1 Koleentë 7 - N’KANGULU WUMOONË

Maambu mën'talë likweelë

¹ Twe bilyaanoobo buyifanwabu maambu mo lukun'sonikinë mu n'kaandiinu. Liboti mu libakëlë kuleembu kukweelë.

² Vandi kasi, mu cibilë ci busafu bwanyambë, mëyoolë ti, kadë libakëlë kuba yi n'kasyaandi i kadë n'cyeetu kuba yi n'nunyaandi.

³ N'nuni fwenikini kuvaangë cisalu cyaandi ci bununi fë meeso më n'kasyaandi i n'cyeetu yivaandi fwenikini kuvaangë cisalu cyaandi fë meeso më n'nunyaandi.

⁴ N'kasi kupodi ve kuvaangë linë kuzolisi mu nyitwaandi, yaawu yike yi n'nunyaandi. Mpilë mweekë, n'nuni kupodi ve kuvaangë linë kuzolisi mu nyitwaandi: yaawu yike yi n'kasyaandi.

⁵ Numaangësënyaanu ko, kanuku tokë ningë lube kuwusënë, lun'siilë katiboobo mu mwa ntaangu bwiinji luyivandikë mu lusaambulu. Vandi kasi, lwe vutulyaanu luziingu lu n'kasi i n'nuni lufwenikini, mu kuleembu Satënë kulubwiisi mu lisokë, cibilë lusë m'podi ko kuvidë-moonyi.

⁶ Linë yilë mu kulukaambë ali, lisë lutumu kuve, kasi ndoonji.

⁷ Licyelikë, yin'tiisi ti bakë booso bëleembu kukweelë buke miinu. Kasi kadi muutu wuke likabu lyaandi linë Nzaambi kun'vaanë, awu likabu ali, wun'ka likabu aliili.

⁸ Talaanu manë yin'loombë ke bo bëkaambu kukweelë i ke bëfwiili : Liboti ti, beeno mu kuzingilë mu bumputë bo buke miinu.

⁹ Vandi kasi, ningë lusë m'podi ko kuvidë-moonyi, lwe kweelyaanu: mëyoolë kukweelë yikukalilë mu bideenzë.

¹⁰ Ke bo bëkweelë, yin'vaanë lutumu alu (lusye fuminë ke miinu ko, kasi ke Fumu) : N'cyeetu wusye fwanëkënë ko kukabukë yi n'nunyaandi,

¹¹ – ningë n'cyeetu bëkabukë, naandi kube kweelë ve, kaambofo, naandi kuvutulë N'kangulu yimunë n'nunyaandi – i n'nuni sye fwanëkënë ko kubotulë n'kasyaandi.

¹² Ke bëmesë, yuwaano mo yin'tubë (miveekë, i yaaku ti Fumu): ningë citamaanë wuke yi n'kasi wukaambu kuta maanë i naandi wuzolisi kuziingë yaandi, naandi wusye fwanëkënë ko kum'botulë.

¹³ Mpilë mweekë, ningë citamaanë cike yi n'nuni wukaambu kuta maanë i naandi wuzolisi kuziingë yaandi, naandi sye fwanëkënë ko kum'maangë.

¹⁴ Licyelikë, n'nuni wukaambusu citamaanë, wubelëmë yi Nzaambi mu cibilë ci cintwaali cyaandi yimunë n'kasyaandi. Mpilë mweekë, n'cyeetu wukaambusu citamaanë wubelëmë yi Nzaambi mu cibilë ci cintwaali cyaandi yimunë n'nunyaandi citamaanë. Ningë boobo ko, baanë biinu bisë n'lyoomë ko. Kosuku, cyelikë baawu bëke sisaantu.

¹⁵ Mu lyalyooli, ningë ti wunë wukaambusu citamaanë wun'toombë kukabukë yimunë wayaandi citamaanë, keti wulë ba n'nuni kaambofo n'kasi, naandi wasyalulu, cibilë Nzaambi wulutelë mu kuzingilë mu n'sikë.

¹⁶ Buni njeeyi n'cyeetu citamaanë wum'podi kuba yi lufyaatu lu kuvuuci n'nunyaaku? Kaambofo, buni njeeyi n'nuni citamaanë wum'podi kuba yi lufyaatu lu kuvuuci n'kasyaaku?

Kuzingilë bo Nzaambi kulutelilë

¹⁷ Mu lyalyooli, kadë muutu fwenikini kuzingilë mu likabu linë Nzaambi kun'vaanë i bo kubeelë bunë Nzaambi kun'telilë. Lya lyooli likomëni miinu yivaanë mu bingangë byooso.

¹⁸ Ningë libakëlë wubuku bubakëlë bwaandi bunë Nzaambi kun'telë, naandi kupodi ve kusweekë lubukulu lu bubakëlë bwaandi. Ningë wun'ka wusye buku bubakëlë ko fanë Nzaambi kun'telilë, naandi sye fwaanë ko kubukë bubakëlë.

¹⁹ Kubukë bubakëlë kaambofo kukaambu kubuku, fëkeeli n'ciinzë ko: linë like n'ciinzë, mati kucinzikë tutumu tu Nzaambi.

