1 Timotee 1 - N’KANGULU WUMOONË

Sibweekë

¹ Poolë, m'bunzi wu Kliistu Yeesu mu n'swa Nzaambi N'vuuciitu i mu Kliistu Yeesu civuufu ciitu.

² Timotee, mwanaami wucyelikë mu ciminu, njeeyi yin'sonikinë. Biikë Nzaambi Taatë i Kliistu Yeesu Fumwiitu wukuvaanë muulë, n'leenvo i n'sikë.

Lubikini mu sindongulu simbi

³ Bunë miinu yikukambilë fanë yilëkwendilë ku Masedwaanë, syaalë ku Efeesë. Faawu ke bën'viipë bën'sinaangë sindongulu simbi. Njeeyi fwenikini kubëfuungë mu kuloongë maawu.

⁴ Bëkaambi bëleembu mizisi i mitaandë yikulë yi mëzinë më sinkaakë, bin'vangisi twambulu, kanuku mu kusalilë nzilë mëvukulu yi Nzaambi, yo tuzabisi mu ciminu.

⁵ Lutumu olo luke tesu mu kuleesi luzolo lufuminë mu n'timë wulyoomë, mu mbalulu simboti i mu ciminu ci cyelikë.

⁶ Bën'viipë, bëbandilë mbusë nzilë be yooyi i bëzimbilë mu twambulu tukaambu nteendu.

⁷ Baawu bëm'balaangë ti baawu miloonji yi n'kaakë Nzaambi, kasi baawu bisë n'zaabaangë ko manë bën'tubaangë i baawu biyitubilaangë yi nkasu yooso.

⁸ Cibeeni, tuzabisi ti n'kaakë wukë wumboti, mooti bëbe wusalilë mu n'salulu yifwanëkënë.

⁹ Twe tebukaanu moonyi ti n'kaakë wusye vangininë ko mu cibilë ci baatu bësulëmë, kasi mu cibilë ci bivadë-mbi i bituutë, bëke bubaalu, bisumuci, baatu banë bën'kaambu kucinzikë Nzaambi kaambofo biimë bi saantu, banë bën'voondë taatë i maama, banë bën'voondaangë baatu,

¹⁰ banë bëke yi busafu, bëbakëlë bën'kwelësënaangë baveekë i baveekë, bangë lungooso lu baatu, bangë lupuutu, bo bën'lefaangë mpesë si lupuutu i banë bën'salilaangë maambu mëvyakënë mu mëloonji mëcyelikë.

¹¹ Liloonji olyo, like mu Mpolu Mboti yinë bëkum'paanë i yinë yifuminë ke Nzaambi bumpumu, cizibë ci liyaanji.

Mëtoondo mu mëboti më Nzaambi

¹² Miinu yin'toondë Kliistu Yeesu Fumwiitu, wakum'paanë n'viingu wufwenikini mu cisalu cyaami. Miinu yikun'toondë mu civuufu cyo kwakun'siilë fanë kwakum'bongilë mu cisalu cyaandi.

¹³ Ntaangu ntamë yilën'tubilaangë simbi, yilën'nyokulaangë i yilën'fiingaangë. Kasi Nzaambi wakun'fwiilë cyaali, cibilë ti yisye ba yi ciminu ko i yisye zaabaangë manë yilëvaangaangë ko.

¹⁴ Fumwiitu wadukulë yinë lunduu muulaandi mu miinu, wakum'paanë ciminu i luzolo lunë luke yiitu mu bundiku bwiitu yimunë Kliistu Yeesu.

¹⁵ Lyaawu ali libuungu licyelikë, lifwenikini kutambulu ke bakë booso, ti Kliistu Yeesu wuyisilë mu buloongo mu kuvuuci bisumuci. Miinu yilë n'sumuci wunenë wuvyokili mu katyaasi kwaawu.

¹⁶ Kasi mu lyalyooli mwa Nzaambi wukun'fwiilë cyaali. Naandi wuzolë ti, Kliistu Yeesu wuleesi mu miinu n'sumuci wunenë, mpungë-moonyaandi yooso dedë ciliimbu mu banë kun'twaalë yikwisë bën'ta maanë mu naandi i bën'tambulë luziingu lu sakë yi sakë.

¹⁷ Ke N'tinu wu sakë yi sakë, wun'kaambu kufwa, kumonikë i Nzaambi mweekë, we cinzimi i we dumu mu ntaangu syakë syooso! Ameenë.

¹⁸ Mwanaami Timotee, tala lutumu lunë miinu yakuvaanë dedë mweekë mëbuungu bëbikë mu njeeyi ntaangu ntamë. Biikë mëbuungu be moomo mëba n'viingu mu njeeyi mu n'ziingu wo wulë mu kunwaanë,

¹⁹ keelë ciminu i mbalulu yimboti. Ke bën'ka bëm'maangë kuwu mbalulu lwaawu i bëvangisi ciminu cyaawu kubwa.

²⁰ Mu nkoongaawu yike Yimenë i Alekëzandëlë, miinu yibëvakulë ke Satënë, bwiinji bësinu mu kuleembu kusafulaangë Nzaambi.