1 Koleentë 3 - N’KANGULU WUMOONË

Biseelu bi Nzaambi

¹ Licyelikë, baanë bë nguli, yisye podi kuve kulukambilë bo buke baatu bëke yi Ciluunzi ci Nzaambi : yalukambilë bo buke baatu bë buloongo be buubu, dedë mweekë baanë bë ciminu mu Kliistu.

² Mati mëdeveenë yiluvaanë, yaaku ti bilya biciindë, cibilë beeno nusye podi ko kuciimbë moonyi. Buyifanwabu beeno lulë lipodi ko,

³ cibilë ti beeno lulë mu kuzingilooso buke baatu bë buloongo be buubu. Abu n'soci i cimpalë bike yiinu i beeno lusë n'leesi ko, lulë baatu bë buloongo be buubu i lun'zingilë nzingulu yi cimuutwe?

⁴ Ningë wumweekë mu beeno bëtubë : « Miinu, waami Poolë ». Wun'ka : « Waami Apoloosë », nusë n'leesi ko ti beeno lun'zingilë buke wosuku muutwe?

⁵ A buni, Apoloosë nani? Poolë yivaandi nani? Beeso tulë kwaandi biseelu bi Nzaambi, binë byaluvangisi kuta lyaanë. Kadë muutu mu beeso kwe vaanji cisalu cinë Fumu kun'vaanë :

⁶ miinu yakunë, Apoloosë wamwamunë masi, kasi Nzaambi na wavangisi kumenisi.

⁷ Bwaawu, wunë wun'kunë i wunë wum'mwamunë masi, bëkeeli n'ciinzë ko: kanuku wo Nzaambi na ke n'ciinzë, naandi wun'vaangë kumenisi cikunë.

⁸ Wunë wun'kunë i wunë wum'mwamunë masi, bëke dedë mweekë: Nzaambi wun'vaanë ke kadë muutu ndobu mu cisalu cyaandi.

⁹ Cibilë beeso sindiku si cisalu i beeno solë yi Nzaambi, beeno yivaandi n'zo-Nzaambi.

¹⁰ Bunë buke muulë wunë Nzaambi kum'paanë, miinu yasalë buke n'tuunji wumboti i yatuulë simbaandu. Buyifanwabu, wun'ka wun'tuungë fë yilu. Kasi bufwenikini wosuku kukebë buni kun'tungilë.

¹¹ Licyelikë simbaandu sisimiku mu Yeesu Kliistu, muutu ve wum'podi kube tuulë sin'ka.

¹² Bën'ka bën'salilë mu woolë, mu palaatë kaambofo mu mëmanyi më bukaalu mu kutungilë fë yilu simbaandu be syoosi. Bën'ka bën'salilë miti, bisonyi kaambofo mu sinkuunzë.

¹³ Kasi nteku cisalu ci kadë muutu cim'monikë fë ciyalëlë mu cilumbu ci Lufundusu. Licyelikë, cilumbu be cyoocyo cin'zabëkënë mu mbaasu i mbaasu yin'vangisi kuzabikini cisalu ci wosuku mu kuleesi linë kwavaangë.

¹⁴ Ningë wun'viipë wun'tuungë n'zo yin'kaambu kulakëtë mu mbaasu, naandi wun'tambulë ndobu.

¹⁵ Kasi yivaandi, ningë n'zo yibe lakëtë, fumu n'zo wusë m'bakë ndobu ko. Mu boobo naveekë wun'vuukë, kasi buke naandi wavyokilë fë meeyi lyuungëtë li mbaasu.

¹⁶ Beeno luzabisi cibeeni ti n'zo-Nzaambi lukeeli i Ciluunzi ci Nzaambi cin'zingilë mu beeno.

¹⁷ Cyelikë, ningë wun'viipë wube tululë n'zo-Nzaambi, Nzaambi wukun'tululë. Cibilë n'zo-Nzaambi yi saantu i mati beeno lukeeli N'zwaandi.

¹⁸ Muutu ve wuyipuutë naveekë : ningë wun'viipë mu beeno wuyicitulë ngeelë mu mbalulu si buloongo be buubu, kwe citukë lilawu bwiinji kuba cyelikë ngeelë.

¹⁹ Cibilë bungelë bu buloongo be buubu bwaawu bulawu fë meeso më Nzaambi. Licyelikë, busonëmë : « Nzaambi wum'bwitikaangë singeelë mu n'taambu wu bumpilë-mpiipi bwaawu. »

²⁰ Lyaawu lin'tubë yivaandi : « Fumu wuzabisi simbalulu si singeelë, naandi wuzabisi ti syaawu nyungulë sikeeli. »

²¹ Bwaawu, muutu ve wun'siilë binyemu mu baatu, cibilë byakë byooso biinu :

²² Poolë, Apoloosë, kaambofo Pyeelë, keti buloongo, luziingu, kaambofo lufwa, buyifanwabu, kaambofo ntwaalë yikwisë, byakë byooso biinu.

²³ Beeno bë Kliistu i Kliistu wu Nzaambi.