1 Timotee 4 - N’KANGULU WUMOONË

Miloonji lupuutu

¹ Ciluunzi cin'tubë mu bucyelikë ti, mu bilumbu bi siitu, mpaapë baatu bën'lekulë ciminu, mu kulaandë biluunzi bi lupuutu i mëloonji mën'fuminë ke biluunzi bibi.

² Baawu bëyivangisi kupuutu ke bimpilë-mpiipi i bangë lupuutu, simbalulu syaawu bëdadikë ciliimbu yimunë ciseengu cya beengë mu mbaasu.

³ Baawu obo bën'loongaangë ti, baatu kupodi ve kukweelë i kulya ve ndiiwu yin'ka. Kasi Nzaambi wuvaangë ndiiwu be yooyo mu cibilë ci bitamaanë i banë bëzabisi cyelikë, bisë toondë Nzaambi i kulya.

⁴ Byakë byooso bivaangë Nzaambi biboti, cin'velë ve cim'bumu kasi, bufweeni kwaakë byakë byooso i kutoondë Nzaambi.

⁵ Cibilë libuungu li Nzaambi i n'saambu bin'vangisi byaawu kulyoomë.

Ciseelu ciboti ci Kliistu Yeesu

⁶ Ningë ti njeeyi bëvaanë mëlubu ke banë yaaku bë nguli, wum'ba ciseelu ciboti ci Kliistu Yeesu, wun'leesi ti wuyilikilaangë mu mëbuungu më ciminu i mu ndongulu yi cyelikë yo wulaandë.

⁷ Kasi maangë mizisi yikaambu nteendu i yi vyakënë yi ciminu. Vaangë mëngolo mu kuziingë mu lufyaatu mu Nzaambi.

⁸ Bivudë bi nyitu bike n'ciinzë, kasi mu biimë kwaandi vwiili, lufyaatu mu Nzaambi luvyokili n'ciinzë yi makë mooso. Cibilë naandi wutusisiminë luziingu lu bubwayi i wutukanyi luziingu lun'kwiisë.

⁹ Libuungu ali licyelikë, lifwenikini kutambulu ke bakë booso.

¹⁰ Licyelikë, ningë tulë mu kumonë simpasi i kunwaanë, cibilë beeso tube tuulë civuufu mu Nzaambi moonyi, wunë wukeeli N'vuuci wu baatu booso, yiveko bitamaanë.

¹¹ Tumisi i loongë makë mooso omo.

¹² Keelë bëlëleenji bulesi bwaaku, kasi ba cifwaani fë meeyi bitamaanë, mu mëbuungu maaku, mu ndyatulu lwaaku, mu luzolo lwaaku, ciminu cyaaku i bulyoomë bwaaku.

¹³ Tee yi fanë yin'kwisilë, we yivaani mu kutaangë fë ciyalëlë libuungu li Nzaambi, mu kuciinzi bitu i mu kuloongë.

¹⁴ Keelë wulë leenji likabu li Cimpeefë like mu njeeyi, linë bëkuvaanë bunë mibici bëbikë i mëkakëtë bëkuten'dikë myooko.

¹⁵ We yivandikë mu makë mooso omo, we yivaani mu cisalu cyaaku. Bwaawu bakë booso bëm'monë maaku kweendë ntwaalë.

¹⁶ We yikebi mu njeveekë i mu mëloonji maaku. Ciimbë moonyi mu mamoomë, cibilë, ningë njeeyi bësiilë katyoobo, wuyivuuci njeveekë yimunë banë bëkuyuwulu.