²⁰ Bufwenikini ti kadë muutu kuzingilë bo kuyabilë bunë Nzaambi kun'telilë.

²¹ Njeeyi wabë n'dongo bunë Nzaambi wukutele? Mu lyalyooli, leembu kukalilë mu lusweenu. Kasi ningë luvoto lube monikë mu njeeyi mu kusyalulu, we livaanji.

²² Cibilë n'dongo wunë wabë wutelu ke Fumu wuli muutu wusyalulu wuke mu n'swa Fumu. Mpilë mweekë, muutu wusyalulu wutelu ke Kliistu wuke n'dongwaandi.

²³ Nzaambi waluvuuci mu luvunu lu bukaalu. Keelaanu lulë ba bëndongo bë baatu.

²⁴ Cibeeni, baanë bë nguli, lufwenikini kadë muutu kuzingilë bo kuyabilë bunë Nzaambi kun'telilë.

Lyaambu lin'talë baatu bëkaambu kukweelë i bëfwiili

²⁵ Mu linë lin'talë baatu bëkaambu kukweelë, yisye bakë lutumu lu Fumu ko. Kasi yin'vaanë yaami mbalulu yi muutu wunë wuke yi muulë i liboti li Fumu, wunë bën'siilë lufyaatu.

²⁶ Mu cibilë ci lukaciku lu bubwayi, tala linë miinu yim'balë: liboti mu kadë muutu mu kuzingilë bo naandi kukelili.

²⁷ Njeeyi ke yi n'kasi? Oboobo, kebë kutoombë kutyamunë N'kangulu. Njeeyi wusye kweelë kwe? Mu lyaawu, leembu kutubë n'cyeetu.

²⁸ I ningë bëkweelë wusë n'vaangë lisumu ko. Ningë nduumbë n'cyeetu yin'kweelë, naandi wusë n'vaangë lisumu ko. Kasi, banë bën'kweelë, bëm'monë binkuungë mu luziingu lwaawu lu kadë cilumbu, i miinu yin'toombë kuluyakini.

²⁹ Talaanu baanë bë nguli, linë yakulukaambë: ntaangu yeekë yin'cyo. Buyifanwabu, bëbakëlë bëkweelë bëfwenikini kuzingilë buke bëbakëlë bëmputë.

³⁰ Banë bën'lilë, buke ti bisë n'lilë ko, banë bëke mu liyaanji buke ti bisë mu liyaanji ko, bo bëlë mu kusuumbë buke baawu bëkeeli ko yi cinë bën'suumbë,

³¹ bo bëm'monë sinyeenzi si buloongo dedë mweekë ti bëm'kaambu kuviisi kusimonë. Cibilë ti buloongo be buubu kusë bun'ziingë mpaapë mitoonë ko.

³² Miinu yizolisi ti beeno luba lusyalulu mu losuku lusweenu. Wunë wukaambu kukweelë kwe lengilë moonyi mu maambu më Fumu, naandi wun'toombë kutoonzi Fumu.

³³ Kasi wunë wukweelë wulengilë moonyi mu maambu më buloongo, naandi wun'toombë kutoonzi n'kasyaandi,

³⁴ i bwa boobo naandi weekë fë meeyi miciinzë wali. Mpilë mweekë, n'cyeetu wukaambu kukweelë kaambofo cilesi ci n'cyeetu wulengilë moonyi mu maambu më Fumu, bwiindi wuba wulyoomë mu nyitu i mi ciluunzi. Wunë wukweelë wun'lengilë moonyi mu maambu më buloongo, wun'toombë kutoonzi n'nunyaandi.

³⁵ Miinu yin'tubilë lyalyooli mu mbotiinu yaaku ti mu kulukacikë. Miinu yin'zolë ti beeno luvaangë linë lifwenikini buboti, lukangiminë mu cisalu ci Fumu.

³⁶ Buyifanwabu, ningë cilesi cibakëlë wum'balë ti naandi wulë mu kuvaangë libi ke wunë kwabilë kukweelë i kun'kweelë ve, ningë naandi wuke n'ciinzë wunenë i wun'zolë ti baawu bëkweelë, liboti, baawu bëkweelë, bo naandi kun'zolilë. Naandi wusë n'vaangë lisumu ko.

³⁷ Oboobo, ningë cilesi bakalë, sye bakë n'kacikë ko, naandi waboongë lukanyu lukumaangë kukweelë, ningë naandi wuke yi likanë mu kukaangë n'timë mu kuleembu kubuundë ciikë yimunë n'cyeetu kwabilë kukweelë, naandi wun'vaangë liboti.

³⁸ Bwaawu, wunë wun'kweelë n'cyeetu kwabilë wun'vaangë liboti, kasi wunë wum'biikë kukweelë wun'vaangë liboti beenë.

³⁹ N'cyeetu waziingë mpaapë bilumbu yi n'nunyaandi, mooti n'nunyaandi wafwa naandi wasyalulu, mu kukweelë wunë kuzolisi, bufwenikini ti lyaawu kuba likweelë li bitamaanë.

⁴⁰ Oboobo, wum'ba mu nyeenzi, ningë kubëkalilë bo kukelili. Mati oyo yaami mbalulu i mivaami yim'balë yike yivaandi Ciluunzi ci Nzaambi.