1 Koleentë 2 - N’KANGULU WUMOONË

Kutendulë Kliistu bëkomë

¹ A baanë yaamë bë nguli, yiyisë ke beeno, mu kuluzabikini liviindë li Nzaambi, yaaku ti mu luzangumunu lu bikumë, kaambofo mu bungelë.

² Cibilë miinu yisye zolë kuzaabë lin'ka ko fë meeyiinu, kanuku wo Yeesu Kliistu, yiveko Yeesu Kliistu bëkomë.

³ Mati bwaawu yiyileesi ke beeno mu budeci i mu boomë i mu lutekutu lunenë.

⁴ Libuungu lyaami i ndongulwaami bisye ba ko bunzonzi bu bungelë bu lukondululu, kasi mati mu lumonukunu lu Ciluunzi i luleendo,

⁵ bwiinji, ciminu ciinu cileembu kukangëminë mu bungelë bu baatu, kasi mu luleendo lu Nzaambi.

Bungelë bu Nzaambi

⁶ Mu kumonë kwaandi, mati beeso tulë mu kuloongë bungelë ke sikleentë syakundukë, kasi yaaku ti bungelë bu buloongo be buubu, kaambofo luleendo tu banë bëm'byaalë mu buloongo be buubu i bën'vekumunu mu lunyambukunu lu lufwa.

⁷ Moniko, beeso tulë mu kutendulë bungelë bu Nzaambi, liviindë liswaamë. Nzaambi wulisoolë faanë yi faanë, mu kutuvangisi kumonë bumpumu bwaandi ntetë buloongo kuvangënë.

⁸ Luleendo ve tu buloongo be buubu bëzaabë bungelë be boobo. Ningë baawu bëlizaabë, nkanë bësye komë ko Fumu bumpumu.

⁹ Kasi, bunë busonëminë : « Linë wosuku muutu wukaambu kumonë kaambofo kuwu, linë wosuku muutu wukaambu kubalë, Nzaambi wulibelikilë mu banë bën'zolisi. »

¹⁰ Kosuku, mati ke beeso kwaawu Nzaambi kuyalulilë lisweeci be lyoolyo mu Ciluunzi ci Saantu. Licyelikë, Ciluunzi kupodi kucyengululë makë mooso keti simbalulu si Nzaambi sike ku mëwiingë mëswaamë.

¹¹ Linë lin'talë muutu, tokë cyo ciluunzi cyaandi cyaawu cizabisi simbalulu sike yaandi. Mpilë mweeke yivaandi, kanuku cyo Ciluunzi ci Nzaambi cizabisi simbalulu si Nzaambi.

¹² Beeso tusye bakë ko ciluunzi ci buloongo be buubu. Kasi tubakë Ciluunzi cifuminë ke Nzaambi bwiinji tuzaabë mëkabu manë Nzaambi kutuvaanë.

¹³ Beeso tusë tun'tubilaangë ko yimunë ntubulu yin'sinaangë bungelë bu baatu, kasi yimunë wunë wun'sininaangë mu Ciluunzi ci Nzaambi. Mati mu bwaawu, beeso tun'zimuninaangë mëcyelikë më cimpeefë ke bo bëke yi Ciluunzi be cyooci mu baawu.

¹⁴ Muutu wunë wun'siilaangë tokë civuufu mu mëlyeelë më cimuutu, kupodi ve kutambulë mëcyelikë mën'vaanaangë Ciluunzi ci Nzaambi: maawu bulawu mu naandi. Naandi kupodi ve kuzikulë kumë kuwu, cibilë bëm'podi tokë kuyifundisi mu Ciluunzi.

¹⁵ Muutu wunë wuke yi Ciluunzi ci Nzaambi podi kufundisi makë mooso, kasi muutu ve wum'podi kun'fundisi.

¹⁶ Licyelikë, busonëmë : « Nani wuzabisi mbalulu yi Fumwe? Nani wum'podi kun'vaanë mëloonji? » Kasi beeso, tukeeli yi mbalulu yi Kliistu.