1 Koleentë 8 - N’KANGULU WUMOONË

Mbisi meengë yivakulu ke sinkosi

¹ Twe bilyaanoobo buyifanwabu lyaambu li mbisi meengë yivakulu ke sinkosi : licyelikë ti « Beeso booso tuke yi luzaabu », bo beeno lulë mu kutubilë. Kasi luzaabu be loolo lun'vangisi muutu kuba yi lunaangu, vandi luzolo lun'ciinzyaangë cinguuku.

² Wunë wum'balë ti naandi wuzabisi, yibuunu kuzaabë buni bufwenikini.

³ Kasi wunë be zolë Nzaambi, wuzabukunu ke naandi.

⁴ Cyuufu cyaawaaci : podi kwaandi kulya mbisi meengë yin'fuminë mu bivakuli bi sinkosi? Beeso tuzabisi ti nkosi yisë n'leesi cin'velë ko ci cyelikë mu buloongo i yilë Nzaambi mweeke vwiili.

⁵ Keti bulë ba ti bën'viipë bën'tubë baawu sinzaambi ku yilu yi fë moongë butoto – i cyelikë, fëkeeli mpaapë « Sinzaambi » i « Sifumu » –

⁶ Kasi mu beeso, keeli Nzaambi mweekë tokë, Taatë, wunë wuvaangë byakë byooso i wunë beeso tulë mu kuzingilë. Yikeeli yivaandi Fumu mweekë tokë, Yeesu Kliistu, mu wunë byakë byooso bikeeli i mu naandi tulë mu kuzingilë.

⁷ Kasi bakë booso bësye zaabë ko cyelikë be cyooci. Bën'ka bëyukë kukuundë sinkosi, buyifanwabu yivaandi, baawu bëlë mu kulya mbisi meengë bëvakulë buke yaawu yibakunu ke nkosi. Mbalulwaawu yidekë i baawu bësumukë mu mbisi meengë be yooyi.

⁸ Yaawu yikeeli ko ndiiwu yinë mba yitubelikë fëke Nzaambi : beeso tusë n'kaambu cin'velë ningë tusye yilya ko, i tusë m'bakë cin'velë ko ningë beeso tube yilya.

⁹ Oboobo, keelaanu lusyalulu lunë beeno lulë mu kusalilë lulënatë ku buzimbu banë bëkaambu kuciindë mu ciminu.

¹⁰ Licyelikë, ningë wun'viipë wudekë wulë mu kukumonë, njeeyi wuke « Luzaabu », kulilë mu n'zo sinkosi, wun'ciindë mu mbalulwaandi ko mu kukumonë kulya mbisi meengë yivakulu ke sinkosi?

¹¹ Bwa boobo, mwaanë nguli, wunë wukaambu kuciindë, wunë Kliistu wufwiilë mu cibilë cyaandi, wun'lalëkënë mu cibilë ci « Buzaabu » lwaaku!

¹² Mu n'sumukunu yi mpilë oyo mu baanë bë nguli yike lwasyaangë mbalulwaawu yikambusu kuciindë, beeno lun'sumukë fë nduunzi Kliistu.

¹³ Mati mu bwaawu, ningë ke ndiiwu yin'natë mwaanë nguli mu bunzimbu, kanuku-n'to yisë be yilyooso ko mbisi meengë bwiinji yileembu kunatë mwaanë nguli ku bunzimbu.