1 Tesaloniikë 3 - N’KANGULU WUMOONË

¹ Mu bwaawu, beeso tusye be podi ko kuciingë. Beeso tusë boongë lukanyu lu kusyaalë besuveekë ku Ateenë

² i tusë filë Timotee ke beeno, mwaniitu nguli. Naandi wulë ndikwiitu mu Nzaambi mu kuzabikini Mpolu Mboti yi Kliistu. Nkanë naandi wulufulë n'viingu i kuluciinzi mu ciminu ciinu,

³ bwiinji wun'viipë ve mu beeno wun'cikunë sinkwamusu sinë beeso tulë mu kumonë. Benuveekë luzabisi ti, sinkwamusu simpilë oyo sin'vangënë mu n'vwiilu Nzaambi mu beeso.

⁴ Licyelikë, bunë twabooso ke beeno, beeso tuluzabikini ti bëtukwamisi. Mati lyalyooli lya livangënë, beeno luzabisi lyaawu buboti.

⁵ Mati bwaawu, bo miinu yisë be podi ko kuciingë, miinu yisë filë Timotee bwiinji kubakë sisaangu mu ciminu ciinu. Miinu yabë boomë ti dyaabu wulusokë i cisalu ciitu cisë ba cibuunë kwaandi tokë.

⁶ Kasi buyifanwabu, Timotee wavutukë kuke beeso i naandi watuvaanë simpolu simboti si ciminu i luzolo lwiinu. Naandi watukaambë ti beeno ntaangu syakë syooso, lulë mu kutubalaangë yimunë luzolo i lun'tiisi kube tumonë, dedë mweekë yivaandi beeso tun'toombë kube lumonë.

⁷ Mu lyaawu, fë meeyi mënyoni miitu i simpasi siitu, beeso tusë ciindë bitu mu cibilë ciinu, baanë bë nguli, mu likanë lu ciminu ciinu.

⁸ Buyifanwabu, beeso aba tulë mu kuziingë cibilë beeno lukangëmë mu lubundunu yimunë Fumu.

⁹ Buni beeso tum'podi kuvutulilë mëtoondo ke Nzaambiitu mu cibilë ciinu, mu liyaanji lyakë lyooso linë beeno lutuvaanë fë ntwalaandye?

¹⁰ Bwiilu ku bwiilu muunyi ku muunyi, tulë mu kun'loombë yilusisumunu mu kutuvaanë n'swa mu kube lumonë i mu kubweelë cinë cin'kaambooso mu ciminu ciinu.

¹¹ Biikë Nzaambi naveekë, Tatiitu yi Fumwiitu Yeesu wutuzibulë nzilë yinë yitunatë ke beeno!

¹² Biikë Fumu kwe kusi yinë lunduu luzolo lwiinu benuveekë i benuveekë i mu baatu bakë booso bëke moonyi, mu kulandilë cifwaani ci luzolo luke yiitu mu beeno.

¹³ Kulucindisi mitimiinu, bwiinji beeno luba sisaantu i mëseembu ve fë ntwaalë Nzaambi Tatiitu, bunë Fumwiitu Yeesu wun'kwisilë yimunë bakë booso kubakisi. Ameenë.