1 Koleentë 12 - N’KANGULU WUMOONË

Mëkabu më Ciluunzi ci Saantu

¹ Tutubilaanu buyifanwabu mu manë mën'talë mëkabu më Ciluunzi ci Saantu: Baanë bë nguli, yike yi tesu ti beeno luzaabë cyelikë mu mëkabu be moomo.

² Beeno luzabisi ti bunë lwabë lukaambu kuta maanë, beeno lwabë mu lukaciku lu kukuundë sinkosi sikaambu mbeembu.

³ Mati mu bwaawu yilusisimini: wun'viipë ve wun'natu ke Ciluunzi ci Nzaambi wum'podi kutubë : « Yeesu kwe sifu! » Muutu ve wum'podi kutendulë: « Yeesu wuli Fumu! » Ningë Ciluunzi ci Saantu cisye n'kotilë kuve.

⁴ Yike mpaapë mpilë mëkabu më cimpeefë, kasi mati Ciluunzi cimweekë ci mëvanaangë.

⁵ Yike mpaapë mpilë sinsalulu, kasi Fumu yo yimweekë tun'salilë.

⁶ Yike mpaapë mpilë sinsalulu, kasi yo Nzaambi yimweekë, na wun'vaangaangë byakë byooso mu bakë booso.

⁷ Mu kadë muutu Ciluunzi ci Saantu cim'monikinaangë mu likabu lin'vatulë mpaapë baatu.

⁸ Ciluunzi cin'vaanë ke awu libuungu li bungelë, ke wumesë libuungu li luzaabu.

⁹ Ciluunzi cyo cimweekë, wun'vaanë ke awu ciminu civyokilili i ke wumesë lutumu lu kubukilë bibeedo.

¹⁰ Ciluunzi wun'vaanë ke wumesë lutumu lu kuvaangë bimaaku ke wun'ka, likabu li kubikulë maambu mën'fuminë ke Nzaambi, ke wun'kooso likanë li kubakulë biluunzi bibi mu Ciluunzi ci cyelikë. Ke awu wun'vaanë likanë mu kutubilë simbeembu sikaambu kuwukunu, ke wun'ka likanë li kuzimuninë simbeembu be syoosi.

¹¹ Mati cyo Ciluunzi cimweekë wun'vaangë makë mooso omo. Naandi wun'vaanë ke wosuku likabu livyakënë, bo naandi kun'zolilë.

Nyitu mweekë yimunë mpaapë binamë

¹² Oboobo, Kliistu wuke dedë mweekë nyitu yikeeli yi mpaapë binamë. Binamë byooso bosuku bibeeli bimpaapë, bin'vaangë nyitu mweekë.

¹³ Beeso booso, Sizwiifë kaambofo bo bëkeeli ko Sizwiifë, bëndongo kaambofo baatu bësyalulu, beeso tutambulë lubatizyaalu mu kuba nyitu mweekë mu Ciluunzi ci Saantu cyo cimweekë i beeso booso tunwiinë mo mu Ciluunzi cyo cimweekë.

¹⁴ Nyitu yisye vangininë ko mu cinamë cimweekë, kasi mu mpaapë binamë.

¹⁵ Ningë kuulu kube tubë : « Miinu yikeeli ko likaandë li kooko, oboobo miinu yisyeeli ko cinamë ci nyitu », naandi wusë n'siitë ko kuba cinamë ci nyitu.

¹⁶ Ningë kutu kube tubë : « Miinu yikeeli ko lyeesu, oboobo miinu yisyeeli ko cinamë ci nyitu », naandi wusë n'siitë ko kuba cinamë ci nyitu.

¹⁷ Ningë nyitu yakë yooso yilë ba lyeesu, buni kulë kuwulwe? Ningë ti yilë ba kutu ku mweekë, buni kulë fiimbulilë minuukwe?

¹⁸ Licyelikë, Nzaambi wululikë kadë cinamë ci nyitu bunë naandi kuzolilë.

¹⁹ Fë fitë ba nyitu ko, ningë yabë cinamë cimweekë.

²⁰ Licyelikë, yike mpaapë binamë i nyitu mweekë.

²¹ Lyeesu kupodi ve kukaambë likaandë li kooko: « Miinu yikeeli n'ciinzë mu njeeyi ko! » N'tu kupodi ve kukaambë maalu « Miinu yikeeli n'ciinzë mu beeno ko! »

²² Kasi buboti beenë, binamë bi nyitu bim'monikë, bidekë bike n'ciinzë.

²³ Binamë bi nyitu binë beeso tum'monaangë ti bikeeli beenë n'ciinzë ko, tubikelaangë kuvyokilë bimesi. Binë bike sonyi mu kutubilë tubikelaangë yi luciinzu looso.

²⁴ Binamë bi nyitwiitu binë tum'podi kumonë bikeeli ko n'ciinzë mu kubikeelë. Nzaambi wuvaangë nyitu mu kuvaanë luciinzu ke binë bin'kaambu kucinzëmë beenë.

²⁵ Mu bwaawu, bukeeli butaandu ko mu nyitu, kasi binamë bivyakënë byakë byooso bike lusweenu mu bimesi yi mu bin'ka.

²⁶ Ningë cinamë cimweekë ci nyitu cim'beelë, byakë byooso bim'beelë yimunë cyaawu. Ningë cinamë cimweekë cibe cinzëmë, byakë byooso bin'sangilë yimunë cyaawu.

²⁷ Kosuku, beeno lukeeli nyitu Kliistu i wosuku mu beeno wuke cinamë ci nyitu be yooyo.

²⁸ Mati bwaawu ti, mu Cingangë, Nzaambi wutuulë ntetë kati ntetë, mimbunzi, limwaali mibici i lin'tatu misinyi, kulandëkënë ofo, bo bëvaangë bimaaku, yivaandi bo bëm'podi kubelusi bibeedo, banë bëke yi likabu li kuzudi kaambofo, li kusulikilë bëmesë, kaambofo yivaandi kutubë simbeembu sikaambu kuwukunu.

²⁹ Bakë booso bëkeeli ko mimbunzi, kaambofo mibici, misinyi. Bakë booso bëkeeli ko yi likabu li kuvangilë bimaaku,

³⁰ kaambofo kubelusi bibeedo, mu kutubilë mu simbeembu sin'kaambu kuwukunu, kaambofo mu kuzimunë simbeembu be syoosyo.

³¹ Bwaawu, toombaanu mëkabu mëke beenë n'ciinzë. Kasi yakululeesi buyifanwabu nzilë yivyokilili makë mooso.