1 Tesaloniikë 2 - N’KANGULU WUMOONË

Cisalu ci Poolë ku Tesaloniikë

¹ Beeno lulizabisi buboti benuveekë, a baanë bë nguli: yaaku kwaandi mu buunë yibuunë beeso tuyendilë ke beeno.

² Beeno luzabisi yivaandi ti, fë ntwaalë fwaati, beeso bëtufiingë i bëtunyokulë ku Filiipë. Kasi Nzaambi wutuvaanë lunkanvi mu kulutendulilë Mpolu Mboti, bosuku bubeeli lutunzukunu.

³ Licyelikë, mbilë beeso tulë mu kusiindë ke bakë booso, yisye sikëmë kuve mu kuvitu, kaambofo, mu bideenzë bibi i beeso tusë n'toombë kupuutë muutu ko.

⁴ Tiilyoko, beeso tulë mu kutubë bo Nzaambi kun'tiisi, cibilë naandi wamonë ti beeso tufwanëkënë i wusë tuvaanë Mpolwaandi yi Mboti. Beeso tusë n'toombë kuve kutoonzi baatu, kasi Nzaambi wo wun'zaabaangë makë mooso mëke mu mitimiitu.

⁵ Beeno lulizabisi buboti ti, beeso tusye ba vyaasi ntubulu yikukondulë baatu ko. Beeso tusye sweekë mu mëbuungu miitu bideenzë bin'ka ko, mu beeso Nzaambi wulë mbaanji.

⁶ Beeso tusye toombë luzanjiku lu baatu ko, keti lwiinu keti lu bëmesë.

⁷ Mu kumonë, nkanë beeso twapodi kulukacikë bunaangë bwiitu, abu tukeeli mimbunzi, mu Kliistu. Tiilyoko, beeso twaleesi mëleembë fë meeyiinu, dedë mweekë nguli wun'keelë baanë baandi.

⁸ Beeso twabë luzolo lunenë mu beeno, twabë tubeliminë yaaku tokë mu kuluvaanë vwiili Mpolu Mboti yi Nzaambi, kasi yivaandi luziingu lwiitu. Beeno lwabë beenë bukaalu mu beeso!

⁹ A baanë be nguli, beeno lulë mu kutebukë moonyi mu simpasi i mponkoongwiitu : beeso tusalë bwiilu ku bwiilu muunyi ku muunyi mu kumaangë beeso kuba n'funë mu wun'viipë mu beeno, kosuku beeso tulë mu kulutendulilë Mpolu Mboti yi Nzaambi.

¹⁰ Beeno simbaanji lukeeli mu beeso i Nzaambi yivaandi : ndyatulwiitu fëke beeno, bitamaanë, yabë yi lyoomë, yisulëmë i mëseembu ve.

¹¹ Beeno luzabisi ti beeso tusiilë mu kadë muutu mu beeno dedë mweekë taatë yimunë baanë baandi.

¹² Beeso twalufulë n'viingu i kuluciinzi, twaluloombë yimunë lusisumunu mu kuzingilë bo bufwenikini mu Nzaambi, naandi na walutelë mu kuba ku Lwaangu lwaandi i mu bumpumu bwaandi.

¹³ Beeso tulë mu kutoondë Nzaambi ntaangu syooso mu lyaambu lin'kooso : Bunë beeso tulutendulilë Mpolu Mboti yi Nzaambi, luyuwu lyaawu i lucikunë yaaku ti buke libuungu kwaandi vwiili li muutu, kasi buke libuungu li Nzaambi, linë like cyelikë. Bwaawu, lyaawu like mu kusalë mu beeno bitamaanë.

¹⁴ Baanë bë nguli, beeno lwavyokilë mu mpangulu yo yimweekë mu Bingangë bi Zudee, binë bibakisi Nzaambi i bën'ta maanë mu Kliistu Yeesu. Beeno lumonë beenë simpasi mu cibilë ci bayiinu, dedë mweekë Bingangë bimweenë kuke Sizwiifë.

¹⁵ Abaabë bëvoondë Fumu Yeesu i mibici i bëtukwamisi. Baawu bësye betoonzi Nzaambi ko i baawu simbeenyi si baatu bakë booso!

¹⁶ Baawu bën'tiisi kutufuungë mu kutendulë ke mëkaandë mën'ka saangu yim'podi kubëvuuci. Baawu bën'vaangooso mpaapë mësumu yimanë bëvaangë ntamë. Kasi likaanzi li Nzaambi lisë bwiilë mu baawu.

Poolë ke tesu mu kube monë basë Tesaloniikë

¹⁷ Akasi mu beeso, baanë bë nguli, twakabukë yiinu mu mwa ntaangu, mu nyitu kasi yaaku mu n'timë, cyelikë. Kasi beeso twabë yi tesu mu kube lumonë bwaawu beeso twabe vaangë singolo bwiinji livangënë.

¹⁸ Mu lyalyooli, tusë ba n'ciinzë mu kuvutukënë ke beeno i miinu Poolë, yiyelikë kulivaangë mpaapë vyaasi. Kasi Satënë wutukakinyi.

¹⁹ Mati beeno, licyelikë yaaku wun'ka ko, wunë wukeeli civuufu ciitu, nyeenziitu i ciliimbu ci nduunji binë beeso tum'podi kuvangilë lunyemu fë nduunzi Fumwiitu Yeesu, bunë naandi kun'kwisë.

²⁰ Cyelikë, beeno lweekë bumpumu bwiitu i sinyeenzi siitu!