1 Za 1 - N’KANGULU WUMOONË

Libuungu li luziingu

¹ Linë lyabë fanë ntonunu, beeso tuliyuwu, beeso tulimonë mu meeso miitu, tulisitikë, tulisiimbë mu myookwiitu : lyaawu Libuungu lin'vaanë luziingu.

² Luziingu be loolo lumonikë i beeso tulumonë. Beeso tun'tubilë cimbaanji, mu lyaawu beeso tulë mu kulutendulë luziingu lu sakë yi sakë lunë lwabë fëke Taatë i lwisë tumonikinë.

³ Linë beeso tumonë i tuyuwu, beeso twalitendulë ke benuviinu. Oboobo beeno lum'budënë yi beeso mu cintwaali cinë tukeeli yimunë Taatë yimunë Mwanaandi Yeesu Kliistu.

⁴ Beeso twasonikë aliili besuveekë bwiinji ti nyeenziitu yiba deku-dekoo.

Nzaambi cyeseesë kukeeli

⁵ Tala saangu yinë beeso twakuwu ke Yeesu Kliistu i yinë twakulutendulilë : Nzaambi cyeseesë kukeeli i mu naandi citoombi voo.

⁶ Ningë beeso tun'tubë ti tuke mu bundiku yimunë naandi, kosuku tulë mu kuzingilë mu citoombi, beeso bibutu-maambu i tusë n'zingilë ko mu bucyelikë.

⁷ Kasi, ningë tun'zingilë mu cyeseesë, bo Nzaambi naveekë wuke cyeseesë, oboobo, beeso tuke mu cintwaali besuveekë yi besuveekë i meengë më Yeesu, Mwanaandi, më tulyomisi mu lyosuku lisumu.

⁸ Ningë tun'tubë ti, beeso lisumu voo, beeso twayipuutë besuveekë i cyelikë cikeeli ko mu beeso.

⁹ Kasi ningë tun'fungulë mësumu miitu, beeso tun'tulë lufyaatu mu Nzaambi, cibilë naandi wusulëmë : naandi wutulenvukilë mësumu i wutulyomisi mu lyosuku libi.

¹⁰ Ningë tun'tubë ti beeso tusye sumukë ko, tun'citulë Nzaambi cibutë-maambu i libuungu lyaandi likeeli ko mu beeso.