1 Koleentë 6 - N’KANGULU WUMOONË

Tufundusu tun'talë baanë bë nguli

¹ Bunë wumweekë mu beeno wun'fidënë mpakë yimunë mwanaandi nguli, kwisilë buni naandi kuloombë lufundusu kuke sinzoonzi sikaambu kuzaabë Nzaambi, nkanë kweendë kuke sisaantu?

² Lusye zaabaanu ko ti mboongu yi Nzaambi mba yin'fundisi buloongo? Ningë beeno lufwenikini kufundisi buloongo, lukeeli ko yi mëkanë mu kufundisi maambu mëkaambu nteende?

³ Nusye zaabë ko ti beeso tun'fundisi siyaanzye? Yiveko maambu më luziingu be luulu!

⁴ Kosuku, bunë lum'ba yi simpakë mu maambu më mpilë oyo, beeno lum'boongë buke sinzoonzi baatu kwaandi vwiili mu Cingangë!

⁵ Miinu yilitubë mu soniinu. Cyelikë luke muutu mu nkoongiinu wu bungelë wufwenikini kululikë simpakë si baanë bë nguli!

⁶ Oboobo, mwaanë nguli be fwaanë kufundësënë yimunë mwanaandi nguli wun'ka i lyalyooli fë ntwaalë sinzoonzi sikaambu kuzaabë Nzaambi?

⁷ Licyelikë, lyaambu li kufundësënë benuveekë lin'leesi ti beeno lwabwa n'duumbë. Cibilë-mbici lun'kaambu kuvidilë n'timë mu m'besi? Cibilë-mbici beeno lun'kaambu kuvitikë bëluvokënë byo lubakisi?

⁸ Tiilyoko, mati beeno lun'salilaangë mëbi i lun'vokënë i beeno lun'silaangë kati boobo ke baanë bë nguli!

⁹ Beeno luzabisi cyelikë ti bo bën'vaangaangë libi bë kusë m'bakë ciikë ko ku Lwaangu lu Nzaambi. Nuyipuutyaanu ko : baatu bë kuvaalë, bën'kuundë sinkosi, bën'vaalaangë, bëbakëlë bën'kwelësënaangë,

¹⁰ miifi, bangë n'soci, bikolë-mbuungu, bisuungë baatu, kaambofo bëkaambu kucinzëmë, bë kusë m'bakë ciikë kuve ku Lwaangu lu Nzaambi.

¹¹ Bwa boobo bwa bëbeelë bëmesë babë mu nkoongiinu. Kasi beeno lwabë lwalyoomë, lwabë lwatuunvu, lwabë lwasulëmë fë nduunzi Nzaambi mu lizinë li Fumu Yeesu Kliistu i mu Ciluunzi ci Nzaambiitu.

Kuyivandikë mu cisalu ci bumpumu bu Fumu

¹² Beeno lulë mu kutubë : « Makë mooso mëke yi n'swa. » Cibeeni, kasi makë mooso mëkeeli ko mëboti beenë. Yim'podi kutubë : « Yike yi lutumu mu makë mooso », kasi miinu yisë n'citukë n'vikë mu cyosuku ko.

¹³ Beeno lun'tubë yivaandi : « Biliiwu bivangunu bi civumu i civumu civangunu mu biliiwu. » Mu lyalyooli, Nzaambi wun'tyamunë biliiwu i yivaandi civumu. Kasi nyitu muutu, yisye vangëninë ko mu busafu: Yaawu yivangëninë mu cibilë ci Fumu, i Fumu mu cibilë ci nyitu.

¹⁴ Nzaambi wuvulumunë Fumu i naandi wun'vulumunë besuviitu mu luleendo lwaandi.

¹⁵ Beeno luzabisi ti, sinyitu siinu binamë bi nyitu yi Kliistu. A buni, miinu yim'boongë cinamë ci nyitu yi Kliistu mu kuvangililë cindumbe? Kusë yim'balë ko!

¹⁶ Kaambofo, beeno lusye zaabë ko ti libakëlë lim'bundënë yi n'cyeetu nduumbë, weekë yimunë naandi nyitu mweeke? Busonëmë, licyelikë : « Babë bwaali bëm'ba nyitu mweekë. »

¹⁷ Kasi wunë wum'bundënë yimunë Fumu, wum'ba mu cimpeefë muutu mweekë yimunë naandi.

¹⁸ Tiinaanu busafu! Lyosuku lisumu lin'ka lin'vaangë muutu liyakënë yi nyitwaandi. Kasi muutu wunë wuyilekulë mu busafu, wun'vaangë lisumu mu nyitwaandi naveekë.

¹⁹ Nusye zaabaanu kwe ti sinyitu siinu, n'zo Ciluunzi ci Saantu, Ciluunzi be cyooci cike mu beeno i Nzaambi wuluvaanë? Sinyitu siinu sicili siinu ko :

²⁰ Nzaambi waluvuuci mu civiikë mu luvunu lu bukaalu. Lwe vandikaanu nyitwiinu mu cisalu ci bumpumu bu Nzaambi.