1 Timotee 2 - N’KANGULU WUMOONË

Mëlubu mu lyaambu li n'saambu

¹ Cin'tetë, yilë mu kulukaambë mu kuloombë ke Nzaambi misaambu, tubondululu i mëtoondo mu cibilë ci baatu bakë booso.

² Lufwenikini kusambililë mu mitinu i mikwa-lwaangu yooso, bwiinji tunatë luziingu luvuundë, lu n'sikë, lucinzëmë, mu lufyaatu mu Nzaambi.

³ Lyaawu ali liboti i linyeefë fë meeso më Nzaambi, N'vuuciitu,

⁴ wuzolisi ti baatu bakë booso bëvuukë i bëbakë luzaabu lu cyelikë.

⁵ Cibilë fëke Nzaambi mweekë too i lilingisi limweekë too fë meeyi Nzaambi i baatu, muutu Kliistu Yeesu,

⁶ wuyivakulë naveekë dedë luvunu mu kuvuuci babooso: oboobo naandi wunatë mu ntaangu yifwenikini cimbaanji ti Nzaambi zolisi baatu booso bëvuukë.

⁷ Mu bwaawu, miinu bëkun'tuunvi cipayi i m'bunzi, mu kuloongë ke banë bëkaambu Sizwiifë ciminu i bucyelikë. Miinu yisë m'puutë ko, yin'tubë mëcyelikë.

⁸ Miinu yizolisi ti fosuku faamë baatu bësambilë, kunangunaangë myooko yi lyoomë ku yilu, likaanzi ve, mpakë ve.

⁹ Miinu yizolisi yivaandi ti bëcyeetu bëvwaatë buni bufwenikini, yimunë luciinzu i kubetëmë, baawu bëleembu kumiingë mu kubiindë mileenji yi kwaatë-yekë, kaambofo simpaangë si woolë, misaangë i mivwaatu bukaalu,

¹⁰ kasi mëvaangë mëboti, bunë bufwenikini ke bëcyeetu bën'tubë ti bën'cinzikë Nzaambi.

¹¹ Bufwenikini ke bëcyeetu mu kutambulë liloonji mu n'sikë i bubonzulu booso.

¹² Miinu yisë n'vaanë ko n'swa ke n'cyeetu mu kuloongë kaambofo mu kuboongë lutumu fëke libakëlë. Naandi bëfwaanë kukalë swii.

¹³ Licyelikë, Adaamë wuvangënë ntetë yi Eevë.

¹⁴ Yaaku ti Adaamë naandi bëpuutë ke Satënë, kasi n'cyeetu naandi wubwa mu lisokë i wusë maangë kucinzikë lutumu lu Nzaambi.

¹⁵ Mu boobo, n'cyeetu n'vuukilë bunë kum'butë baanë, vandi lin'viipë naandi kukalilë mu ciminu i luzolo i busaantu, yimunë luciinzu.