1 Koleentë 14 - N’KANGULU WUMOONË

Mëkumuni mëmoonë mu mëkabu më Ciluunzi ci Saantu

¹ Lwe toombyaanu ntetë luzolo i baanu buvavambë. Toombaanu yivaandi mëkabu më cimpeefë, kulu-kulu yiveko lubikulu lu maambu mën'fuminë ke Nzaambi.

² Wunë wun'tubilë mu mbeembu, wusë n'tubënë yi baatu ko kasi yi Nzaambi, cibilë muutu ve wun'kuwu manë kun'tubë, mati mu Ciluunzi naandi wun'tubë mëcyelikë më kwaatë-yekë.

³ Kasi wunë wum'bikulë maambu më cimpeefë wun'kaambë ke bëmesë mu kubëvangisi kweendë ntwaalë mu ciminu, mu kubëcindisi i mu kubëboondë.

⁴ Wunë wun'tubë mbeembu, naveekë wum'bakë lukulë, vandi kasi wunë wum'bikulë, wun'vangisi Cingangë cyooso kubakë lukulë.

⁵ Yizolisi buboti ti beeno booso lutubë simbeembu, kasi yin'tiisi yiveko lubikulë. Licyelikë, wunë wum'bikulë maambu më mpilë oyo, mwiinji n'ciinzë yi wunë wun'tubë simbeembu, kaambofo ningë wun'viipë wum'podi kubangulë mo kun'tubë, bwiinji Cingangë cyooso cibakë lukulë.

⁶ Bwaawu, baanë bë nguli, yiluloombë: bunë yin'kwisë ke beeno, ningë yibe tubilë mu simbeembu, mu mbici miinu yilubeelë n'ciinzë? Mu cyosuku ve, mooti tokë yibe lunatinë maambu më luzabukunu, luzaabu, lyaambu li cimpeefë, kaambofo yivaandi nsinunu.

⁷ Tuboongaanu cifwaani ci cisikulu ci mwisikë, mpyeempi kaambofo cinditi : ningë mëlaambë mësye vyakënë ko, buni bëm'podi kuzabilë lilaambë li mpyeempi kaambofo li cinditi?

⁸ Ningë n'sici mpyeempi wusë n'vaanë ko lilaambë liboti, nani wum'beliminë mu livitë?

⁹ Mpilë mweekë, buni bëm'podi kuwulu linë beeno lun'tubë ningë maambu manë lulë mu kutubë mu mbeembu mëkeeli mësungëmë ko? Më mbuungu miinu mpeemo!

¹⁰ Ke mpaapë tumbulu sivyakënë mu buloongo, kasi yosuku tumbulu yike yi suundwaandi.

¹¹ Oboobo, ningë yisye bakulë ntubulu ko, miinu mweeni mu naandi, naandi mweeni mu miinu.

¹² Bwaawu, benuviinu, lun'tiisi yimunë lunkanvi mëkabu më Cimpeefë, toombaanu kuba bisinë yiveko bin'vangisi Cingangë kweendë ntwaalë.

¹³ Mati mu bwaawu, wunë wun'tubilë mu mbeembu, kusambilë bwiinji kuyibangulë.

¹⁴ Cibilë ningë miinu yin'sambilë mu mbeembu yi mpilë oyo, ciluunzi cyaami cike mu n'saambu, kasi lyeelë lyaami lisë n'salë ko.

¹⁵ Buni yifwenikini kusiile? Miinu yin'sambilë mu ciluunzi i yin'sambilë yivaandi mu lyeelë. Miinu yin'yolë yimunë ciluunzi i yin'yolë yivaandi yimunë lyeelë lyaami.

¹⁶ Licyelikë, ningë njeeyi wun'tondilë tokë mu Ciluunzi, buni wunë wuke kwaandi citalë-sebo mu cizutununu wum'podi kucikuninë « Ameenë! » Mu n'saambwaaku wu mputululu mëtoondo? Naandi wusye zaabë ko mo wulë mu kutubë.

¹⁷ Mooti n'saambwaaku wu mputululu mëtoondo wuke wumboti, muutu wun'ka wusë m'bakilë ndaandu ko.

¹⁸ Miinu yin'toondë Nzaambi mu cibilë ti yin'tubë simbeembu mwiinji yi beeno.

¹⁹ Kasi, fë ntwaalë Cingangë, miinu yifwenikini kutubë bikumë bi taanu yimunë lyeelë lyaami, bwiinji yilubulë bëmesë i kutubë kuumi li biveefi li bikumë mu mbeembu.

