1 Koleentë 16 - N’KANGULU WUMOONË

Nkuunji mu baanë bë nguli

¹ Maambu më nkuunji mu bitamaanë bi Yelusaleemë : Lwe vangilaanu dedë mweekë mëkomini mo yivaanë ku Bingangë bi Ngalaatë.

² Kadë lumiingu, wumweekë-wumweekë mu beeno wufwenikini kubeembikë fë nteku bwaalë bwaandi binë naandi kwakonë bunë bukelili mëkanë maandi, bwiinji bëleembu kuviingë lwisulu lwaami mu kuvaangë nkuunji.

³ Bunë miinu yikutuuci, yin'filë bo beeno lun'soolë, yimunë mikaandë yi nsunjikulu, kunatë likabu liinu ku Yelusaleemë.

⁴ Ningë libe fwaanë ti miinu yeendë yivaandi, baawu bën'vaangë mweendo yimunë miinu.

Mo Poolë kwafwiikë

⁵ Miinu yin'kwisë ke beeno bunë yim'manë kutabë livulë li Masedwaanë, cibilë miinu yin'tabilë kwaawu.

⁶ Bunë yim'balë miinu yin'vyoosi mpooko ntaangu ke beeno, kaambofo cisifu cyakë cyooso. Oboobo, beeno lukun'zudi mu kulandilë mweendwaami bosuku bubeeli kunë yike sundilë.

⁷ Cibilë yisye zolë kuve mu kulumonë tokë mu luvyokulu. Yim'balë yin'kalë mwa ntaangu ke beeno, ningë Fumu wulizolisi.

⁸ Mu lyaawu, yin'toombë kukalilë ku Efeesë tee cilumbu ci n'saangu Pantëkootë.

⁹ Cibilë luvoto luboti yabakë mu kuyivaanë mu cisalu ciboti, bosuku simbeenyi silë ba mpaapë.

¹⁰ Ningë Timotee bëkwiisë, vaangaanu buumë ti cin'velë ve cikun'vosi bitu ke beeno, cibilë naandi wun'salë bo bukë miinu mu cisalu ci Fumu.

¹¹ Biikë ti muutu ve wukun'kwengulë. Tiilyoko n'zudyaanu mu kulandilë mweendwaandi mu n'sikë, bwiinji naandi wulengë vutukë ke miinu, cibilë yilë mu kun'viingë yimunë baanë bë nguli.

¹² Ke mwaniitu nguli Apoloosë, mpaapë vyaasi miinu yin'ciinzi bitu mu kwiisë ke beeno yimunë baanë bë nguli bëmesë, kasi naandi wusë n'ciinzë ko mu kulivaangë buyifanwabu. Bwaawu, naandi mba wukwendë bunë kum'bakë luvoto.

Mëkomini më siitu i sibweekë

¹³ Lwe zungululaanu, lwe kalilyaanu mu ciminu, lwe baanu lunkanvi, lwe baanu yi n'viingu.

¹⁴ Lwe vangaanu makë mooso yimunë luzolo.

¹⁵ Beeno luzabisi Stefanaasë i cifuumbë cyaandi: luzabisi ti ku Akaayi baawu baatu bën'tetë mu kuvilukë i bëyivandikë mu kusalilë sisaantu. Oboobo, yiluloombë, baanë bë nguli:

¹⁶ vitikaanu bëlusunjikë ke baatu bë mpilë oyo i mu bakë booso bën'salë mu buvavambë yimunë baawu.

¹⁷ Miinu yike mu liyaanji mu lwisulu lu Stefanaasë, Folëtunatusë i Akayikusë. Baawu bëkum'paanë cinë cilë kun'kaambwaangë bunë beeno lukaambu kuba,

¹⁸ Licyelikë baawu bëvangisi ciluunzi cyaami i ciinu kukalë n'sikë. Lwe zaabyaanu kucinzikë baatu bë mpilë oyo!

¹⁹ Bingangë bi Aziiya byalubilë. Akilaasë i Pilisiilë, yimunë Cingangë cin'dukënaangë ke baawu, cyalufilë sibweekë sifwenikini mu lubundunu yi Fumu.

²⁰ Baanë booso bë nguli bëke aku balubilë. Bilësënaanu benuveekë yi benuveekë mu lufifukunu lu saantu.

²¹ Mati mu kooko kwaami yasonikinë bikumë abi : Sibweekë si Poolë.

²² Ningë wun'viipë wusye zolë Fumu ko, biikë ti naandi kutemukë. Malënaatë – Fumwiitu, yisë!

²³ Biikë ti muulë wu Fumu Yeesu wuba yimunë beeno.

²⁴ Miinu yibe luzolë bënubooso mu lubundunu yimunë Kliistu Yeesu.