1 Koleentë 15 - N’KANGULU WUMOONË

Luvulumuku lu Kliistu

¹ A baanë bë nguli, miinu yin'vwa n'ciinzë kulutebulë moonyi buyifanwabu Mpolu Mboti yinë yilutendulilë, yinë beeno lwabë lutambulë i mu yaawu beeno lukangiminë.

² Mati mu lyaawu beeno lun'vukilë, ningë lube lisimbililë dedë mweekë miinu yilutendulilë, mooti boobo ko, beeno lwata maanë më buunë.

³ Licyelikë yiluvandikë ntetë nsinunu yinë miveekë yitambulë : Kliistu wufwa mu mësumu miitu, dedë mweekë bunë busonëminë.

⁴ Naandi wabë wutuulu mu buumbë i cilumbu cin'tatu naandi wuvulumukë, bunë busonëminë.

⁵ Naandi wumonikinë Pyeelë i ke likuumi mimbunzi wali.

⁶ Fë mbusë, naandi mo mu ntaangu be yooyo wusë kumonikinë kusombukë nkamë-taanu si bilaanzi byaandi – mpaapë mu baawu bëcinyooso moonyi tee yi zwaalu, kasi bën'ka bëfwa. –

⁷ Kumanë ofo, naandi wuyimonikinë Zaakë i ke mimbunzi yakë yooso.

⁸ Kwamani kumonikinë bakë booso, naandi wusë kumonikinë yivaandi miinu, keti yilë ba yibutu ntetë cilumbu kufwaanë.

⁹ Licyelikë, miinu mwiinji bulesi yi mimbunzi yooso – miinu yisye fwaanë ko bëkun'teelë m'bunzi, cibilë yikwamisi Cingangë ci Nzaambi.

¹⁰ Kasi, mu muulë Nzaambi, yike bo yikelili i muulë wo naandi wukum'paanë wusye kaambu n'viingu ko: tiilyoko, miinu yasalë kuvyokililë mimbunzi yooso yimesë, yaaku ti miinu, licyelikë, kasi muulë Nzaambi waawu wasalë mu miinu –

¹¹ Oboobo, keti lilë ba miinu, keti lilë ba baawu, tala linë beeso tulë mu kutendulë, tala linë beeno lwasiilë ciminu.

Luvulumuku lwiitu

¹² Beeso tulë mu kutendulë ti Kliistu wuvulumukë mu nkoongë bëfwa: bunyooso bën'viipë mu nkoongiinu bëlë mu kutubë ti bëfwa bisë n'vulumukë ko?

¹³ Ningë boobo bwabukelili, Kliistu yivaandi sye vulumukë ko.

¹⁴ Ningë Kliistu sye vulumukë ko, beeso tukeeli cin'viipë ko mu kululoongë i ciminu ciinu yivaandi cibuunë.

¹⁵ Beeso simbaanji si Nzaambi si lupuutu tukeeli, abu beeso twavitikë ti naandi wuvulumunë Kliistu, mooti naandi sye livaangë ko, bëfwa cyelikë kusë bën'vulumukë ko.

¹⁶ Kasi ningë bëfwa bisë n'vulumukë ko, Kliistu yivaandi wusye vulumukë ko.

¹⁷ Ningë ti Kliistu wusye vulumukë ko, ciminu ciinu cinyungulë kwaandi. Beeno lucini kwiinu mu mësumu.

¹⁸ Yivaandi banë bafwiilë mu ciminu mu Kliistu bën'nyambëkënë.

¹⁹ Ningë beeso tusiilë civuufu ciitu mu Kliistu mu luziingu be luulu vwiili, beeso biinji kwaayi mu bakë booso.

²⁰ Buyifanwabu, Kliistu wavulumukë mu nkoongë bëfwa, mu kuvaanë obo ciifi ti banë bëfwa bën'vulumukë yivaandi.

²¹ Cibilë, bo bumweekë lufwa luyisilë mu muutu mweekë, bo bumweekë yivaandi luvulumuku lun'kwisilë mu muutu mweekë.

