1 Pyeelë 5 - N’KANGULU WUMOONË

Kulengilë moonyi mu mëmemë më Nzaambi

¹ Yin'kaambë buyifanwabu bëkuluutu bëke yiinu mu Cingangë. Miinu yivaamë n'kuluutu yikeeli, mbaanji mu simpasi si Kliistu i yim'bakë cikuuku mu bumpumu bum'monikë. Tala linë yilë mu kubëloombë:

² dedë mweekë miluungë lwe lengilyaanu moonyi mu mëmemë mo Nzaambi kuluvaanë, zungululaanu mu maawu yaaku ti mu n'kacikë, kasi mu n'timë wumboti bunë Nzaambi kuzolisi. Salilaanu yaaku ti mu cideenzë ci kubakë businë, kasi mu luzolo.

³ Lunangiminaanu ko banë bëluvaanë mu kuluungë, kasi lwe baanu bifwaani mu nkaangë mëmemë.

⁴ Bunë N'kuluutu n'luungë mëmemë wum'monikë, beeno lun'tambulë ntaatë bumpumu yin'kaambu kudiifë.

⁵ Bo bumweekë beeno bilesi, lwe cinzikaanu bëkuluutu banë bëluvyokili mivu. Beeno booso lwe kalilaanu mu bubonzulu mu nyuwusunu yimunë bëmesë, cibilë Lisonëmë : « Nzaambi wuleendë bangë lunaangu, kasi naandi wun'vaanë muulë kuke bibonzulu. »

⁶ Lwe betëmaanu fë nduunzi Nzaambi, bwiinji naandi wuluzanjikë mu ntaangu yo kuzitikë.

⁷ Lekulaanu mënyonyi miinu mooso ke naandi, cibilë naandi wun'lengilë moonyi mu beeno.

⁸ Zungululaanu yi n'viingu! Cibilë mbeeniinu dyaabu wulë mu kukoondë buke n'kosi wulë mu kun'ngonë mu kutoombë wun'viipë wukuvoondë.

⁹ Tunzukënaanu mu ciminu ciciindë. Tebukaanu moonyi ti baanë yiinu bë nguli mu buloongo n'viipë bëvyokilë mu simpasi simpilë oyo.

¹⁰ Beeno lum'monë yivaandi simpasi fë mwa ntaangu. Kasi Nzaambi cizibë ci muulë wooso, wulutelë mu kubakë yaandi bumpumu bu sakë yi sakë mu lubundunu yimunë Yeesu Kliistu. Naveekë wulucyemisi, wulucindisi, wulufulë n'viingu i wulukasi fë simbaandu siciindë.

¹¹ Ke naandi luleendo lu sakë yi sakë! Ameenë.

Sibweekë si siitu

¹² Miinu yalusonikinë mwa n'kaandë awu, yimunë luzudi lu Silaasë, wunë yim'monë dedë mweekë mwaanë nguli wusulëmë. Miinu yalivaangë bwiinji luciindë bitu i kuluzabisi ti, lyaawu cyelikë muulë wu Nzaambi, mwa beeno lukangiminë.

¹³ Libuundu like afë fë Babiloonë, lyaawu Nzaambi kwasoolë dedë mweekë beeno, lyalufilë sibweekë, bo bumweekë Malëkë, mwanaami.

¹⁴ Lwe bilësënyaanu benuveekë yi benuveekë mu lufifu lu luzolo. N'sikë we kalë yiinu beeno booso bëke mu Kliistu.