2 Koleentë 1 - N’KANGULU WUMOONË

Sibweekë

¹ Poolë, m'bunzi Kliistu Yeesu mu n'vwiilu Nzaambi i Timotee mwaniitu nguli. Ke Cingangë ci Nzaambi cike ku Koleentë i bakë booso bë likaandë li Nzaambi mu libweeti Akaayi n'viipë.

² Biikë Nzaambi Tatiitu i Fumwiitu Yeesu Kliistu, bëluvaanë muulë i n'sikë.

Poolë wulë mu kutoondë Nzaambi

³ Tudumisyaanu Nzaambi, Taatë yi Fumwiitu Yeesu Kliistu, Taatë wuwaalë mëboti, Nzaambi wun'fwiilaangë cyaali, wun'cinzyaangë!

⁴ Naandi wutufulaangë n'viingu mu simpasi siitu syooso bwiinji tuciindë bitu, banë bëm'monaangë simpasi simpilë ku mpilë, mu kubëvaanë luciindu lo tutambulë besuviitu ke naandi.

⁵ Licyelikë, bo bumweekë beeso tubakë cikuuku ci lilaangu li simpasi si kliistu, bo bumweekë tun'tambulilë yivaandi luciindu lunenë mu Kliistu.

⁶ Ningë beeso tuke mu mpasi, mu kubakë beeno kutambulë luciindu i luvukulu. Ningë beeso tubë bakë luciindu, mu kuba beeno luciimbë moonyi mu simpasi syo si mweekë sinë beeso tulë mu kumonë.

⁷ Bwaawu, beeso tuke yi civuufu cinenë mu beeno. Cibilë, beeso tulizabisi, dedë mweekë lum'bakë yiitu cikuuku ci simpasi, beeno yivaandi lum'bakë cikuuku mu luciindu lo beeso tun'tambulë.

⁸ Cyelikë beeso tuzolisi ti beeno baanë bë nguli, luzaabë mu mpilë mbici, mënyonyi beeso tumonë bunë twabë ku libweeti li Aziiya. Lizitë lyabë liinji mu beeso, livyokililë mëngolo miitu i tubalë ti twakun'fwa.

⁹ Beeso tubalë ti batutabë simpasi si lufwa. Kosuku, livangininë boobo bwiinji tubakulë ti tusye fwaanë ko kuteelë lyaanë mu besuveekë, kanuku mo mu Nzaambi vwiili wunë wun'vulumunaangë baatu bëfwa.

¹⁰ Mati naandi watuyobulë mu mpilë lufwa olo i naandi mba wutukobulooso. Cibeeni, beeso tuke yi civuufu mu naandi ti wutukobulooso,

¹¹ i wulë mu kutuzudi mu n'saambu. Bwaawu, Nzaambi wun'cikuninë tusaambu tun'vaangë mu banë bëke mpaapë mu cibilë ciitu, naandi mba wutuvaanë mpaapë biimë biboti i mpaapë baatu bëkun'toondë.

Poolë wavutulë bilumbu bi mweendwaandi

¹² Tala lyaambu linë lim'podi kuvaangë lunyemu: dedë mweekë mbalulwiitu yin'vaanë cimbaanji, beeso twalyatilë mu buloongo, yiveko yi beeno, yimunë kutukukë i cyelikë bin'fuminë ke Nzaambi, mu kulyatilë mu muulaandi i yaaku ti mu bungelë bu cimuutu.

¹³ Cyelikë, mu mikaandiitu, beeso tusye lusonikinë lin'ka ko, kanuku tokë lyo lulë mu kutaangë i kuwu. Miinu yim'balë ti, beeno lun'viisi kuwu buboti lyaliili.

¹⁴ Bwiinji lubakulë buyifanwabu mwa fwaati too : mu cilumbu ci lwisulu lu Yeesu Fumwiitu, beeno lum'podi kuba mu nyeenzi mu beeso, dedë mweekë beeso tum'beelë mu beeno.

¹⁵ Miinu yiba yi civuufu bunë yiyabë tesu mu kwiisë ke beeno bwiinji lubakaanu muulë fë vyaasi yimwaali.

¹⁶ Licyelikë, yitoombë kutabilë kuke beeno i kuvyokilë ku Masedwaanë mu kube lumonë mu luvutukulu lwaami: nkanë beeno, lufitë kun'zudi mu kulandilë mweendwaami ku Zudee.

¹⁷ Mu n'fwikulu lyaambu ali, a buni nkanë miinu yilë balë kulivaangë vwiili tokë? Maambu manë yikanë, mëfuminë mu cimuutu kwaandye, mu lyaawu yibelëminë mu kutubë : « Ngete » i « Moniko », mo mu vyaasi mweeke?

¹⁸ Nzaambi wuli mbaanjyaami, manë yilukaambë lisye ba vyaasi mweekë ko « Ngete » i « Moniko ».

¹⁹ Cibilë, Yeesu Kliistu, mwaanë Nzaambi, wunë beeso tutendulë ke beeno, Silaasë, Timotee i miveekë wusye kwisilë ko mu kutubë « Ngete » i « Moniko ». Tiilyoko mu naandi mëba tokë « Ngete ».

²⁰ Licyelikë, naandi wuke « Ngete » linë lin'sisiminë tukanyu tooso tu Nzaambi. Mu lyaawu yivaandi beeso, mu na Yeesu Kliistu mwaawu tun'tubilaangë « Ameenë » mu kuvaanë bumpumu ke Nzaambi.

²¹ Naveekë Nzaambi wutuciinzi yimunë beeno mu luziingu yimunë Kliistu. Nzaambi naveekë na watusoolë,

²² naandi wutuulë yivaandi ciifi ci lizinë lyaandi mu beeso i wudukulë mu mitimiitu Ciluunzi ci Saantu dedë mweekë cikokë ci bukaalu wutulundilë.

²³ Nzaambi wulë mbaanjyaami - wukum'poondë ningë ti yilë mu kutatë si ngaangu -: mati mu kulukobulë bwaawu miinu yaboongë lukanyu mu kumaangë kube vutukënë ku Koleentë.

²⁴ Beeso tusye lukacikaanu ko mu linë lufwenikini kucikunë, cibilë beeno luciindë mu ciminu. Kasi beeso tun'toombë kuluzudi mu nyeenziinu.