1 Timotee 6 - N’KANGULU WUMOONË

¹ Bëndongo bakë booso bëfwenikini kucinzikë sifumu syaawu mu luciinzu lubëfwenikini, bwiinji muutu ve wun'safulë lizinë li Nzaambi i sinunwiitu.

² Ningë baawu bëke yi sifumu bata maanë, baawu kupodi ve kubëkaambu luciinzu mu ntoondo ti baanë baawu bë nguli bëkeeli. Tiilyoko, baawu bëfwenikini kube salilë buboti, cibilë banë bën'tambulë cisalu cyaawu bëke bitamaanë bizolu ke Nzaambi. Tala manë wufwenikini kusinë i kuciinzi.

Mëloonji më lupuutu i businë bucyelikë

³ Mooti wun'viipë wun'sinë mëloonji mën'ka i wun'kwakënë yi mëbuungu mësulëmë më Fumwiitu Yeesu Kliistu i mu mëloonji mëfwenikini yi ciminu ciitu,

⁴ naandi wuwaalë lukwaayi i buzimbu. Naandi wum'beelë ncyeenzu simpakë i lwambulu lu bikumë. Mwa moomo, mwa mu kwisilaangë likwaafi, twambulu, bifiingu, simbalulu simbi,

⁵ i simpakë sin'kaambu më manunu fë meeyi baatu bëke simbalulu simbi, bëzimbëkënë makë mooso mëcyelikë. Baawu bëm'balë ti ciminu mu Nzaambi, mwaawu bëm'bakilë businë.

⁶ Cyelikë, lufyaatu mu Nzaambi lukeeli m'bakulu businë, ningë tube cikunë binë bike yiitu.

⁷ Cibilë, beeso tusye twaalë cin'velë ko mu buloongo be buubu i tusë m'podi kunatë ciimë ko.

⁸ Mu lyaawu, mooti tuke yi bilya i n'vwaatu, oboobo byaawu bifwenikini mu beeso.

⁹ Kasi, banë bën'toombë businë, baawu obo babwa mu lisokë, babwitëmë mu n'taambu i babwa mu lilaangu li bideenzë binyungulë i bidiifë, byabwiisi baatu mu lutyamukunu i lunyambëkunu.

¹⁰ Cibilë, nyeenzi mboongo yaawu libaandu li tudiifë tooso, bën'viipë buba n'ciinzë i bisë kwakënë cinaanu yi ciminu i bëyifwaangë baveekë mu mënyonyi.

Tutumu tu Poolë ke Timotee

¹¹ Kasi njeeyi muutu Nzaambi, kebë makë mooso omo. Toombë n'sulëmunu, lufyaatu mu Nzaambi, ciminu, luzolo, mpungë-moonyi i kuvuundë.

¹² Nwaanë n'ziingu wumboti wu ciminu, tatëminë luziingu lu sakë yi sakë, cibilë Nzaambi wukutelë mu kuluzaabë, ntaangu yo wutubilë cimbaanji mu ciminu fë ntwaalë mpaapë baatu.

¹³ Fë ntwaalë Nzaambi, wo wun'vanaangë luziingu mu biimë byakë byooso i fë meeso më Kliistu Yeesu wo wutubë cimbaanji mu mëboti kutubë fë meeso më Poonsë Pilaatë,

¹⁴ vitikë lutumu lo watambulë, luundë lwaawu bunë bufwenikini i kukaambu liseembu tee fanë cilumbu cinë Fumwiitu Yeesu Kliistu wum'monikë.

¹⁵ Lumonikënë olo lum'ba mu ntaangu yo naveekë Nzaambi wutiisi, N'kwa-Muundë vwiili cizibë ci liyaanji, N'tinu mitinu i Fumu sifumu.

¹⁶ Naveekë vwiili wuke luziingu lukalilë, naandi wun'kalaangë mu cyeseesë cinë muutu ve wum'podi kubelëmë. Wosuku muutu ve wum'monë kaambofo wum'podi kum'monë. Ke naandi bumpumu i luleendo lu sakë yi sakë! Ameenë.

¹⁷ Kaambë banë bëke yi businë mu buloongo abu bëleembu kuba yi lunaangu i bëleembu kutulë civuufu cyaawu mu businë bukaambu nteendu. Kasi mu Nzaambi wunë wutuvaanë byakë byooso lunduu, bwiinji tuba mu liyaanji.

¹⁸ Bëtumë bëvaangë maambu mëboti, bëvalë mu sinsalulu simboti, bëba yi bwalëkisi i bëbeliminë mu kukabënë yimunë bayaawu.

¹⁹ Boobo, bën'kucikë businë buboti buciindë mu ntaangu yin'kwisë, bwiinji bëtambulë luziingu lu cyelikë.

²⁰ A wayaami Timotee, luundë buboti-buboti makë mooso watambulë ke Nzaambi, maangë sintubulu sikaambu nteendu i manë mëkaambu kufwanëkënë yi ciminu, keelë wulëcikunë mosuku maambu.

²¹ Licyelikë, bën'viipë nkanë bubakë mpilë luzaabu alu i baawu bëyakënë yi ciminu. Muulë Nzaambi we ba yiinu.