1 Pyeelë 2 - N’KANGULU WUMOONË

Limanyi li moonyi i mboongu yi saantu

¹ Lwe bumyaanu bubaalu, lupuutu, bumpilë-mpiipi, likwaafi i tusuungu.

² Dedë mweekë baanë bëndeenji, lwe baanu nzalë mëdeveenë më cimpeefë i mëlyoomë, bwiinji, bunë beeno lumënwa, lun'kulë i lum'bakë luvukulu.

³ Licyelikë, « Beeno lwaviisi buboti bu Fumu. »

⁴ Lwe belëmyaanu Fumu, limanyi li moonyi, lyo baatu bëbumë, kasi lisoolu i limonikë bukaalu ke Nzaambi.

⁵ Lwe mboonjyaanu benuviinu ciikë, dedë mweekë ti mëmanyi më moonyi, mu n'tungulu n'zo-Nzaambi yi cimpeefë. Beeno lun'vaangë nkoongë singangë-Nzaambi siyituunvi mu Nzaambi. Beeno lukun'vaanë bivakuli bi cimpeefë bim'ba biboti mu Yeesu Kliistu.

⁶ Kasi talaanu mo mësonëmë : « Miinu yasoolë limanyi li bukaalu linë yin'tuulë buke limanyi linkumë ku Siyoonë. Wunë wukun'siilë lufyaatu wusë n'fwa sonyi ko. »

⁷ Limanyi be lyoolyo lim'ba liinji bukaalu mu beeno bitamaanë, kasi mu banë bëkaambu kuta maanë : « Limanyi lyo bituunji bë buumë lyacitukë limanyi linjiinji. »

⁸ Kun'ka, mu Libuuku li Nzaambi, bëtubooso: « Limanyi lin'vangisi baatu kutelumukë, Limanyi li ngooto lin'vangisi baatu kubwa. » Baatu obo bëtelumukë cibilë baawu bëmaangë kuvitikë libuungu li Nzaambi i mu lyalyooli baawu bësifu.

⁹ Kasi beeno likaandë lisoolu, singangë-Nzaambi si N'tinu, buloongo bulyoomë, mboongu yi Nzaambi. Naandi wulubotulë ku citoombi mu kulunatë ku cyeseesë cyaandi ciboti, bwiinji lutendulë mëvaangë maandi më kwaatë-yekë.

¹⁰ Mu civi-cikulu, beeno lusye ba mboongu yi Nzaambi ko, kasi fë bubwaafa, beeno lweekë mboongwaandi. Mu civi-cikulu beeno lukaambu kubakë bwalëkisi bu Nzaambi, kasi bubwayi aci bwaawu bwa luveewu.

Bo bufwenikini kuzingilë ciseelu ci Nzaambi

¹¹ Sindiku syaami yilë mu kululoombë, fë moongo butoto, beeno luli beeni i bëvyooci: Kebaanu mu bideenzë binsunyi binwanisi buutu bwiinu.

¹² Lwe baanu mëvaangë mëboti fë meeyi banë bëkaambu kuta maanë. Mu bwaawu, keti baawu bëlusuungë mu ke lutelaangë bivadë-mbi, baawu bën'zaabë mëvaangë miinu mëboti i mu kudumisi Nzaambi cilumbu cyo kun'kwisilë.

¹³ Mu cibilë ci Fumu, lwe baanu yi buleenvo mu losuku lutumu lu baatu: ke n'tinu wunë wuke lutumu luvyokililë baatu booso,

¹⁴ i ke bëkuluutu bë bwaalë, bëfilu ke naandi mu kufundisi bivadë-mbi i kutoondë bo bën'vaangë liboti.

¹⁵ Licyelikë, linë Nzaambi kuzolisi, mati luvaangaanu liboti bwiinji lukolikë bivuunji i bivulikini.

¹⁶ Zingilaanu dedë mweekë baatu bësyalulu. Vandi, lucitulyaanu ko lusyalulu lwiinu buke n'lelë wun'fukë libi, kasi lwe zingilyaanu dedë mweekë biseelu bi Nzaambi.

¹⁷ Cinzikaanu baatu bakë booso, zolaanu baanë yiinu bë nguli mu ciminu, kuundaanu Nzaambi, cinzikaanu fumu-lwaangu.

Cifwaani ci simpasi si Kliistu

¹⁸ Biseelu, lwe cinzikaanu bëkuluutu biinu yi luciinzu lwakë looso, yaaku tokë ti mu banë bëke buboti i bësulëmë, kasi yivaandi mu banë bëke yi bubaalu.

¹⁹ Licyelikë, mati liboti mu ciimbë moonyi mu simpasi lulë mu kumonë mu buunë kwaandi, cibilë beeno luke sisu mu Nzaambi.

²⁰ Mu lyaawu, ndaandu mbici lum'bakë mu kuciimbë moonyi mu bifusi lun'taambulë ningë lube vaangë libi? Kasi ningë ti beeno lube vitikë kumonë simpasi mu liboti luvangisi, lyaawu liboti fë meeso më Nzaambi.

²¹ Mu lya lyoolyo mwanaandi kulutelilë, cibilë naveekë Kliistu wumonë simpasi mu beeno. Naandi wusë lubikilë cifwaani bwiinji lulaandë sintaambi syaandi.

²² Naandi wusye vaangë lisumu ko, lupuutu ve lubasikë mu munwaandi.

²³ Bunë ban'fiinji, naandi sye vutulë cifiingu ko, bunë ban'vaanji simpasi naandi sye tunzëkënë ko, kasi wuyilekulë ke Nzaambi wun'fundisyaangë yimunë n'sulumunu.

²⁴ Mu nyitwaandi naveekë, wunatë mësumu miitu fë kuluusu, bwiinji beeso tufwa mu linë lin'talë lisumu i beeso tuzingilë mu luziingu lusulëmë. Mu simbumë syaandi mwaawu beeno lwabë lubelukilë.

²⁵ Cibilë beeno lwabë buke mëmemë mëzimbilë, kasi bubwayi aci, beeno luvutukënë ke awu wuke n'liiciinu i naandi wulë mu ke lukeelaangë.