1 Timotee 5 - N’KANGULU WUMOONË

Bisalu fë ntwaalë bitamaanë

¹ Keelë wulë seembë yi nkasu cinunu, kasi n'cindisi dedë bo wum'mweenë tataaku. Vaangë mëboti ke bilesi dedë mweekë banë yaaku bë nguli,

² bëcyeetu bavyookë mpuungë buke bë maamë i bilesi bëcyeetu dedë mweekë baanë baaku bëcyeetu, yimunë bulyomisi bufwanëkënë.

³ Njeeyi we zudi yi luciinzu looso bëfwiili bëcyelikë.

⁴ Kasi mooti n'fwiili ke yi baanë kaambofo bëtekulu, bëfwenikini ti abaabë kusinu mu kusalilë ciminu cyaawu ntetë fë likaandë lyaawu baveekë i mu kusiilë katiboobo ke taatë yi mamë kaambofo sinkaakë syaawu. Tala linë lin'tiisi Nzaambi.

⁵ N'fwiili wucyelikë, wunë wun'kaambu muutu wukun'zudi, watuulë civuufu cyaandi mu Nzaambi i naandi wusë m'biikë ko kusambilë bwiilu ku bwiilu muunyi ku muunyi.

⁶ Kasi n'fwiili wunë wucili n'zingilë mu bideenzë bu buloongo, wafwa bosuku kulë ba moonyi.

⁷ Tala manë njeeyi wufwenikini kubëtebulë moonyi, bwiinji bëleembu kuba yi mëseembu.

⁸ Ningë muutu wum'maangë kuzudi, banë bëke yaandi cifuumbë cimweekë, kulu-kulu yiveko bë n'zwaandi, naandi walekulë ciminu cyaandi, naandi wuvyokili kudiifë yi wo wunë wukaambu kuta lyaanë.

⁹ Mu kuba wusonëmë mu n'taandë bëfwiili, naandi fwenikini kudukusi kwaasu mëkumë-samunu më mivu. Wusye fwenikini ko kuba vyaasi wukweelë,

¹⁰ i naandi fwenikini kuzabukunu mu mëvaangë mëboti. Wunë wuyonzulë buboti banë baandi, wuyakë buboti baatu, wunë wusukulë maalu më bitamaanë, wunë wusasi banë bëyabë mu simpasi i wunë wusalilë makë mooso mëboti.

¹¹ Mu bëfwiili bi bilesi bicyeetu, keelë kubëtuulë mu n'taandë, cibilë bideenzë byaawu kupodi kube bëtumisi mu kube kweelë, baawu kumaangë Kliistu

¹² i baawu kuseembu mu kudifisi lufyaatu lwaawu lu n'tetë ke naandi.

¹³ Kubweelë ofo, bëkaambu cisalu ci kusalë baawu beekë yi cifu cike yendilaangë bweenji sinzo. Kasi manë mëvyokililë bubi, baawu beekë bangë biyoko i bëkaambu kusweekë maambu, baawu ke tubaangë maambu manë mëkambusu kubëtalë.

¹⁴ Mu lyalyooli, miinu yizolisi ti bëfwiili bëcili mpuungë be kweelooso, baawu bëbutë baanë i kuzudi sinzo syaawu, bwiinji bëleembu kuvaanë ke simbeenyi siitu luvoto lu kututubilë simbi.

¹⁵ Cibilë ocyo mwa mpooko bëfwiili balekulë nzilë yisulëmë mu kulaandë Satënë.

¹⁶ Ningë citamaanë cimweekë ci n'cyeetu ke bëfwiili fë cifuumbë cyaandi, naandi wufwenikini kubëzudi i wuleembu kubëbiikë mu n'swa Cingangë, bwiinji Cingangë kuzudi banë bëke bëfwiili bëlë mu kuziingë baveekë.

¹⁷ Bëkuluutu banë bën'natë buboti Cingangë bëbe fwaanë kutambulë ndobwaawu vyaasi wali, kulu-kulu yiveko banë bëke n'funë wunenë mu kuloongë i kusinë libuungu li Nzaambi.

¹⁸ Busonëmë : « Beeno lusye fwaanë ko kukaangaanu ngoombi munu wo wulë mu kufundëmunë lungeenzë » i « Cisasi wufwenikini kubakë ndobwaandi. »

¹⁹ Nuvitikë ko kufuundë n'kuluutu ningë naandi wusye kwiisë ko yi mbaanji wali kaambofo mbaanji tatu.

²⁰ Ningë ti muutu wavaangë lisumu, n'seembi fë ntwaalë baatu bakë booso, bwiinji baatu bën'ka bëmonë boomë.

²¹ Miinu njeeyi yin'loombë yi nkasu yooso fë ntwaalë Nzaambi, Kliistu Yeesu i siyaanzi banë Nzaambi kusoolë : cinzikë mëlubu mooso yimunë n'sulumunu yooso, wuleembu kuvaangë bufukë-nyeembo fo fëke baatu.

²² Keelë wulë tendikë muutu myooko mu ntiinu mu kum'byaasi mu Cingangë. Keelë wulë kotë mu lisumu li bayaaku. Mu njeveekë we yikeeli mu kuba wulyoomë.

²³ Leembu kunwa tokë mo masi, kasi boongë mwa viinyi mu kuvangisi mili yisalë buboti, cibilë ti njeeyi wukalilë mu kubeelë

²⁴ Mësumu më baatu bën'ka mëm'monikaangë fë ciyalëlë ntetë baawu kufundusu. Vandi kasi ke bëmesë, maawu mën'zabënaangë kun'twaalë.

²⁵ Mëvaangë mëboti, maawu yivaandi më monikaangë fë ciyalëlë i manë mën'kaambu kumonikë, maawu kupodi ve kuswaamë.