1 Za 3 - N’KANGULU WUMOONË

Baanë bë Nzaambi

¹ Lwe monaanu buni na Taatë wutuzolilaangë beenë! Luzolo lwaandi lwiinji mu beeso, bwaawu kututeelë baanë bë Nzaambi i bwa boobo bwaawu tukelili cyelikë. Mu bwaawu buloongo be buubu busye tuzaabë ko: bwaawu busye zaabë Nzaambi ko.

² A sindiku syaami, buyifanwabu beeso tweekë baanë bë Nzaambi. Kasi bunë tum'beelë yibuunu kutumbukë fë ciyalëlë. Oboobo, beeso tuzabisi aliili: bunë na Kliistu kum'monikë, beeso tum'ba mpilë mweekë yi naandi, cibilë tukum'monë bunë naandi kukelili.

³ Wosuku muutu wun'ta lyaanë mu naandi yivaandi wun'lyoomë, bo bumweekë Yeesu Kliistu wunë wuke wulyoomë.

⁴ Wosuku wun'sumukë, naandyoowo wun'tunzukënë mu n'kaakë Nzaambi, cibilë ocyo wunë wun'vaangë lisumu, mati watunzukënë Nzaambi.

⁵ Beeno lulizabisi ti, Yeesu Kliistu wuyimonikë mu kukobulë mësumu i mu naandi lisumu voo.

⁶ Oboobo, wosuku wun'kangëmë mu naandi wun'leembu kusumukë. Kasi wunë wum'bweelë kusumukë, wun'leesi ofo ti naandi yibuunë kum'monë i wusye n'zaabë ko.

⁷ A baanë baami, keelaanu wosuku muutu kuluvukumunë! Wunë wun'vaangë linë lisulëmë, naveekë wusulëmë, bunë Yeesu Kliistu wusulëmë.

⁸ Wunë wum'bweelë kusumukë, naandyoowo mungë dyaabu, cibilë dyaabu wutoonë kuvaangë lisumu fanë ntonunu. Mwaanë Nzaambi wuyisilë mu kutyamunë mëvaangë më dyaabu.

⁹ Wosuku muutu wacitukë mwaanë Nzaambi, wun'leembu kube sumukë, cibilë luleendo lu luziingu lu Nzaambi lulë mu kusalë mu naandi, cibilë Nzaambi na Tataandi, naandi kube podi ve kuvaangë lisumu.

¹⁰ Tala buni bëm'podi kuvisilë buboti banë bëke baanë bë Nzaambi i bo bëke baanë bë dyaabu : wosuku wun'kaambu kuvaangë lyaambu lisulëmë, kaambofo wun'kaambu kuzolë mwanaandi nguli, naandyoowo wukeeli ko mwaanë Nzaambi.

Zolësënaanu benuveekë yi benuveekë

¹¹ Licyelikë, tala saangu yinë luyuwu fanë ntonunu : twe zolësënaanu besuveekë yi besuveekë.

¹² Keelaanu kuba buke Kayiinë : naandi wabë yi N'kangulu yi Civadë-mbi i wusë voondë nkoombaandi. Cibilë-mbici kun'vondilë? Cibilë ti mëvaangë më Kayiinë mabë mëbi, kasi më nkombaandi mabë mëboti.

¹³ A baanë bë nguli, nuzimbyaanu ko ningë baatu bë buloongo be buubu bëluleendë.

¹⁴ Beeso tuzabisi ti, twabotukë ku lufwa i tweekë ku luziingu, cibilë beeso tuzolisi baanë biitu bë nguli. Wunë wun'kaambu kuzolë, wucini mu lutumu lu lufwa.

¹⁵ Wosuku wun'leendë mwanaandi nguli naandi n'voondi baatu. Kosuku beeno luzabisi ti wosuku n'voondi baatu, naandi ciikë ve ku luziingu lu sakë yi sakë.

¹⁶ Tala buni beeso tun'zabilë luzolo: Yeesu Kliistu wuvaanë luziingu lwaandi mu cibilë ciitu, bwaawu, besuviitu tufwenikini kubëliminë mu kuvaanë luziingu lwiitu mu baanë biitu bë nguli.

¹⁷ Ningë wun'viipë ke yi businë bu buloongo be buubu i wum'monë mwanaandi nguli mu n'ciinzë kasi wun'kaangë n'timaandi, kuwulu buni naandi mu kutubë ti be zolë Nzaambi?

¹⁸ A baanë baami, nuzolyaanu ko tokë mu mëbuungu, yimunë sinkuungu sibuunë, twe leesi luzolo lucyelikë lum'monikë mu mëvaangë.

Civuufu mu Nzaambi

¹⁹ Tala buni tun'zabilë ti beeso tuke mu cyelikë. Tala buni n'timiitu kum'beelë mu civuufu fë ntwaalë Nzaambi.

²⁰ Licyelikë, ningë n'timiitu wutufundisi, Nzaambi mwiinji bunenë yi n'timiitu i naandi wuzabisi makë mooso.

²¹ A sindiku syaami, ningë n'timiitu wusë tufundisi ko, beeso tuke civuufu yimunë Nzaambi.

²² Beeso tun'tambulë ke naandi byakë byooso tukun'loombë, cibilë tun'cinzikaangë tutumu twaandi i tun'vaangaangë manë kun'zolaangë.

²³ Talaanu linë naandi wutuloombë: mati beeso tuta maanë mu lizinë li Mwanaandi Yeesu Kliistu i tuzolësënë besuveekë i besuveekë, bo bumweekë Kliistu wutulombilë.

²⁴ Wunë wun'sweekë tutumu tu Nzaambi wun'kalilë mu lukubu lu Nzaambi i Nzaambi ke mu naandi. Mu boobo, mwaawu twabakulë ti naandi wuke yiitu : mu cibilë ci Ciluunzi cyaandi kutuvaanë.