bweelë kukalilë bo bumweekë tee buyifanwabu, bwiinji tubotulë mbalulu yimbi ke bakë booso bën'vaangë mëfukë-nyeembo mu kuyituunvi mu kuba mpilë mweekë yi beeso.

¹³ Baatu be boobo mimbunzi yi lupuutu, miifi bëke yicitulaangë mimbunzi yi Kliistu.

¹⁴ Likuziimbë likeeli ko, cibilë naveekë Satënë na wuyicitulaangë yaanzi yi cyeseesë.

¹⁵ Likeeli ko linë li tutulumisi cibilë bisasi byaandi yivaandi bën'citukaangë biseelu bi Nzaambi wusulëmë. Kasi fë siitu baawu bëm'bakë futë bunë bun'kwendilë mëvaangë maawu.

Simpasi simonë Poolë mu bumbunzi

¹⁶ Yim'bweelë kulukaambë: muutu ve wukum'monë dedë mweekë lilawu. Kaambofo, ningë boobo lum'balilë, cikunaanu ti miinu lilawu bwiinji miinu yivaamë yivaangë mwa lunyemu.

¹⁷ Cibeeni, mu kusiilë katyoobo, yisë n'tubë ko bo Fumu kun'tiisi, kasi buke miinu yilawukë.

¹⁸ Abu mpaapë bëlë mu kuvaangë binyemu mu bideenzë binsunyi, mu bwaawu, miinu yivaamë mba yin'vaangë binyemu.

¹⁹ Beeno lukeeli bangë bungelë, lun'vitikaangë kwaandi mëlawu!

²⁰ Beeno lun'cikunaangë bëlëteelë dedë mweekë bëndongo, bëlusasi i kulufutë ve, bëluvokënë byosuku lubakisi, bëlë talë-n'lalu, bëlubulë ku busu.

²¹ Miinu sonyi mu kulitubë: mu lyaawu, beeso twabë tuvolë bitu! Akasi, fanë bën'ka bën'toombë kuvaangë binyemu – miinu yin'tubilë dedë mweekë miinu yalawukë – miinu yivaamë yilë lipodi.

²² Baawu Siyebelee bëkeeli? Miinu yivaamë. Musë Islayeelë? Miinu yivaamë. N'suundë Abalaamë? Miinu yivaamë.

²³ Baawu bëke biseelu bi Kliistu? Ngete – miinu yin'toombë kutubë dedë mweekë muutu wukaambu buutu – miinu mwiinji yi baawu. Miinu yamonë beenë binkuungë bivyokisi baawu, miinu yiba mu buloko mpaapë vyaasi, yibulu mpaapë vyaasi i yisë monë simpasi si lufwa.

²⁴ Vyaasi taanu, Sizwiifë bëkum'bulë mëkumë-tatu vwa li siswaali.

²⁵ Fë vyaasi tatu, ba kun'limëtaangë siswaali si sinzimbulë-mbumë ke basë Loomë i vyaasi mweekë bëkun'dwaasi mu kum'pingumunë mëmanyi. Vyaasi tatu, yiyabë mu likuumbi li masi lilë siindë. Vyaasi mweekë miinu yikalilë musë n'viipë i bwiilu bumweekë mu mëyo më masi.

²⁶ Mu mpaapë myeendwaami, miinu yimonë simpekaadu sike mu miilë yi waalë, kaambofo bilyaani, simpekaadu sifuminë ke bayaami Sizwiifë, kaambofo bo bukeeli ko Sizwiifë, miinu yabë mu simpekaadu mu mëvulë kaambofo mu sintaandu si ciyumi, simpekaadu mu m'bu i fanë fëke baanë bë nguli bëwaalë lupuutu.

²⁷ Miinu yisalë bisalu bin'vaanë mpokoongo i binkuungë binenë. Mpaapë vyaasi tolo kubakë ve. Miinu yabë yi nzalë i mpwiilë masi. Mpaapë vyaasi yilëkaangaangë n'sweelë. Miinu yimonë mpasi mu cyoosi i lukaambu lu n'vwaatu.

²⁸ Mëmesë omo mëtubulu voo, lyo like yaami n'ciinzë kadë cilumbu: lusweenu lo luke yaami mu bingangë byooso.

²⁹ Ningë wun'viipë wuvolë biitu, miinu yivaamë yavolë biitu. Ningë wun'viipë walekulë ciminu, miinu yin'nyotëkënë beenë.

³⁰ Ningë ti yiyinyemi, miinu yinyeminë mu buboomvi bwaami.

³¹ Nzaambi, Taatë yi Fumu Yeesu – kwe dumu tee yi tee! – Zaabë ti yisë m'puutë ko.

³² Bunë yiba ku Damaasë, n'kuluutu wulandilaangë n'tinu Alëtaasë wusë tuulë mësodaadi fë nkotulu livulë bwiinji bëkum'bwiilë.

³³ Kasi, fë neelë cibakë, faawu bisë kun'kululilë ku ngaandë mu mpoonzi i bwaawu yisë tiinë.