1 Timotee 3 - N’KANGULU WUMOONË

Bëkuluutu bë Cingangë

¹ Aliili libuungu licyelikë : mooti wun'viipë wuzolisi kuba cinaangë ci bukuluutu mu Cingangë, naandi wun'toombë cisalu ciboti.

² Sye fwaanë ko n'kuluutu Cingangë kuba yi liseembu, n'nuni wu n'kasi wumweekë, wuzitëmë, ke yi mbalulu yimboti i bwalëkisi, wuzabisi kutambulë mbeeni, wuke likanë mu kuloongë.

³ Naandi kuba ve cikolë-mëlafu kaambofo bubaalu, kasi wuvuundë i yi n'sikë, keelë naandi wulë ba nyeenzi mboongo.

⁴ Naandi fwenikini kutumi buboti liziku lyaandi i baanë baandi bëfwenikini kun'vitikilë mu luciinzu looso.

⁵ Mu boobo, ningë n'viipë wusye zaabë ko kutumi liziku lyaandi, buni naandi kum'podi kukeelë Cingangë ci Nzaambye?

⁶ Keelë naandi kulë ba cita maanë cimoonë, mu kumaangë naandi kuba yi lukwaayi i ku siitu wulëbakë lutabu dedë mweekë yi Dyaabu.

⁷ Naandi wufweeni yivaandi kubakë luciinzu ke banë bëkaambu kuzaabë Nzaambi, bwiinji bëleembu kun'leenji i wuleembu kubwa mu mitaambu yi Dyaabu.

Biseenji Cingangë

⁸ Biseenji yivaawu bëfwenikini kuba bëcinzëmë i bëcyelikë, baawu sye fwenikini kuve kukolu mëlafu kaambofo bëleembu kutoombë simboongo si mëyoombo.

⁹ Bëfwenikini kuba lufyaatu lucyelikë mu ciminu yimunë mbalulu silyoomë.

¹⁰ Bufwenikini ntetë kubëseengë. Yivaandi ningë cyosuku ve li kubëseembë, fa fanë fë naani, baawu kupodi kwaawu kusalë dedë mweekë biseenji.

¹¹ Bëkasi baawu yivaandi bëfwenikini kuba bëzitëmë i kuleembu kusuungë bayaawu, baawu bëfwenikini kuba bëzitëmë i bën'luungë mu makë mooso.

¹² Bufwenikini, n'seenji kuba n'nuni wu n'kasi mweekë i wun'konzulë buboti baanë baandi i wun'tumi liziku lyaandi lyooso.

¹³ Biseenji bën'salaangë buboti cisalu cyaawu bëbëzanjikë ke bakë booso i bëm'podi kutubilë yimunë civuufu cinenë mu ciminu cyo ciitu cibundënë yi Kliistu Yeesu.

Liviindë linenë

¹⁴ Miinu yakusonikinë n'kaandë awu yi civuufu mu lengë kwiisë ke njeeyi mu kukumonë.

¹⁵ Fa foofë, ningë miinu yisye lengë kwiisë ko, mu kukudyengënë, bisonë abi bikusunjikilë buni wufwenikini kulyatilë mu cifuumbë ci Nzaambi, cinë cike Cingangë ci Nzaambi yi moonyi, likuunzi i lusinjiku lucyelikë.

¹⁶ Cyelikë, mpakë ve, lyaawu liviindë linenë lim'monikinë mu ciminu ciitu! Kliistu, wumonikë dedë mweekë muutu lu moonyi, wuzabukunu buboti mu Ciluunzi ci Saantu i siyaanzi bisë kum'bilë. Bisë tendulë mpolwaandi mu mëkaandë mooso, wuvitiku mu buloongo n'viipë, naandi wuzanjiku mu bumpumu bu yilu.