1 Koleentë 5 - N’KANGULU WUMOONË

Busafu mu Cingangë

¹ Bëlë mu kuwu mwaakë mooso ti busafu bweekë mu nkoongiinu, mpaapë busafu, keti bo bëkaambu kuta maanë bë kusë buvaangaangë ko: bëlë mu kutubë, licyelikë, ti wumweekë mu beeno wulë mu kubuundë ciikë yimunë n'kasi tataandi.

² Beeno lulë mu kuvaangë lunaangu! Beeno nkanë lube fwaanë kuba mu sonyi i muutu wuke yi mpilë mëvaangë omo nkanë wufwenikini kukulu mu nkoongiinu.

^3-4 Mu miinu, keti yilë cinaanu yi beeno mu nyitu, mu ciluunzi yike yiinu cintwaali. Miinu yafundisi, mu lizinë li Fumwiitu Yeesu, wunë wavaangë maambu mëbi më mpilë oyo, dedë ti miinu yabë yiinu cintwaali. Bunë beeno lum'bundënë, miinu yim'ba yiinu mu ciluunzi i luleendo lu Fumwiitu Yeesu lum'monikë.

⁵ Beeno lufwenikini kuvakulë muutu be woowo mu myooko yi Satënë, bwiinji nyitwaandi mësumu yinyambëkënë mu lufwa, kasi ciluunzi cyaandi civuukë mu cilumbu ci Fumu.

⁶ Busye fwanëkënë ko beeno kuvaangë lunyemu! Beeno lulizabisi buboti : « Mwa fwaati fë m'bweeli fë vangisi kufunisi muungë wooso. »

⁷ Lwe yilyomisyaanu! Botulaanu m'bweeli wuntamë, bwiinji luba dedë muungë wumoonë i wukaambu m'bweeli. Licyelikë beeno lweekë boobo kutatikilë fanë Kliistu limemë liitu li Paakë livakulu.

⁸ Boobo twe dumisyaanu n'saangwiitu, yaaku ti yimunë limpa livangunu mu m'bweeli wuntamë wu lisumu i wu busafu, kasi yimunë limpa likaambu m'bweeli wulyoomë i wu bucyelikë.

⁹ Mu n'kaandaami wun'tetë, miinu yilusonikënë mu kumaangë beeno kuba cintwaali yimunë bo bën'zingilë mu busafu.

¹⁰ Miinu yisye zolë kutubilë ko mu banë bëke mu buloongo be buubu bëkeeli mu busafu, n'soci, miifi kaambofo bën'kuundaangë sinkosi. Ningë boobo likelili, beeno lufwenikini kubasikë mu buloongo!

¹¹ Miinu yizolisi kulukaambë luleembu kuba bundiku yi wunë wuyituunvi cita maanë, ke mu busafu, wuke yi n'soci, wun'kuundë sinkosi, wun'suungë baatu, cikolë-mbuungu kaambofo mwiifi. Beeno lusye fwaanë ko kukabësënë ndiiwu yi muutu wu mpilë oyo.

^12-13 Lyaawu lisye kun'talë ko, licyelikë, mu kufundisi banë bëkaambu sikleentë, Nzaambi wubëfundisi. Kasi beeno kupodyaanu kufundisi banë bëke yiinu libuundu limweeke? Cyelikë, busonëmë : « Kulaanu civaangë mëbi mu nkoongiinu. »