²² Baatu bakë booso bën'fwa cibilë ti bëkangëmë yi Adaamë, mpilë mweekë bakë booso bëm'bakë luziingu cibilë bëkangëmë yi Kliistu,

²³ kasi kadë muutu ke yi waandi n'taandë : Kliistu na n'tetë mu bakë booso, yi bo bëkangëmë mu Kliistu, mu ntaangu kun'kwisilë.

²⁴ Kulandilë ofo siitu yin'kwisë: Kliistu wun'tyamunë bosuku butinu, losuku lutumu i losuku luleendo i naandi wun'vutulë Lwaangu ke Taatë Nzaambi.

²⁵ Cibilë bufwenikini ti Kliistu wubyaalë fanë Nzaambi wun'tuulë simbeenyi syooso kusi maalu maandi.

²⁶ Mbeeni yi siitu yinë naandi wun'tyamunë, mati lufwa.

²⁷ Licyelikë, busonëmë : « Nzaambi watuulë byakë byooso kusi maalu. » Kasi licyelikë mu n'kukë awu, « byakë byooso » bisë n'talë Nzaambi ko, wunë wun'vanaangë biimë byakë byooso ke Kliistu.

²⁸ Bunë biimë byakë byooso bim'ba mu lutumu lu Kliistu, bwa boobo naveekë Mwaanë, wum'ba mu lutumu lu Nzaambi wunë byakë byooso bim'ba mu lutumu lwaandi. Oboobo, Nzaambi wum'byaalë mu byakë byooso.

²⁹ Balaanu yivaandi mu banë bën'tambulë lubatizyaalu mu cibilë ci banë bëfwa: mbici baawu bën'toombë kubakë? Ningë licyelikë ti bëfwa bisë n'vulumukaangë ko, cibilë-mbici bëlë mu kubatizyaalë mu cibilë cyaawu?

³⁰ Mu besuveekë, cibilë-mbici tulë mu kuyivakulilë yosuku ntaangu mu binkuungë?

³¹ Baanë bë nguli, kadë cilumbu miinu yim'biindwaangë lufwa: licyelikë yivaandi yike yi lunyemu mu beeno mu lubundunu yimunë Kliistu Yeesu Fumwiitu.

³² Mbici bikun'nisilë mu kunwaanë i bibulu bi n'situ ku Efeesë, ningë kanuku tokë mu miciinzë yi cimuutu? Ningë bo bëfwa bë kusë n'vulumukaangë ko, boobo bwa bëtubilë, « Tulyaanu i tunwaanu, cibilë mbasi-menë tun'fwa. »

³³ Nuyipuutyaanu ko: « Sinkoongë simbi sin'vukumunë banë bëke mëvaangë mëboti. »

³⁴ Lwe vutukaanu ku nduunji, buni bufwenikini i lwe biicyaanu kusumukë. Miinu yilitubilë mu cibilë ci soniinu : bën'ka mu nkoongiinu bësye zaabë Nzaambi ko.

Nyitu yi bo bën'vulumukë

³⁵ « Kasi, bëlë mu kufulë ti, buni banë bëfwa, bën'vulumukë? Mpilë m'bici nyitu yim'ba yaawu? »

³⁶ Njeeyi ciyimbu wukeeli! Bunë wun'kunë lungeenzë, lwaawu kupodi ve kuvaanë luziingu mu cikunë ningë ti lwaawu lusye bolë kuve.

³⁷ Cinë wulë mu kukunë cikeeli ko yi nyitu yifwenikini, kasi lungeenzë kwaandi tokë, bunimbalë lungeenzë lu looso kaambofo cikunu cin'ka i yaaku ti cikunu cyaveekë cya cim'menë.

³⁸ Kulandëkënë ofo, Nzaambi wun'vaanë ke lungeenzë be loolo mu kuba nyitu mu cikunu kuzolisi. Kadë lungeenzë kufwanëkënë yi n'ti wufwenikini.

³⁹ Byosuku bin'vumukë bikeeli byakë byooso n'sunyi wumweekë ko : n'sunyi baatu lumoonyi wuvyakënë yi n'sunyi bibulu, wun'ka wu sinuni i wun'kooso wu litoongo.

