1 Koleentë 9 - N’KANGULU WUMOONË

Miswa i bisalu bi m'bunzi

¹ Miinu yisye syalulu kwe? Miinu yisë m'bunzi kwe? Miinu yisye monë Yeesu Fumwiitu kwe? Beeno lusë likuundi mu cisalu cyaami ci Fumu kwe?

² Keti ningë bën'ka bëlë mu kumaangë ti miinu m'bunzi, mu beeno miinu yilë m'bunzi. Licyelikë, cibilë beeno lubundunu yi Fumu, benuveekë mbaanji ti miinu m'bunzi.

³ Talaanu bunë yilë mu kuyikakulilë ke banë bëlë mu kun'tubilë simbi :

⁴ Mu cisalu cyaami, miinu yikeeli yi n'swa ko mu kubakë cikulya yi cikunwa?

⁵ Tukeeli yi n'swa ko mu kunatë yiitu n'cyeetu citamaanë, bo bën'silaangë mimbunzi, baanë bë nguli bë Fumu i Pyeelë?

⁶ Kaambofo, beeso tokë twasooci, Balënabaasë yi miinu mu kusalë bwiinji tubakë luziingu lwiitu?

⁷ Lisodaadi mbici lin'salaangë mu kufutë mbakë cisalu cyaandi? Cikunë viinyi kusë n'lyaangaangë mëkuundi më solaandi kwe? N'luungë ngoombi kusë n'nwangaangë mëdeveenë më bibulu byaandi kwe?

⁸ Kasi yisë m'boongë tokë bifwaani bi luziingu bi kadë ntaangu ko cibilë n'kaakë Moyiizë wun'tubilë bo bumweekë.

⁹ Licyelikë bësonikë mu n'kaakë be woowo: « Beeno kupodi ve kukaangë munu ngoombi yilë mu kufundubulë lungeenzë. » Nzaambi ke yi lusweenu mu singoombi?

¹⁰ Licyelikë mu beeso kwe kulë mu kutubilë kati obwe? Licyelikë libuungu be lyoolyo lisoniminë mu beeso. Bufwenikini ti, wunë wun'vatë i wunë wun'kucikë lungeenzë bëlivangilë yimunë civuufu mu kubakë cyaawu cikuuku.

¹¹ Beeso twakunë mu beeno cikunu ci cimpeefë : Mu boobo, libi mu beeso mu kubakë cikuuku ci bikunë biinu?

¹² Ningë ti bën'ka bëke yi n'swa mu beeno, besuviitu tukeeli ko yi n'swa be woowe? Mu boobo, beeso tusye vaangë buumë ko mu kusiilë kati obo. Tiilyoko, tuvitikë makë mooso mu kumaangë kuvaangë cikaku mu lutendululu lu Mpolu Mboti yi Kliistu.

¹³ Beeno luzabisi buboti ti banë bëke mu kusalë mu n'zo-Nzaambi bëm'bakilë yaawu ndiiwu mu n'zo-Nzaambi i banë bën'kwindulë mëkabu fë civakulu bëm'bakë cyaawu cikuuku mu mëkabu be moomo.

¹⁴ Bo bumweekë Fumu wuvaanë n'swa ke banë bën'tendulë Mpolu Mboti bëzingilë mu cisalu be cyooci.

¹⁵ Kasi, yisye salilë mu yosuku miswa be yooyi ko i miinu yisë n'sonikë ko lyalyooli mu kuloombë mu kuyibakë. Mëyoolë miinu kufwa! Fëkeeli muutu ko wukum'botulë lunyemu mu cikumë be cyooci!

¹⁶ Miinu yisë yinyemi ko mu kutendulë Mpolu Mboti. Mati cyelikë lukaciku mu miinu i kasi lusifu ke miinu ningë yisye tendulu ko Mpolu Mboti.

¹⁷ Ningë minuveekë yisoolë cisalu be cyooci, yim'bakë futë. Kasi mu cibilë cyaawu bëkun'kacikë, yavangilë tokë bo bën'lombilë cisalu cinë bëkum'paanë.

¹⁸ Boobo futaami yinye? Mati nyeenzi mu kutendulë buunë Mpolu Mboti, kukaambu kulandilë miswa yinë yikum'paanë lutendulu yi Mpolu Mboti be yooyi.

¹⁹ Miinu yisyalulu, yikeeli ko n'dongo muutu. Kasi miinu yiyicitulë n'dongo mu bakë booso bwiinji yibëbakë mpaapë mu Kliistu.

²⁰ Bo yike fë meeyi Sizwiifë, miinu kuzingilë buke Zwiifë, bwiinji yibëbakë. Keti yilë kaambu kuba mu lutumu lu n'kaakë Moyiizë, miinu yin'zingilë bunë yiyabilë dedë mweekë banë bëke mu lutumu lu n'kaakë beenë, bwiinji yibëbakë.

²¹ Bo bumweekë, bunë yikeeli yimunë bo bën'ziimbë n'kaakë Moyiizë, miinu yin'zingilë bo bëke baawu, kulengilë ve moonyi mu n'kaakë be woowo, bwiinji yibëbakë. Lya lyooli lisë n'tubë ko ti miinu yisë n'lengilë moonyi ko mu n'kaakë Nzaambi, cibilë miinu yike mu lutumu lu n'kaakë Kliistu.

²² Yimunë bo bëkaambu kuciindë mu ciminu, yizingilë buke ti miveekë sye ciindë ko, bwiinji yibëbakë. Oboobo yilë mu kuvaangë buumë mu bakë booso mu kuvuuci mu nteku yooso bën'ka.

²³ Miinu yivaangë makë mooso omo mu cibilë ci Mpolu Mboti, bwiinji yibakë cikuuku mu mëboti manë naandi kukanyi.

²⁴ Beeno luzabisi buboti ti banë bën'dumaangë ntiinu ku cingandë bëm'bangaangë mpaapë, kasi muutu mweekë too wum'bakaangë futë. Mu lyalyooli, benuviinu, dumaanu ntiinu bwiinji lubakë futë.

²⁵ Baatu booso bën'dumaangë ntiinu bën'vitikaangë n'naku wufwenikini. Baawu bëlivangaangë mu kubakë n'seendo wukaambu ndaandu. Kasi beeso tulivangilaangë mu kubakë n'seendo wukaambu më manunu.

²⁶ Mati bwaawu, miinu yilë mu kudumë ntiinu ciswiisi fë siitu. Mati bwaawu yikeeli buke cinwaanyi cin'kaambu kuyukë sinkomi bosuku.

²⁷ Miinu yilë mu kuvangisi nyitwaami simpasi i yilë mu kuyikeelë buni bufwenikini mu kumaangë kubiindu n'seendo fë mbusë kuloongë bëmesë.