1 Koleentë 13 - N’KANGULU WUMOONË

Luzolo

¹ Miinu bosuku yikutubili simbeembu si baatu i keti si siyaanzi. Ningë yikeeli ko yi luzolo, miinu yilë kwaandi butali bun'waasi ncyeembi, kaambofo mpyeempi yin'tendukë.

² Miinu kupodi kuzabikini maambu yin'tambulë ke Nzaambi, kuba yi luzaabu looso i kuwu mëviindë mooso, miinu podi kuba yi ciminu cin'senginyi myoongo, ningë yikeeli yi luzolo ko, miinu muutu kwaandi vwiili.

³ Miinu kupodi kukabë byaami byooso ke bifwa-nzalë i keti yilë lakë nyitwaami ku mbaasu, ningë yikeeli ko yi luzolo, lyalyooli lisë n'ciinzë ko mu miinu.

⁴ Wunë wuke yi luzolo wuke yimpungë-moonyi i maambu mëboti, naandi wukeeli yi n'soci ko, wusë yileesi ko i wukeeli ko yi lunaangu.

⁵ Wunë wuke yi luzolo wusë n'vaangë cin'velë ci sonyi ko, wusë mwiimi ko, wusë yi mëdasu ko i wusë yi mwaangu ko.

⁶ Wunë n'zolaangë wusë n'kwangëlëlaangë ko mu libi, naandi wun'kwangëlëlaangë mu bucyelikë.

⁷ Wunë wuke yi luzolo wun'vitikaangë makë mooso i wun'luundaangë ciminu mu lyosuku lyaambu, civuufu i mpungë-moonyi.

⁸ Luzolo lun'ziingë sakë yi sakë. Tubiku tun'siitë cilumbu, likabu likutubilë mu simbeembu sin'kaambu kuwukunu sin'siitë, luzaabu lun'zimbilë.

⁹ Licyelikë, luzaabu lwiitu lu cyo i lutendulu lwiitu lu tubiku lu cyo.

¹⁰ Kasi fanë fën'kwisilë manë mësulëmë, mëkaambu kusulëmë mën'zimbilë.

¹¹ Bunë yabë cimwamwanë, yilëtubaangë, yilëbalaangë i yilëbiilaangë bukë cimwamwanë. Kasi abu yeekë n'kuluutu, miinu yavubikë makë mooso më bubwabwanë.

¹² Fë bubwaafa, beeso tulë mu kumonë tokë buke ciduundu kwaandi, cifwanëkënë buke lumweeno lu n'tamë. Vandi kasi, beeso tum'monë mbuuzu yi mbuuzu. Fë bubwaafa, yizabisi fë cyo. Vandi kasi, yin'zaabë Nzaambi bunë bufwenikini bo naveekë be kun'zabili.

¹³ Buyifanwabu, bikumë bi tatu bin'kalilë: ciminu, civuufu i luzolo. Kasi mu bya bitatu, cinë civyokilili luzolo.