1 Pyeelë 3 - N’KANGULU WUMOONË

Bëcyeetu i bënuni

¹ Benuviinu bëcyeetu, lwe cinzikaanu bënuni biinu, bwiinji mooti wun'viipë mu baawu kusë n'ta maanë ko mu libuungu li Nzaambi, mu ndyatulwiinu, bwiinji bëba yi ciminu. Mëbuungu miinu misë m'ba kwaandi n'ciinzë ko.

² Civiimbë baawu kumonë ndyatulwiinu buni yi lyoomë i yicinzëmë.

³ Nutoombyaanu ko lunyeefunu lu nyitu, dedë mweekë lubindulu lu mileenjiinu, bilungë bi woolë kaambofo binkutu bi bukaalu.

⁴ Tiilyoko toombaanu lunyeefunu lu n'timë, n'saangë ndecikë wukaambu kudiifë wu ciluunzi ci mëleembë i ci butëmë, cike bukaalu bunenë fë meeso më Nzaambi.

⁵ Ntaangu be sisina, bwaawu buyabilë n'saangë bëcyeetu bëzitëmë, bëtuulë civuufu mu Nzaambi. Baawu bëlëcinzikë bënuni baawu,

⁶ dedë mweekë, cifwaani ci n'cyeetu bëlëteelë Sala wulëcinzikaangë n'nunyaandi Abalaamë i wulën'telaangë « Fumwaami ». Benuviinu cyelikë baanë baandi bë bëcyeetu, mooti luke mu kuvaangë liboti lusë m'ba yi boomë ko mu cyosuku ciimë.

⁷ Benuviinu bëbakëlë, zingilaanu yimunë bëkasi biinu, mu kuzaabë ti baawu bëdekë. Bësasyaanu mu luciinzu looso, cibilë baawu bëfwenikini kutambulë yimunë beeno likabu li luziingu lu cyelikë kuke Nzaambi. Vangilaanu boobo bwiinji cin'velë ve ciluvangisi cikaku mu misaambwiinu.

Kumonë simpasi mu liboti tun'vaangë

⁸ Oboobo, baanu benubooso simbalulu si mweekë i n'vwiilu wumweekë. Lwe zolësënaanu dedë mweekë baanë bë nguli, kalilaanu mu mëboti i mu bubonzulu benuveekë yi benuveekë.

⁹ Nuvutulilyaanu ko libi mu libi, cifiingu mu cifiingu. Tiilyoko, sakumunaanu, cibilë lwaawu lusakumunu lunë Nzaambi wulukanyi bunë naandi kulutelilë.

¹⁰ Licyelikë, talaanu manë mësonëmë : « Wunë wun'toombë kuziingë luziingu luboti i kumonë bilumbu bi nyeenzi, wufwenikini kuleembu kusuungë i kupuutë.

¹¹ Naandi wufwenikini kubotukë mu libi, mu kusalilë liboti, i kutoombë n'sikë yimunë lutatumunu.

¹² Cibilë meeso mu Fumu mëke ke bo bësulëmë, wubelëminë mu kuwu misaambwaawu. Kasi Fumu wum'maangë banë bën'vaangaangë libi. »

¹³ Nani wuluvaangë libi ningë beeno luke buvavambë mu kuvaangë liboti?

¹⁴ Keti lulë monë simpasi cibilë beeno lusulëmë, luke mu nyeenzi. Keelaanu kuba yi boomë mu baatu bëmesë i keelaanu kuba yekësë-yekësë.

¹⁵ Kasi, zanjikaanu Kliistu mu mitimiinu dedë mweekë Fumwiinu. Bëlëminaanu, mu kuyikakulë fanë bululoombilë cimbaanji ci civuufu ciinu.

¹⁶ Kasi vangilaanu lyaawu mu mëleembë i luciinzu. Lwe baanu simbalulu silyoomë bwiinji bo bëlusuungë mu nyendulwiinu yi mboti bëfwa sonyi mu tusuungu twaawu.

¹⁷ Kasi mëyoolë kumonë simpasi mu kuvaangë liboti, mooti bwa bukeeli n'vwiilu Nzaambi, kaambofo mu kuvaangë libi.

¹⁸ Licyelikë, Kliistu naveekë wumonë simpasi vyaasi mweekë cimëkulu mu mësumu më baatu, naandi wabë mpeembi yi mpeeso, wufwiilë mu bivadë-mbi bwiinji wubënatë ke Nzaambi. Naandi bën'voondë, kasi Ciluunzi ci Saantu cin'vulumunë.

¹⁹ Mati mu lyaawu, naandi wuyendë mu kuloongë biluunzi byabë bikangëmë,

²⁰ banë bëmaangë kuwulu Nzaambi ntaangu ntamë babë simbeenyi syaandi, bunë naandi wulëciingaangë tee ntaangu yo Nowee kulë tungilaangë likuumbi. Mpooko baatu, naanë kwaandi tokë bëkotë mu likuumbi i bëvuukë mu masi.

²¹ Cyaawu cyabë cifwaani ci lubatizyaalu cinë ciluvuuci buyifanwabu. Cyawaaci cisë n'sukulë ko mësumu më nyitu kasi mu kuloombë ke Nzaambi mbalulu yi lyoomë. Naandi wuluvuuci mu mëkanë më luvulumuku lu Yeesu Kliistu,

²² wunë wuyendë ku yilu i wusë vwaandë ku mëbakëlë më Nzaambi, kunë naandi wun'tumi siyaanzi i tutumu tumesi i tuleendo tu yilu.