1 Pyeelë 4 - N’KANGULU WUMOONË

Sinzingulu simoonë

¹ Abu Kliistu wumonë simpasi mu nyitwaandi, benuviinu lwe kalilaanu bo bumweekë mu ciluunzi ciinu. Cibilë wunë wumonë simpasi mu nyitwaandi naandyoowo walungilë mpakë mu lisumu.

² Fë bubwaafa, beeno lufwenikini kuzingilë fë moongo butoto dedë mweekë mu n'vwiilu Nzaambi yaaku ti mu bideenzë binsunyi.

³ Licyelikë, beeno lwavyosili ntaangu mu ke vaangaangë byo bin'toonzi banë bëkaambu kuta maanë. Beeno luzingilë mu cinduumbë, bideenzë bibi, kukolë mëlafu, bulyaafu, bulalawu i kukuundë bintumbë.

⁴ Buyifanwabu, banë bëkaambu kuta maanë bisë tulumukë cibilë beeno lusë bëyilekulë ko mu nyendulu simbi i baawu bëlë mu kulufiingë.

⁵ Kasi baawu bën'zabikini mëvaangë maawu ke Nzaambi, wunë wubelëminë mu kufundisi banë bëke moonyi i banë bëfwa.

⁶ Bwaawu, Mpolu Mboti yatendukë tee kuke bo bëfwa : boobo, bëbëfundisi mu manë baawu bëvaangë, dedë mweekë baatu booso bë moonyi, baawu bëke buyifanwabu yi mëkanë, cibilë ci Ciluunzi, mu kuzingilë lu luziingu lu Nzaambi.

Bisasi biboti mu mëkabu më Nzaambi

⁷ Siitu mu makë mooso yabelëmë. Zingilaanu bunë bufwenikini i lwe baanu lutyemunë bwiinji lukalilë mu n'saambu.

⁸ Ntetë mu makë mooso, zolësënaanu benuveekë yi benuveekë, cibilë luzolë lum'botulaangë mpaapë mësumu.

⁹ Lwe baanu yi bwalëkisi benuveekë yi benuveekë, simbalulu ve simbi.

¹⁰ Kadë muutu mu beeno kwe salilë bëmesë likabu kutambulë ke Nzaambi. Oboobo, beeno lum'beelë bisasi biboti mu mpaapë mëkabu më Nzaambi.

¹¹ Wunë wuke yi likabu li libuungu kwe vaanë mëbuungu më Nzaambi. Wunë wuke yi likabu li biseelu, kwe salilë lyaawu yi n'viingu wunë Nzaambi kun'vaanë. Bufwenikini mu makë mooso kutoondë Nzaambi, mu Yeesu Kliistu wuke bumpumu i luleendo lu sakë yi sakë! Ameenë.

Kubakë cikuuku mu simpasi si Kliistu

¹² A sindiku syaami, keelaanu lulë tulumukë mu kuba fë meeyi mbaasu simpekaadu, dedë mweekë ti lyaambu litudë li lukwiisilë.

¹³ Tiilyoko, sangilaanu mu kucikunë simpasi yimunë Kliistu, bwiinji benuviinu luwaalë yi liyaanji linenë bunë naandi kum'monikë mu bumpumu bwaandi ke bakë booso.

¹⁴ Ningë bëbe lufiingë cibilë ti beeno bilaanzi bi Kliistu, nyeenziinu oyo, cibilë Ciluunzi ci bumpumu ci Nzaambi cike mu beeno.

¹⁵ Wun'viipë ve mu beeno wumonë simpasi buke n'voondi, mwiifi, civadë-mbi kaambofo mu kukotë mu maambu mënganë.

¹⁶ Kasi ningë wun'viipë wumonë simpasi cibilë naandi citamaanë, we leembu kumonë sonyi. Tiilyoko kwe toondë Nzaambi mu kunatë lizinë be lyoolyo.

¹⁷ Ntaangu yakufwaanë yo lufundusu lun'toninë mu n'zo-Nzaambi. Obo ningë lufundusu lun'toninë ntetë mu beeso, buni bëm'beelë ku siitu mu banë bëkaambu kuta maanë mu Mpolu Mboti yi Nzaambi?

¹⁸ Lisonëmë : « Ningë ti butudë beenë mu kuvuuci muutu wusulëmë, buni bëm'beelë mu Civadë-mbi i mu n'sumucye? »

¹⁹ Mu lyaawu, banë bëm'monë simpasi mu n'vwiilu Nzaambi, bëbweelë kusalilë liboti i kuyilekulë baveekë mu myooko yi N'vaanji buloongo, wusulëmë mu tukanyu twaandi.