1 Tesaloniikë 5 - N’KANGULU WUMOONË

¹ A baanë bë nguli, beeno lukeeli ko n'ciinzë, mo bëlusonikënë mu cibilë ci sintaangu i mitoono fanë makë mooso omo mën'kwisilë.

² Cibilë beeno luzabisi benuveekë buboti ti cilumbu ci Fumu cin'kwisilë mu cin'tulumuci buke mwiifi mu bwiisi-buyilë.

³ Ntaangu yo baatu bën'tubilë : « Aa mbakë n'sikë! Aa mbakë lukelulwe ! » Fa foofë faawu, kuzimbukulabu, n'tyatyamu kubwa mu baawu, dedë mweekë misoongo yikubutilë yim'monaangë n'cyeetu wuke mu bweembë. Muutu ve wum'podi kuvuukë.

⁴ Kasi beeno, a baanë bë nguli, lukeeli ko ku citoombi mu kuba ti cilumbu be cyooci ci lutulumunë buke mwiifi.

⁵ Licyelikë, benubooso, baanë bë cyeseesë lukeeli i baanë bë bwiisi-bucya. Beeso tukeeli ko baanë be bwiisi-buyilë, kaambofo bë citoombi.

⁶ Bwaawu, Tunucyaanu ko tolo buke bëmesë. Kasi twe kalilaanu mu n'cyeelë, zungululaanu.

⁷ Binuukë tolo, mati bwiilu bën'nuukaangë i bikolu mëlafu, mati bwiilu bën'nkolwaangë.

⁸ Kasi beeso, basë bwiisi-bucya, tufwenikini kuzungululë. Twe mboonjyaanu ciminu i luzolo buke ciyuungë ci cinwanunu i civuufu ci luvukulu buke m'pu cinwanunu.

⁹ Licyelikë, Nzaambi wusye tutelë ko mu kubwa mu likaanzi lyaandi, kasi mu kubakë luvukulu mu Fumwiitu Yeesu Kliistu.

¹⁰ Kliistu wufwiilë mu cibilë ciitu, bwiinji tuzingilë yimunë naandi, tuba moonyi kaambofo tufwa, bunë naandi kun'kwisilë.

¹¹ Bwaawu, fulusënaanu n'viingu i cindësënaanu benuveekë i benuveekë mu ciminu, bo lulë mu kulivangilë.

Mëkomini më siitu i sibweekë

¹² A baanë bë nguli, beeso tululoombë lucinzikë bo bën'salaangë yiinu, banë mu n'swa wu Fumu bëlë mu kulusulikilë i bëlë mu kulubikini.

¹³ Bëleesyaanu mpaapë luciinzu i luzolo, mu cibilë ci cisalu cyaawu. Benuveekë i benuveekë zingilaanu mu n'sikë.

¹⁴ Beeso tulë mu kulutumë, a baanë bë nguli : bikinyaanu myoolu, cindisyaanu bangë boomë, zudyaanu banë badekë, baanu mpungë-moonyi mu bakë booso.

¹⁵ Kebaanu wosuku muutu mu kuvutulë libi mu libi, kasi cyeengaanu mu ntaangu syakë syooso mu kuvaangë liboti mu benuveekë i benuveekë i mu baatu bakë booso.

¹⁶ Kalilaanu mu liyaanji ntaangu syooso,

¹⁷ sambilaanu ntaangu syooso.

¹⁸ Toondaanu Nzaambi mu yosuku ntaangu. Mamoomo maawu Nzaambi kun'loombë mu beeno, mu luziingu lwiinu yimunë Yeesu Kliistu.

¹⁹ Nuvangësyaanu nkakinyi ko mu cisalu ci Ciluunzi ci Saantu.

²⁰ Nubayaanu ko sisaangu si tubiku.

²¹ Kasi biilaanu buboti makë mooso : simbaanu mo mëboti

²² i keelaanu mu makë mooso mëbi.

²³ Biikë Nzaambi wunë wuke cizibë ci n'sikë wuluvangisi kuba baandi. Naandi wuluundë cimuutu ciinu cyooso, ciluunzi ciinu, mbali i nyitu, mëseembu ve mu cilumbu cin'kwisilë Fumwiitu Yeesu Kliistu.

²⁴ Wunë wulutelë wun'dukisi maawu, cibilë naandi wusulëmë.

²⁵ Baanë bë nguli, sambilaanu yivaandi mu beeso.

²⁶ Bilaanu baanë booso bë nguli mu lufifukunu lu luzolo.

²⁷ Miinu yilubondililë, mu lizinë li Fumu: taangaanu n'kaandë be woowo ke baanë yiinu booso bë nguli.

²⁸ Biikë muulë wu Fumwiitu Yeesu Kliistu we ba mu benubooso.