1 Koleentë 4 - N’KANGULU WUMOONË

Mimbunzi yi Kliistu

¹ Beeno, lufwenikini kutucikunë buke biseelu bi Kliistu, bëke yi n'funë mu kusalilë mëviindë mëswaamë më Nzaambi.

² Cyosuku, cinë bën'loombë ke ciseelu, kwe ba wusulëmë.

³ Mu miinu, yifwaati yisë n'lengilë moonyi ko mu kufundusu ke beeno kaambofo fë cinzonzi ci baatu. Miinu yisë yifundisi ko yivaandi miveekë.

⁴ Mu mbalulwaami, cyelikë, yisë m'monë lyosuku liseembu ko, kasi yaaku ti lyaawu livangisi miinu kuba yisulëmë. Fumu na wukun'fundusi.

⁵ Mu lyaawu, lufundisyaanu muutu ko, ntetë ntaangu bëzitikë kufwaanë i fanë fën'kwisilë Fumu: wun'cyenisi binë biswaamë ku citoombi i wun'zabikini simbalulu siswaamë si n'timë baatu. Oboobo kadë muutu wun'tambulë ke Nzaambi ludumu lufwenikini.

⁶ A baanë bë nguli, yatubilë obo mu Apoloosë i miveekë mu mëkomini miinu. Miinu yatiisi ti, mu cifwaani ciitu, beeno lubakulë suundu mu lyaliili : « Lufwenikini kukalilë mu sindilu bëzitikë bo lisoniminë. » Kasi wun'viipë ve mu beeno wum'ba lunaangu mu kunwaninë cikaangë ci muutu wun'ka.

⁷ Cibilë-mbici njeeyi wum'balë, njeeyi mwiinji kuzangëmë yi bëmesë? Byakë byooso bike yaaku, wusye bibakilë ke Nzaambi kwe? Abu lyekilë obo, mu mbici wun'vangilë lunaangu mu binë bike yaaku dedë ti wusye bitambulë ko?

⁸ Beeno lumwe bakë byakë byooso binë lwabë n'ciinzë! Beeno lumwe ba bisinë! Beeno lweekë sifumu kosuku beeso tukeeli ko sifumu! Cibeeni? Yizolisi ti beeno luba cyelikë sifumu bwiinji beeso yiviitu tutumi yimunë beeno.

⁹ Licyelikë yim'balë ti, Nzaambi watutuumvi mimbunzi fë ciikë ci siitu : beeso tweekë dedë baatu babakë lusifu lu lufwa : beeso twavakulu buke bitalë-sebo bi buloongo n'viipë, ke siyaanzi yivaandi i ke baatu lumoonyi.

¹⁰ Beeso tweekë mëlawu mu cibilë ci Kliistu, kasi beeno singeelë mu lubundunu yimunë Kliistu. Beeso twadekë kasi beeno luciindë. Beeso twanyakunu, kasi beeno lwazanjiku.

¹¹ Mu zoolë be yiiyi yivaandi, beeso tulë mu kufwa nzalë i mpwiilë, n'vwaatu voo, beeso tuviimbu, kukalilë ve mbiinji mweekë.

¹² Beeso tulë mu kusalilë mu mpasi mu kubakë limpa liitu. Bunë bëtufiingë, tun'sakumunaangë. Bunë bëtukwamisi, tun'vidaangë moonyi.

¹³ Bunë bëtutubilë simbi, beeso kubëvutulilaangë simboti. Bëtumonë buyifanwabu baatu kwaandi vwiili dedë sodo yi buloongo.

¹⁴ Miinu yalusonikinë yaaku ti mu kulufwiisi sonyi, kasi mu kululubulë buke baanë baami bë luzolo.

¹⁵ Licyelikë, ningë beeno lubakë kuumi li biveefi li miloonji mu luziingu lwiinu yimunë Kliistu, beeno kupodi kubakë taatë yimweekë too: bunë yilutwalilë Mpolu Mboti, mati miinu yeekë tatiinu mu luziingu lwiinu yimunë Kliistu Yeesu.

¹⁶ Bwaawu, yiluloombë mënaanë, lwe zingilaanu bo buke miinu.

¹⁷ Mu lyalyooli, licyelikë yalufilë Timotee mwanaami wu luzolo i wusulëmë mu ciminu mu Fumu, naandi wulutebulë moonyi mu mëkomini mëkun'natë mu luziingu yimunë Kliistu Yeesu, bo yilë mu kumësininë fosuku, mu bingangë byakë byooso.

¹⁸ Bën'ka mu beeno bën'vaangë lunaangu mu kubalë ti miinu yisë n'kwiisë ko mu kulumonë.

¹⁹ Kasi ningë Nzaambi wube lizolë, mëlooko yiisë ke beeno. Bwaawu yisë n'zaabë yaaku tokë mëbuungu më bangë lunaangu obo, kasi linë baawu bëm'podi kuvaangë.

²⁰ Cibilë lwaangu lu Nzaambi lukeeli ko lyaambu li mëbuungu kasi më luleendo.

²¹ Mbici luzolisi? Yiisë ke beeno yimunë luswaali kaambofo yimunë n'timë wuwaalë luzolo i wu mëleembe?