1 Za 5 - N’KANGULU WUMOONË

Nduunjiitu mu buloongo

¹ Muutu wunë wun'ta lyaanë ti Yeesu Kliistu wulë mwaanë Nzaambi. Wosuku wun'zolë taatë, wun'zolë yivaandi baanë kwabutë.

² Talaanu bunë tum'bakulilë ti beeso tube zolë baanë bë Nzaambi : ningë beeso tube zolë Nzaambi i kusalilë tutumu twaandi.

³ Licyelikë, muutu wun'zolë Nzaambi fwenikini kucinzikë tutumu twaandi. Tutumu twaandi tukeeli mpasi ko,

⁴ cibilë wosuku mwaanë Nzaambi waluungë buloongo, mati ciminu ciitu mu Nzaambi cyaawu ci tuvangisi kubakë nduunji mu buloongo.

⁵ Nani wum'bakë nduunji mu buloongo? Kanuku wo wun'ta maanë ti Yeesu wulë Mwaanë Nzaambi.

Cimbaanji bëvaanë mu cibilë ci Yeesu Kliistu

⁶ Mati Yeesu Kliistu na wuyisë ke beeso yimunë masi më lubatizyaalu lwaandi i yimunë meengë më lufwa lwaandi. Naandi wuyisë yaaku tokë yimunë masi vwiili, kasi yimunë masi i meengë. Ciluunzi ci Saantu cin'vaangë cimbaanji ti lyalyooli licyelikë, cibilë Ciluunzi cyelikë kukeeli.

⁷ Bwaawu, yike mbaanji tatu :

⁸ Ciluunzi ci Saantu, masi i meengë i ba bë tatu bën'kuwusënaangë.

⁹ Beeso twacikunë cimbaanji ci baatu. Kosuku cimbaanji ci Nzaambi mwiinji kuciindë i cyaawu cin'talë cimbaanji kwasiilë mu cibilë ci Mwanaandi.

¹⁰ Oboobo, wunë wun'ta maanë mu Mwaanë Nzaambi ke yi cimbaanji be cyoocyo mu naveekë. Kasi wunë wun'kaambu kuta maanë mu Nzaambi, naandi wukuyivangisi cibutë-maambu, cibilë wusye ta maanë ko mu cimbaanji cyo Nzaambi kwasiilë mu Mwanaandi.

¹¹ Talaanu cimbaanji aci : Nzaambi watuvaanë luziingu lu sakë yi sakë i luziingu beenë luveewu mu Mwanaandi.

¹² Wunë wuke yi Mwaanë ke yi luziingu, wunë wukaambu Mwaanë Nzaambi, wukeeli yi luziingu ko.

Luziingu lu sakë yi sakë

¹³ Miinu yalusonikinë bwiinji luzaabë ti beeno lwabakë luziingu lu sakë yi sakë, beeno lwata maanë mu lizinë li Mwaanë Nzaambi.

¹⁴ Beeso tum'podi kutalë ke Nzaambi yimunë civuufu, cibilë naandi wutuyuwulu ningë tun'loombë cyosuku ciimë cifwenikini mu n'vwiilwaandi.

¹⁵ Abu tuzabisi ti naandi wun'kuwaangë misaambwiitu, beeso tuke yivaandi civuufu mu kubakë linë twan'loombë.

¹⁶ Ningë wun'viipë wum'monë mwaanë yaandi nguli kuvaangë lisumu lin'kaambu kunatë ku lufwa, naandi wufwenikini kusambilë i Nzaambi wun'vaanë luziingu ke mwaanë nguli be woowo. Lyaliili lin'vangininë ke banë lisumu lin'kaambu kunatë ku lufwa. Kasi yike lisumu lin'nataangë ku lufwa, yaaku ti mu cibilë ci lisumu be lyooli ko yin'loombë bësambilë.

¹⁷ Lyosuku lyaambu libi lisumu likeeli, kasi lyosuku lisumu li kusë nataangë ko ku lufwa.

¹⁸ Beeso tuzabisi ti mwaanë ve wu Nzaambi wum'podi kube vaangë lisumu, cibilë Mwaanë Nzaambi wulë mu kun'kebë i Civadë-mbi kusë wum'podi kuvaangë cin'velë ko mu naandi.

¹⁹ Beeso tuzabisi ti, tuke mu Nzaambi i buloongo n'viipë bukeeli mu lutumu lu Civadë-mbi.

²⁰ Beeso tuzabisi ti Mwaanë Nzaambi wuyisi i naandi wutuvaanë mëlyeelë mu kuzaabë Nzaambi yi cyelikë. Beeso tukangëmë mu Nzaambi yi cyelikë, mu Mwanaandi Yeesu Kliistu. Mati naandi wulë Nzaambi yi cyelikë, mati naandi na luziingu lu sakë yi sakë.

²¹ Baanë baami, keelaanu mu sinzaambi si lupuutu!