1 Tesaloniikë 1 - N’KANGULU WUMOONË

Sibweekë

¹ Poolë, Silaasë i Timotee. Ke Cingangë ci Tesaloniikë, ci Nzaambi Tatiitu i Fumu Yeesu Kliistu: biikë muulë i n'sikë biluveewu.

Luziingu i ciminu ci basë Tesaloniikë

² Kadë ntaangu beeso tulë mu kutoondë Nzaambi mu cibilë ciinu beeno booso i tulë mu kutebukë moonyi mu beeno mu misaambwiitu.

³ Licyelikë, tulë mu kutandëkënë fë meeso më Nzaambi Tatiitu, ciminu ciinu cinenë, luzolo lwiinu lucyelikë i civuufu ci kangëminë mu Fumwiitu Yeesu Kliistu.

⁴ Tuzabisi a baanë bë nguli, ti Nzaambi wuluzolisi i naandi wulusoolë bwiinji luba baandi.

⁵ Licyelikë, bunë beeso tubëloongë Mpolu Mboti, lisye ba tokë mu mëbuungu ko, kasi yivaandi yimunë luleendo i luzudi lu Ciluunzi ci Saantu i luvitiku lunenë. Beeno luzabisi buni tuzingilë fë meeyiinu mu liboti liinu.

⁶ Beeno, lulaandë cifwaani ciitu i cyo ci Fumu. Bosuku bubeeli simpasi siinu, beeno lutambulë Mpolu Mboti yimunë liyaanji lin'fuminë ke Ciluunzi ci Saantu.

⁷ Mu lyaawu, beeno lwacitukë bifwaani mu bitamaanë byooso bi Masedwaanë i bo bëke ku Akaayi.

⁸ Licyelikë, libuungu li Fumu li tendukë yaaku tokë vwiili ke beeno, tee kunë Masedwaanë i tee kunë Akaayi, kasi yivaandi mati fosuku faamë bën'tubilë mu ciminu ciinu mu Nzaambi cyanyambë. Beeso tukeeli n'ciinzë ko mu kube bulilë lukuungu mu lyaawu.

⁹ Baatu bakë booso bëlë mu kwalulë buni beeno lututambulilë i bunë beeso tuyendilë ke beeno i buni lulekulilë sinkosi, mu kubalukë ke Nzaambi, bwiinji lusalilë Nzaambi yi moonyi i yi cibeeni.

¹⁰ Beeno lulë mu kuciingë ti Yeesu Mwanaandi, wun'fuminë ku mëyilu. Mati naandi Nzaambi kuvulumunë mu nkoongë bëfwa. Naandi wutuvuuci mu lufundusu lo lwabelëmë.