1 Tesaloniikë 4 - N’KANGULU WUMOONË

Ndyatulu yin'toonzi Nzaambi

¹ Vandi, a baanë bë nguli, beeno lusinu ke beeso buni lufwenikini kulyatilë mu kutoonzi Nzaambi. Cibeeni, boobo beeno lulë mu kulyatilë. Kasi buyifanwabu, tulë mu kululoombë i kulubondililë mu lizinë li Fumu Yeesu : lwe bweelyaanu kube vaangë linë livyokilili.

² Licyelikë luzabisi mëkomini mo beeso tuluvaanë mu lizinë li Fumu Yeesu.

³ Talaanu, bunë bukeeli n'vwiilu Nzaambi : mati beeno luba lu lyoomë i lwe yakënyaanu mu busafu.

⁴ Kadë muutu mu beeno kwe zaabë kuboongë n'cyeetu mu nteku busaantu i yicinzëmë,

⁵ kuleembu kuyilekulë mu bideenzë bibi, dedë mweekë banë bukaambu kuta maanë, bëkaambusu kuzaabë Nzaambi.

⁶ Mu lyaambu be lyoolyo, muutu ve wufwenikini kuvaangë libi mu mwanaandi nguli, kaambofo wulyatilë lutumu lwaandi. Beeso tulukaambë vyaasi maawu i tulukumini buboti mu maawu: Fumu wun'vaanë kastiikë ke banë bëlë mu kuvaangë mpilë maambu omo.

⁷ Oboobo, Nzaambi sye tutelë ko mu kuzingilë mu busafu, kasi mu bu lyoomi.

⁸ Mati bwaawu, wunë wum'baayi mëkomini ama, wusë m'baayi muutu ko, kasi Nzaambi wunë wuluvaanë Ciluunzi cyaandi Cisemi.

⁹ Beeno lusyeeli n'ciinzë ko mo bëlusonikënë mu linë lin'talë luzolo lu cintwaali. Licyelikë, beeno lusinu benuveekë ke Nzaambi mu kuzolësënë benuveekë yi benuveekë.

¹⁰ Mati bwaawu, luzolo be loolo lulë mu kuleesi kuke baanë yiinu booso bë nguli basë Masedwaanë n'viipë. Kasi beeso tulë mu kulucindisi, baanë bë nguli, bweelaanu kube vaangë linë livyokilili.

¹¹ Lwe baanu cideenzë ci kuzingilë mu n'sikë, mu kuyivaanë mu bisalu biinu benuveekë i mu kusalë mu myookwiinu mu kubakë cinë cifwanëkënë, bo tululombilë faanë yi faanë.

¹² Ndyatulwiinu yin'vangisi banë bëkaambu kuta maanë kulucinzikë i beeno lusë m'ba n'funë mu muutu ko.

Lwisulu lu Fumu

¹³ A baanë bë nguli, beeso tun'tiisi mo luzaabë bucyelikë mu banë bëfwa, mu kumaangë beeno kuba mu cyuundë bo buke bëmesë, banë bëkaambusu civuufu.

¹⁴ Ningë beeso tun'ta maanë ti Yeesu wufwa i vulumukë mu nkoongë bëfwa. Bo bumweekë, beeso tuke yivaandi yi lyaanë ti Nzaambi wun'vulumunë yimunë Yeesu banë bën'fwa, bën'ta maanë mu naandi.

¹⁵ Talaanu, licyelikë linë tun'tubë bunë bukelili liloonji li Fumu : banë mu beeso bëm'ba moonyi fanë fën'kwisilë Fumu, tusë m'ba ntwaalë ko yi banë bëfwa.

¹⁶ Ntaangu yin'fwaanë, mbeembu yi fumu siyaanzi i ncyeembi mpuunji yi Nzaambi bin'kuwukunu i Fumu naveekë wun'tuukë lu yilu. Banë bëfwa, bëta maanë mu Kliistu baawu ba bën'vulumukë ntetë.

¹⁷ Fë mbusë, beeso tum'ba mu luziingu ntaangu be yinina, tun'nangukë yimunë baawu mu mëduungë, mu kudyengënë Fumu ku yilu. Mu bwaawu, beeso tun'kalilë sakë yi sakë yimunë Fumu.

¹⁸ Cindësënaanu benuveekë i benuveekë mu mëbuungu be maamë.