⁴⁰ Buke yivaandi sinyitu si mëyilu i sinyitu si n'toto. Sinyitu si mëyilu sike lumaniku luvyakënë yi sinyitu si n'toto.

⁴¹ Muunyi wuke lwaandi lumaniku, ngoondi wuke lwaandi lun'ka i simbotë lun'kooso. Keti mu simbotë, lumaniku luvyakënë lumesi i lun'ka.

⁴² Bwa bëm'beelë banë bëfwa bën'vulumukë. Ningë vuumbi bayituulë mu buumbë, yaawu yafwililë. Bunë yin'vulumukë, yisë be fwa ko.

⁴³ Bunë yaawu yin'tuulu mu buumbë, yim'ba mënyonyi i yidekë. Bunë yin'vulumukë, yim'ba mu bumpumu i yin'ciindë.

⁴⁴ Bunë bëyituulë mu buumbë, mati nyitu yi n'sunyi. Bunë mba yin'vulumukë, yaawu nyitu yin'zingilë mu Ciluunzi.

⁴⁵ Licyelikë, mësonëmë : « Muutu wun'tetë Adaamë wabë muutu lumoonyi ». Kasi Adaamë yi siitu Ciluunzi wun'vaanë luziingu.

⁴⁶ Yaaku ti cimpeefë cya cideelë ntetë kwiisë, kasi n'sunyi: cimpeefë cin'syalilë kwiisë.

⁴⁷ Adaamë yin'tetë, yivangunu mu n'toto, Adaamë yimwaali yifuminë lu yilu.

⁴⁸ Baatu bë n'toto bëke dedë mweekë yi wunë wuvangunu mu nkunkuunvu n'toto, kosuku baatu bë yilu, bëke dedë mweekë yi wunë wufuminë ku yilu.

⁴⁹ Bo bumweekë beeso fwiifu yi muutu wuvangunu mu nkunkuunvu n'toto, bo bumweekë beeso tum'ba yivaandi fwiifu yi wunë wufuminë ku yilu.

⁵⁰ Talaanu linë yizolisi kutubë, baanë bë nguli: cinë civangënë mu n'sunyi i mu meengë kupodi ve kubakë ciikë ku Lwaangu lu Nzaambi i cinë cin'fwa kupodi ve kubakë luziingu lukaambu më manunu.

⁵¹ Miinu yakuluzabikini lisweeci: besubooso tusë n'fwa ko, kasi besubooso tum'balukë.

⁵² Mu mwa ntaangu, mu lulabu lu lyeesu, mu nduundu mbudi yi siitu. Bunë yaawu yin'tendukë, bëfwa bën'vulumukë mu kuleembu kube fwa i besubooso tum'balukë.

⁵³ Licyelikë, cinë cim'bolaangë cifwenikini kuvwaatu ke cyo cin'kaambu kubolaangë. Cinë cin'fwangaangë cifwenikini kuvwaatu ke cyo cin'kaambu kufwangaangë.

⁵⁴ Cinë cim'bolaangë bunë cin'vwaatu ke cyo cin'kaambu kubolaangë i cyo cin'fwangaangë bunë cin'vwaatu ke cyo cin'kaambu kufwangaangë, oboobo, bun'vangëninë manë mësonëmë : « Lufwa lwalalukë. Nduunji yalungilë mpakë! »

⁵⁵ « Lufwa, kuni kukeeli nduunjyaakwe? Lufwa kuni kukeeli lutumu lwaaku lu kuvondilë? »

⁵⁶ Lufwa lum'bakilë lutumu lwaandi mu lisumu i lisumu lim'bakilë lutumu lwaandi mu n'kaakë.

⁵⁷ Kasi, ndumu ke Nzaambi wutuvaanë nduunji mu Fumwiitu Yeesu Kliistu!

⁵⁸ Bwaawu, baanë bë nguli, lwe tatëminyaanu i sikëminyaanu. Lwe kalilaanu mu buvavambë mu cisalu ci Fumu, cibilë beeno luzabisi ti simpasi lulë mu kumonë mu lubundunu yimunë Fumu sikeeli sibuunë ko.