2 Koleentë 10 - N’KANGULU WUMOONË

Poolë wanwaninë cikaangë cisalu cyaandi

¹ Miveekë Poolë, yilë mu kuluciinzi mu mëleembë i mu buboti bu Kliistu, miinu wo bëtubilë mu bubonzulu bwaami bunë yikelili yimunë beeno, kasi yi n'viingu fë meeso miinu mooti yikeeli yiinu ko. Mu mëleembë i buboti bu Kliistu,

² nkonkolë siinu: nun'kacikaanu ko mu kunwaanë cikaangë yi n'viingu wooso bunë yim'ba ke beeno. Cibilë yin'tiisi kuvaangë ke banë bën'tubë ti beeso tulë mu kusalilë mu simpangulu si bumuutu.

³ Cyelikë, beeso baatu lumoonyi, kasi tusë n'waninë ko mu nteku cimuutu.

⁴ Mu livitë liitu, binwanunu byo tulë mu kunwaninë bikeeli bi cimuutu ko : byaawu binwanunu bi luleendo lu Nzaambi bin'vangisi kutululë bibakë bi ngooto. Beeso tulë mu kubotulë simbalulu simbi,

⁵ tulë mu kubotulë makë mooso më lunaangu mëvyakënë yi luzaabu lu Nzaambi, beeso tulë mu kuvangisi kunatë simbalulu syooso mu kucikunë Kliistu.

⁶ Beeso tubëliminë mu kuseembë lyakë lyooso lin'kaambu buleenvo, bunë buleemvo bwiinu bum'ba deku-dekoo.

⁷ Cikunaanu biimë bunë bikelili. Mu lyalyooli, ningë wun'viipë weekë mu Kliistu, kwe bweelyooso kubalë lyalyooli : beeso tuke mu Kliistu bo buke naandi.

⁸ Miinu yisë m'monë sonyi ko ningë yivangisi lunaangu mu lutumu lunë Fumu wutuvaanë, lutumu luke n'ciinzë lun'leesi mu kunatë ntwaalë libuundu liinu i yaaku ti mu kulityamunë.

⁹ Miinu yisye n'zolë ko kuvaangë bufukë-nyeembo mu kuluvangisi boomë mu mikaandaami.

¹⁰ Cyelikë, talaanu manë bëlë mu kutubë : « Mikaandë yi Poolë yitudë i bubaalu. Kasi bunë naandi wuke yiitu fë cimweekë mu nyitu, naandi wudekë i ntekwaandi yikutubilë yikaambu nteendu. »

¹¹ Wunë wun'tubilë obo kwe lizaabë buboti: bunë beeso tukelili mu lusonukunu lu mikaandiitu yi cinaanu, beeso tum'beelë yivaandi boobo mu mëvaangë miitu mooti twamonikë vyaasi mweekë fë ntwaaliinu.

¹² Cyelikë, beeso kupodi ve kumonikë ti beeso twavyokililë kaambofo mu kwelëkënë dedë mweekë i bën'ka bëke yituunvyaangë. Baawu bidukë : bën'vaangë bizongulu byaawu mu kuyikwelikilë, bëke yidedëkinyaangë.

¹³ Kasi mu beeso, tusë n'toombë ko kuyituunvi mu bisalu biitu. Beeso tulivangilë mu sindilu si cisalu cyo Nzaambi wuzitikë mu kutuvangisi kutuukë tee ke beeno.

¹⁴ Beeso tusë n'vyoosi ko sindilu siitu, bosuku bubeelë ti tusye kwiisë kuve ke beeno. Cibilë tuyituukë ntetë buboti ke beeno mu kulunatinë Mpolu Mboti yi Kliistu.

¹⁵ Bwaawu, tusë yituunvi kuve mu kutubë ti beeso biinji kusalë yi bayiitu. Tiilyoko, tum'balë ti ciminu ciinu cin'kulë i kupodi kuvaangë cisalu cike ciinji bunenë fëke beeno, kasi mu sindilu sinë kutuzitikilë.

¹⁶ Beeso kupodi kunatooso Mpolu Mboti mu mëbweeti mën'ka mëkeeli mu mbiinji yin'ka yi beeno i kukaambu kuyituunvi mu bisalu luvaangë ke bën'ka mu solaawu.

¹⁷ Mu boobo, busonëmë : « Ningë wun'viipë wun'toombë kuyituunvi, kwe yituunvi mu manë Fumu kwavaangë. »

¹⁸ Cyelikë, yaaku ti wo wuyituunvi naveekë bën'cikunë, kasi wo Fumu kun'tuunvi.