1 Za 4 - N’KANGULU WUMOONË

Ciluunzi ci Nzaambi i ciluunzi ci Mbeeni

¹ A sindiku syaami, nutelaanu maanë ko mu baatu bakë booso bën'tubë ti batambulë Ciluunzi, kasi bëseenjyaanu mu kubakulë ningë ciluunzi cike yaawu cyafuminë ke Nzaambi. Boobo, mpaapë mibici yi lupuutu batyamukë bweendë nyalu-n'toto.

² Tala buni lufwenikini kubakulilë ningë ti cyaawu Ciluunzi ci Nzaambi : wosuku wun'zaabë ti Yeesu Kliistu wulë muutu lu moonyi, cyelikë naandi wuke Ciluunzi ci Nzaambi.

³ Kasi wosuku wum'maangë kuzaabë Yeesu, mu katiboobo naandi wukeeli ko Ciluunzi ci Nzaambi, kasi ciluunzi cike yaandi ci Mbeeni Kliistu : beeno luyuwu ti naandyoowo wun'kwisë i buyifanwabu, weekë mu buloongo.

⁴ Kasi beeno baanë baami, lulë baanë bë Nzaambi i lwaluungë mibici yi lupuutu. Cibilë Ciluunzi cilë mu kusalë mu beeno mwiinji luleendo yi ciluunzi cin'salë mu buloongo.

⁵ Baatu be boobo bëke mu buloongo. Baawu bën'tubilë bunë bën'kwendilë baatu bë buloongo i baatu bëke mu buloongo bëlë mu kubëyuwulu.

⁶ Kasi beeso tuke mu Nzaambi. Muutu wunë be zaabë Nzaambi wutuyuwulwaangë. Wunë bëziimbu Nzaambi, wusë tuyuwulwaangë ko. Mu boobo, beeso tum'podi kuzabilë buboti wunë wuke yi Ciluunzi ci cyelikë i ciluunzi ci lupuutu.

Nzaambi Luzolo

⁷ A sindiku syaami, tuzolësënaanu besuveekë i besuveekë, cibilë luzolo lun'fuminaangë ke Nzaambi. Wosuku wuke yi luzolo wulë mwaanë Nzaambi i naandi zabisi Nzaambi.

⁸ Wunë wun'kaambu kuzolë wusye zaabë ko Nzaambi, cibilë Nzaambi luzolo kukeeli.

⁹ Talaanu buni Nzaambi wulesilë luzolo lwaandi mu beeso: naandi wufilë Mwanaandi viingu mu buloongo, bwiinji tutambulë luziingu lucyelikë mu naandi.

¹⁰ Talaanu luzolo buni lukelili: yaaku ti beeso tuzolë Nzaambi, kasi naandi na wutuzolë i wufilë Mwanaandi mu kuyivakulë likabu mu lobukulu lu mësumu miitu.

¹¹ A sindiku syaami, ningë boobo ti Nzaambi wutuzolë, beeso tufwenikini besuviitu, kuzolësënë besuveekë i besuveekë.

¹² Muutu ve wumonë vyaasi Nzaambi. Vandi, ningë tube zolësënë besuveekë yi besuveekë, Nzaambi ke yiitu i luzolo lwaandi lucyelikë lum'monikë deku-dekoo mu beeso.

¹³ Talaanu buni tun'zabilë ti beeso tubundënë yi Nzaambi i naandi wuke mu beeso: naandi watuvaanë Ciluunzi cyaandi.

¹⁴ Beeso twamonë i twan'siilë cimbaanji ti Taatë wufilë Mwanaandi mu kuba N'vuuci buloongo.

¹⁵ Wosuku muutu wun'tendulë ti Yeesu na Mwaanë Nzaambi, Nzaambi ke yaandi i naandi wubundënë yi Nzaambi.

¹⁶ Beeso tuzabisi i tun'ta lyaanë ti Nzaambi be tuzolë. Nzaambi luzolo. Wunë wun'kalilë mu luzolo, wun'kalilë mu Nzaambi i Nzaambi yivaandi wun'kalilë mu naandi.

¹⁷ Ningë luzolo lu cibeeni luke yiitu, oboobo tum'ba beenë civuufu mu cilumbu ci Lufundusu. Beeso tum'ba mu civuufu beenë, cibilë luziingu lwiitu mu buloongo fwiifu yi luziingu lu Yeesu Kliistu.

¹⁸ Boomë ve mu luzolo. Kasi luzolo lu cyelikë lum'botulë boomë. Boomë bubundënë yimunë liseembo i boobo, wunë wuke yi boomë wusye zaabë ko luzolo lunë lufwanëkënë.

¹⁹ Kasi mu beeso, tuke yi luzolo cibilë ti Nzaambi na ntetë kutuzolë.

²⁰ Ningë muutu wun'tubë : « Yizolisi Nzaambi » i wun'leendë mwaanë yaandi nguli, naandyoowo mungë lupuutu. Licyelikë, ningë naandi kusë n'zolë kuve mwanaandi nguli wo kum'monaangë, naandi kupodi ve kuzolë Nzaambi wunë kun'kaambu kumonë.

²¹ Talaanu, lutumu lunë Kliistu watuvaanë: wunë wun'zolë Nzaambi, wufwenikini yivaandi kuzolë mwanaandi nguli.