1 Za 2 - N’KANGULU WUMOONË

Kliistu wakwiisë mu kutuzudi

¹ Baanë baami, yalusonikinë lyaliili bwiinji ti beeno luleembu kubwa mu lisumu. Kasi ningë wun'viipë wabwa mu lyaawu, beeso tuke lilingisi kuke Taatë : Yeesu Kliistu, wusulëmë.

² Cibilë Yeesu Kliistu wuyivakulë buke likabu li lobukulu lu mësumu miitu i yaaku tokë mo miitu, kasi yivaandi mu banë bëke mu buloongo n'viipë.

³ Ningë beeso tube len'vukë mu tutumu tu Nzaambi, tum'podi kuba yi civuufu ti beeso tube zaabë Nzaambi.

⁴ Ningë wun'viipë wun'sisiminë : « Miinu yin'zabisi », kasi wusë n'lenvukë ko mu tutumu twaandi, na cibutë-maambu i cyelikë ve mu naandi.

⁵ Kasi, ningë wun'viipë wun'lenvukë mu libuungu li Nzaambi, cyelikë luzolo lu Nzaambi luke mu naandi. Boobo, tala bunë beeso tum'podi kusisimini ti tubundënë yi Nzaambi.

⁶ Wunë wun'tubë ti wubundënë yaandi, wufwenikini kuzingilë dedë mweekë bo buzingilë Yeesu.

Lutumu lumoonë

⁷ A sindiku syaami, lukeeli ko lutumu lumoonë yakulusonikinë. Kasi lutumu lu n'tamë, lunë beeno lutambulë fanë ntonunu. Lutumu lu n'tamë alu, lwaawu saangu yinë beeno luyuwu.

⁸ Mu kumonë, lwaawu lutumu lumoonë yalusonikinë, bucyelikë bumonikë mu Kliistu i mu beeno yivaandi. Licyelikë, citoombi cyavyookë i cyeseesë cyaselukë.

⁹ Wunë wun'tubë ti naandi wun'zingilë mu cyeseesë i wun'leendë mwanaandi nguli, naandi wucini ku citoombi.

¹⁰ Wunë wun'zolë mwanaandi nguli wun'kalilë mu cyeseesë, mu bwaawu, cin'velë ve mu naandi cikum'bwiisi mu libi.

¹¹ Kasi wunë wun'leendë mwanaandi nguli wuke ku citoombi. Naandi wun'lyaatë ku citoombi i wusë n'zaabë ko kuni ku munë kweendë, cibilë citoombi cyan'vangisi kuba mpofo.

¹² Baanë baami, miinu yilë mu kulusonikinë cibilë ti mësumu miinu makobukë mu lizinë li Yeesu Kliistu.

¹³ Beeno mëtaatë, miinu yilë mu kulusonikinë, cibilë ti luzabisi wunë wabë fanë ntonunu. Beeno bilesi, yilë mu kulusonikinë, cibilë lwaluungilë mpakë fë ntwaalë Civadë-mbi.

¹⁴ Baanë baami, yilë mu kulusonikinë, cibilë luzabisi Taatë. Mëtaatë, miinu yilë mu kulusonikinë, cibilë luzabisi wunë wabë fanë ntonunu. Beeno bilesi, yilë mu kulusonikinë yivaandi, cibilë luke yi n'viingu i lun'cinzikaangë libuungu li Nzaambi lin'kalilë mu beeno i lwaluungilë mpakë fë ntwaalë Civadë-mbi.

¹⁵ Nuzolyaanu ko buloongo, keti cin'velë ve cinë cike mwaawu. Ningë muutu wuzolisi buloongo, naandi kupodi ve kuzolë Taatë.

¹⁶ Licyelikë, tala linë libakisi buloongo: n'vwiilu wukutoonzi bideenzë byaandi kaambofo mu kubakë binë bim'monikë i lunaangu lukangëminë mu biimë bi n'toto. Mweeni, byakë byooso obyo, bisye fuminë ko ke Taatë, kasi mu buloongo.

¹⁷ Buloongo bulë mu kuvyookë i byakë byooso obyo bën'vwa n'ciinzë, kasi wunë wun'vaangë n'vwiilu Nzaambi wun'ziingë sakë yi sakë.

Mbeeni yi Kliistu

¹⁸ Baanë baami, talaanu zoolë be yiiyi yi siitu! Beeno luyuwu ti Mbeeni yi Kliistu wun'kwisë. Kosuku, buyifanwabu, mpaapë simbeenyi si Kliistu bakubasikë i beeso tuzabisi ti tweekë fë zoolë yi siitu.

¹⁹ Baatu be boobo bëtukwakënë, kasi baawu bisye ba cyelikë biitu ko. Oboobo, ningë baawu babë cyelikë biitu, nkanë baawu bëlëba yiitu. Kasi baawu bëtuyakënë, bwiinji tuviisi ti wun'viipë ve mu baawu wabë cyelikë wiitu.

²⁰ Kasi mu beeno, lwakwaakë Ciluunzi ci Saantu cifuminë ke Kliistu, bwiinji luzaabë cyelikë cyooso.

²¹ Ningë, yalusonikinë yaaku ti cibilë beeno lusye zaabë ko bucyelikë, kasi cibilë beeno lubuzabisi. Beeno luzabisi yivaandi ti lupuutu ve lun'fuminë mu bucyelikë.

²² Oboobo, mungë lupuutu nanye? Mati wunë wun'tubë ti Yeesu wukeeli Kliistu ko. Naandyoowo na Mbeeni yi Kliistu : naandi wum'mangë vyaasi mweekë Taatë i Mwaanë.

²³ Licyelikë, wosuku wum'maangë Mwaanë, naandi lukubu vo yi Taatë, kasi wunë wun'tambulë Mwaanë, naandi watambulë yivaandi Taatë.

²⁴ Mati mu lyalyooli, lwe kebyaanu buboti mu mitimiinu lyaambu linë beeno lwatambulë kutoonë fë ntonunu. Ningë ti lube sweekë manë luyuwu, beeno lun'fyaatë mu Mwaanë i mu Taatë.

²⁵ Talaanu linë Kliistu wutukanyi: luziingu lu sakë yi sakë.

²⁶ Miinu yilë toombaangë kulusonikinë maambu ama, mu cibilë ci banë bën'toombë kulupuutë.

²⁷ Kasi mu beeno, Ciluunzi lwakwaakaanu mu Kliistu cye kalë yiinu. Beeno lukeeli ko yi n'ciinzë mu kube luloongë. Licyelikë, Ciluunzi cilëloongë makë mooso: wulësinë cyelikë i yaaku lupuutu ko. Mati mu lyaawu, vaangaanu manë naandi kulusinë : lwe kalilaanu mu Kliistu.

²⁸ Cibeeni, baanë baami, lwe kalilaanu mu Kliistu, bwiinji lubaanu mu civuufu ntaangu naandi kum'monikë i keelaanu kuba mu sonyi fë ntwaalaandi cilumbu ci lwisulu lwaandi.

²⁹ Beeno luzabisi ti Kliistu wusulëmë. Mu bwaawu, beeno lube fwaanë kuzaabë ti wosuku wun'vaangë linë lisulëmë, naandi wuli mwaanë Nzaambi.