1 Koleentë 11 - N’KANGULU WUMOONË

¹ Laandaanu cifwaani cyaami, dedë miinu yike cifwaani ci Kliistu.

N'cyeetu wufwenikini kufukë n'twaandi

² Miinu yilutoondë : mu kadë ntaangu, beeno lukun'tebukulaangë moonyi i lun'laandaangë mëkomini mo yilufilë.

³ Oboobo, miinu yin'zolë ti beeno luyuwaanu aliili : Kliistu na n'kuluutu wu lyosuku libakëlë, libakëlë na n'kuluutu n'kasyaandi i Nzaambi na n'kuluutu Kliistu.

⁴ Ningë ti, mu ntaangu lusambulu, libakëlë bëvwaatë m'pu kaambofo wulë mu kubikulë maambu më Nzaambi, naandi waleenji Kliistu.

⁵ Kasi ningë n'cyeetu wukeeli ko yi lileesu ku n'tu ntaangu kulë mu kusambilë kaambofo wulë mu kubikulë maambu më Nzaambi, naandi waleenji n'nunyaandi. Weekë buke n'cyeetu wacyelë mileenji.

⁶ Ningë ti n'cyeetu wusye vwaatë lileeso ko, wufwenikini yivaandi kucyelë mileenji! Kasi sonyi mu n'cyeetu mu kucyelë mileenji kaambofo kubotulë cikunguli! Naandi wufwenikini kuvwaatë lileesu.

⁷ Libakëlë wukeeli yi tesu ko mu kufukë n'tu, cibilë naandi cifwaani ci bumpumu bu Nzaambi. Kasi n'cyeetu wun'leesi bumpumu bu libakëlë.

⁸ Licyelikë, libakëlë wusye vangunu ko mu n'cyeetu, kasi n'cyeetu na wabë wuvangunu mu libakelë.

⁹ Libakëlë sye vangunu ko mu cibilë ci n'cyeetu, mati kasi n'cyeetu na wuvangunu mu cibilë ci libakëlë.

¹⁰ Mu bwaawu, mu cibilë ci siyaanzi, n'cyeetu wufwenikini kuvwaatë lileeso ciliimbu cin'leesi cinaangë cyaandi.

¹¹ Mu lyalyooli mu luziingu lwiitu yimunë Fumu, n'cyeetu wusye syalulu ko mu libakëlë i libakelë yivaandi wusye syalulu ko mu n'cyeetu.

¹² Kasi bo bumweekë n'cyeetu wuvangunu mu libakëlë, libakelë yivaandi wubutu mu n'cyeetu i makë mooso mëfuminë ke Nzaambi.

¹³ Bilaanu benuveekë: buni liboti mu n'cyeetu kuba n'tu mwaayi ntaangu lusaambwe?

¹⁴ Buloongo naveekë wusë lusinë ko ti libakëlë sye fwanëkënë ko mu kuba mileenji yikulë,

¹⁵ tiilyoko, luciinzu lunenë beenë ke n'cyeetu mu kuba yi mileenji yikulë. Oboobo, mileenji yikulë yiveewu ke n'cyeetu mu kuba buke lileeso.

¹⁶ Kasi ningë wun'viipë wun'toombooso kufindënë mpakë mu lyaambu be lyoolyo, kwe zaabi ali: keti bingaangë bi Nzaambi, keti besuveekë tukeeli yi bifu bin'ka ko mu lusambulu.

Ndiiwu yi Fumu

¹⁷ Mu manë yaluseembë, yisë m'podi kulutoondë ko, cibilë tuzutunu twiinu twiinji kuluvaangë simbi ke yi simboti.

¹⁸ Lin'tetë, bakum'kaambë ti bunë beeno luvaangaangë tuzutununu, mu katyaasi kwiinu mu ke butaandu i miinu yisë n'ta mpaapë lyaanë ko.

¹⁹ Bufwenikini kuba nkabusunu mu beeno bwiinji tuzaabë banë buke bësulëmë. –

²⁰ Bunë beeno lun'dukunaangë, yaaku ti mu kulya ndiiwu yi Fumu :

²¹ licyelikë, fo beeno lubeelë fë meesë, kadë muutu wulengë boongaangë ndiiwaandi, boobo bën'ka bëke yin'zalë, bëmesë bëlë mu kukolu mëlafu.

²² Beeno lukeeli yi sinzo kwe, mu kulya i kunwa? Kaambofo kusafulë Cingangë ci Nzaambi i kun'leenji banë bëkambusu ci kulya? Beeno mbici lun'viingaangë yilukaambë? Bufwenikini ti yilutoondë? Moniko, miinu cyelikë kupodi ve kulutoondë!

²³ Licyelikë, talaanu ndongulu yinë miinu yitambulë ke Fumu i yinë yiluzabikini : Fumu Yeesu, mu bwiilu bo kulëvakulu, naandi wuboongë limpa

²⁴ i kwamani kutoondë Nzaambi, naandi kulimukënë i kutubë : « Ayiiyi nyitwaami, yikeeli mu beeno. Vangilaanu boobo mu lutandukunu lwaami. »

²⁵ Mpilë mweekë, naandi kuboongë mbuungu fë mbusë ndiiwu i kutubë : « Mbuungu be yiiyi n'kangulu wumoonë wu Nzaambi, wuzitikulu mu meengë maami. Kadë vyaasi lun'nwa yaawu, vangilaanu lyaawu mu lutandukunu lwaami. »

²⁶ Licyelikë tee yi fanë Fumu kun'kwisilë, beeno lun'tendulë lufwa lwaandi mpaapë vyaasi, lun'lya limpa be liili i lun'nwa bike mu mbuungu be yiiyi.

²⁷ Mati bwaawu, wunë wun'lya limpa li Fumu kaambofo wun'nwa bike mu mbuungu be yiiyi mu nteku yikaambu kufwanëkënë, wun'citukë n'vikë lisumu mu nyitu i mu meengë më Fumu.

²⁸ Biikë ti kadë muutu we yibiili naveekë bosuku kun'lya limpa i kun'nwa bike mu mbuungu be yiiyi.

²⁹ Cibilë ningë wun'viipë wun'lya limpa i wun'nwa bike mu mbuungu kukaambu kuzaabë lyukunë yimunë nyitu Fumu, boobo naandi wun'tambulë lufundusu mu naveekë.

³⁰ Mati, mu cibilë be cyoocyo mpaapë mu beeno bëkeeli bibeedo i bëdekë i mpaapë bafwa.

³¹ Ningë tube yibiilë besuveekë, tun'kwakënë fë lufundusu lu Nzaambi.

³² Kasi beeso bëtufundisi i bëtukolikë ke Fumu bwiinji tuleembu kufundusu yimunë buloongo.

³³ Mu bwaawu, baanë bë nguli, bunë beeno lun'dukënë mu kulya ndiiwu yi Fumu, viingaanu bayiinu.

³⁴ Ningë wun'viipë ke nzalë, naandi kwe lya ku bwaalë bwaandi, bwiinji luleembu kutelë lufundusu lu Nzaambi mu beeno mu tuzutununu twiinu. Mu byuufu bin'ka, miinu yin'lulikë byaawu bunë yikutuuci ke beeno.