²⁰ Baanë bë nguli, leembwaanu simbalulu si bubwabwanë. Lwe baanu buke baanë bëcyeeci mu linë lin'talë libi, kasi baanu baatu bakundukë mu ntubulu.

²¹ Talaanu linë lisonëmë mu n'kaakë: « Mu baatu bë mbeembu sin'ka, i mu minu bën'ka yin'kambilë mboongu be yooyi, keti baawu bisë kun'nyuwulu ko », butubilë Fumu.

²² Oboobo, simbeembu sike ciliimbu mu bitamaanë, kasi yaaku ti mu bo bëkaambu kuta maanë. Mpilë mweekë likabu li kubikulë, ciliimbu mu bitamaanë kasi yaaku ti mu bo bëkaambu kuta maanë.

²³ Ningë ti, Cingangë cyakë cyooso cyadukënë i bakë booso bëlë mu kutubë mu simbeembu: bitalë-sebo kaambofo bën'kaambu kuta maanë bakotë fo lukeeli, baawu bisë n'tubë ko ti beeno lweekë mëlawu?

²⁴ Ningë bakë booso bëm'bikulë i fë n'kotë wun'viipë wukaambu kuta maanë kaambofo citalë-sebo, bakë booso bëkun'vangisi kubakulë lisumu mu manë kwakuwu. Naandi wun'fundusu ke bakë booso bëkun'yuwu.

²⁵ Simbalulu syaandi siswaamë sim'monikë fë ciyalëlë. Mu lyaawu, naandi wun'kudikë nduunzi fë n'toto i wun'kuundë Nzaambi mu ntubulu ayi : « Cyelikë Nzaambi ke yiinu. »

Bunketë mu Cingangë

²⁶ A baanë bë nguli, beeso buni tufwenikini kuzitikilë? Ntaangu beeno lun'dukuninaangë mu n'saambu, wumweekë mu beeno podi kuyolë luumbu, wun'ka wun'vaanë ndongulu, wun'kooso wum'baasi mëswaamë, wun'ka wun'tubilë mu mbeembu i wun'ka yivaandi wum'bangulë: makë mooso omo mëfwenikini kuzudi Cingangë mu kweendë ku ntwaalë.

²⁷ Ningë tube ba mu kutubilë mu mbeembu, bufwenikini baatu bwaali kaambofo bëtatu kulivaangë, kadë muutu mu yaandi ntaangu i wun'viipë wufwenikini kubangulë.

²⁸ Ningë ti muutu voo mu kubangulë, bëkalë swii mu Cingangë: kwe tubi tokë mu naveekë i ke Nzaambi.

²⁹ Mu banë bën'tambulë tubiku, keti bwaali kaambofo bëtatu kubulë mbeembu, bëmesë bëviisi.

³⁰ Kasi ningë muutu wun'ka wuke foofo watambulë lubiku lu Nzaambi, bufwenikini wunë wulë mu kutubë kulingëmë.

³¹ Licyelikë, beeno booso lufwenikini kuvaanë tubiku tu Nzaambi kadë muutu mu yaandi ntaangu, bwiinji bakë booso bëlubukë i bëciindë.

³² Biluunzi bi mibici bin'kolikaangë mibici.

³³ Licyelikë, Nzaambi wukeeli Nzaambi yi n'vuusë ko, kasi Nzaambi yi n'sikë. Bunë bukelili mu Bingangë byooso bi sisaantu,

³⁴ bëcyeetu bëfwenikini kulingëmë mu bizutununu: bësye bëvaanë n'swa ko wukutubilë. Bo bën'tubilë n'kaakë Nzaambi, baawu bëfwenikini kulenvukë.

³⁵ Ningë baawu bën'tiisi kuzaabë lin'viipë, bëyufuli bënuni baawu ku n'zo. Busye fwanëkënë ko mu n'cyeetu kubulë mbeembu mu Cingangë.

³⁶ Buni tokë ke beeno kuyisilë Libuungu li Nzaambye? Kaambofo ke beeno tokë lyaawu litukile?

³⁷ Ningë wun'viipë wum'balë ti naandi m'bici, kaambofo wum'balë kubakë likabu li cimpeefë, naandi wufwenikini kuzaabë ti mu linë yalusonikinë lutumu lu Fumu.

³⁸ Kasi ningë naandi sye lizaabë ko, bëleembu kun'siilë cibiindë.

³⁹ Mu bwaawu, baanë bë nguli, toombaanu ntetë mu kuvaanë tubiku, kasi lufuunjyaanu ko banë bën'tubilë mu simbeembu.

⁴⁰ Bufwenikini makë mooso mën'vangënë mu n'sikë i mu bunketë.