1 Pyeelë 1 - N’KANGULU WUMOONË

Sibweekë

¹ Pyeelë, m'bunzi wu Yeesu Kliistu. Ke banë Nzaambi kwasoolë i ke bo bën'zingilaangë mu si bweeni, bënyambë mu mëbweeti më Poontë, ku Ngalati, ku Kapadoosë, ku Aziiya i ku Bitiinë.

² Nzaambi Taatë, walusoolë bunë bufwenikini mu n'vwiilwaandi kuzitikë ntamë. Naandi wulutuulë ku nteku, mu cyeesi ci Ciluunzi ci Saantu bwiinji beeno luba sisu mu Yeesu Kliistu i lwe ba lulyoomë mu meengë maandi. Muulë i n'sikë biluveewu yinë lunduu.

Civuufu ci moonyi

³ Dumisyaanu Nzaambi, Taatë yi Fumwiitu Yeesu Kliistu! Mu cyaali cyaandi cinenë, naandi watuvangisi kubutu mu luziingu lumoonë, mu kuvulumunë Yeesu Kliistu mu nkoongë bëfwa. Mu bwaawu, tuke yi civuufu ci moonyi,

⁴ mu kuviingë mëboti manë Nzaambi kulundilë ke baandi kusoolë. Mëboti be moomo mën'kaambu kunyambëkënë, kaambofo kuvotëkënë suusi, ketë kudiifë. Nzaambi wuluswekilë maawu ku mëyilu,

⁵ ke beeno luleendo lwaandi yin'lundilë ciminu mu cibilë ci luvukulu, lubeliminë mëlookë wuzabukunu fë siitu sintaangu.

⁶ Mu lyaawu beeno luke mu liyaanji, keti buyifanwabu lulë ba mu cyuundë, mu mwa ntaangu, mu yosuku mpilë lunyokulu.

⁷ N'lembuko woolë, yin'difaangë mooti bayitulë ku mbaasu. Mpilë mweekë ciminu ciinu, ciinji bukaalu yi woolë, yiyoku bwiinji bëbakulë bukaalu bwaandi. Mu bwaawu beeno lum'podi kutambulë ndumu, bumpumu i luzanjiku bunë Yeesu Kliistu wun'kwisilë.

⁸ Beeno lun'zolisi, keti lulë kaambu kum'monë, lwata maanë mu naandi, keti lusë kube m'monë ko. Mati mu lyaawu, beeno lun'kalilë mu liyaanji i bumpumu bun'kaambu mëtubulu.

⁹ Cibilë beeno lum'bakë n'seendo ciminu ciinu fë siitu: luvukulu lwiinu.

¹⁰ Mibici bisë cyengululë i bësaandë mëbuuku mu lyaambu li luvukulu be luulu i baawu bisë bike mu cibilë ci likabu lyo Nzaambi kube bëlikilë.

¹¹ Baawu bisë vaangë mëngolo mu kubakulë teepu mbici i mu luvoto mbici bin'leesi simpangulu siveewu ke Ciluunzi ci Kliistu. Cibilë ti Ciluunzi be cyoocyo cin'leesi mu baawu, wutendulë ntetë simpasi sinë Kliistu kulëmonë i bumpumu bunë bum'ba bwaandi i bun'kwisë.

¹² Nzaambi wuzabikini kuke mibici ti saangu yo baawu bëtambulë mu kutendulë yisye ba mu baveekë ko, kasi mu beeno. Saangu be yooyi yiluveewu buyifanu ke miloonji yi Mpolu Mboti, baawu bëtubilë yimunë mëngolo më Ciluunzi ci Saantu cifuminë ku yilu. Siyaanzi baveekë bisë ciisi kun'zaabë.

M'bilë mu kukalilë mu luziingu lulyoomë

¹³ Mu lyaawu, kalaanu bëbeliminë mu kusalë, baanu bëtyemunë. Tulaanu civuufu ciinu mu likabu lyo Yeesu Kliistu wuluvaanë bunë kun'kwisilë.

¹⁴ Cinzikaanu Nzaambi i leembwaanu kulaandë binvweenvu biinu bi ntamë, fanë lwabë mu bunzimbu.

¹⁵ Kasi, lwe baanu bëlyoomë mu sin'kalulu siinu, dedë mweekë Nzaambi wo wulutelë wuke wulyoomë.

¹⁶ Licyelikë, Lisonëmë : « Lwe baanu lulyoomë, cibilë miinu yi lyoomë. »

¹⁷ Mu misaambwiinu, lun'vanaangë lizinë li Taatë ke Nzaambi wo wun'fundisyaangë baatu bakë booso bunë bufwenikini, mu manë kadë muutu wuvangisi. Mu lyaawu, mu ntaangu yo yalusyaalë mu kuziingë fë moongo butoto, nyendulwiinu yin'leesi boomë bwiinu ke naandi.

¹⁸ Mu bwaawu beeno luzabisi, mu luvunu mbici beeno luvukilë mu zingulwiinu yi bulalawu yinë sinkaakë siinu bëluvaanë. Yaaku ti mu biimë binyungulu, dedë mweekë simboongo kaambofo woolë.

¹⁹ Moniko, beeno luvukilë mu meengë më bukaalu më Kliistu, wo bëvakulë buke limemë likaambu libi i litonë ve.

²⁰ Nzaambi wutiisi ti, Kliistu wun'vakulu ntetë buloongo kuvangënë i naandi wuleesi mu liboti liinu mu ntaangu be siisi si siitu.

²¹ Mu naandi, beeno luta maanë mu Nzaambi wo wun'vulumunë mu nkoongë bëfwa i wun'vaanë bumpumu, mu bwaawu beeno lun'tuulë ciminu ciinu i civuufu ciinu mu Nzaambi.

²² Beeno lwalyoomë bo lwacikunë cyelikë, mu kuzolësënaanu cyelikë dedë mweekë baanë bë nguli. Mu lyaawu zolësënaanu yin'zaci yooso benuveekë i benuveekë, yi n'timë wulyoomë.

²³ Licyelikë, beeno lwabutu buntukulu yimoonë, yaaku ti baatu bën'fwa cilumbu, kasi mu cibilë ci cikunu cin'kaambu kufwa i mu cibilë ci libuungu li moonyi li sakë yi sakë li Nzaambi.

²⁴ Cibilë bësonikë mu Libuuku li Nzaambi: « Baatu bakë booso bëke bo buke citiiti i bumpumu bwaawu booso buke citeekë mu sisolë: Citiiti kuumë i citeekë kubwa,

²⁵ kasi libuungu li Fumu lin'kalilë sakë yi sakë. » Kosuku, libuungu beenë, Mpolu Mboti yinë bëyilutendulilë.