1 Koleentë 10 - N’KANGULU WUMOONË

Lubikunu mu kukuundë sinkosi

¹ A baanë bë nguli, yizolisi kulutebulë moonyi, mu linë liyisilë ke sinkaakë siinu mu ntaangu yi Moyiizë. Bakë booso babë mu lukelulu lu liduungë i baawu bësabukë m'bu-mbeenji.

² Mu liduungë i mu m'bu, baawu bëtambulë lubatizyaalu cintwaali yimunë Moyiizë.

³ Bakë booso bëlya ndiiwu mweekë cimpeefë

⁴ i bakë booso bën'wa mëlafu më mweekë më cimpeefë: cyelikë, baawu bëlënwangaangë fë limanyi li ngooto li cimpeefë lilë ke bëvekësyaangë i limanyi be lyoolyo lyabë Kliistu.

⁵ Mu kumonë mpaapë mu baawu bësye ba bëfwanëkënë ko fë nduunzi Nzaambi i mati bwaawu baawu bëfwiilë mu ntaandu ciyumi.

⁶ Maambu be moomo mëbeelë mu beeso bifwaani, bwiinji ti beeso tuleembu kuba yi binvweenvu bibi buke byo baawu bëbakë.

⁷ Nukuundyaanu ko sinkosi buke mwa mpooko bëmesë mu baawu bëlivaangë. Bwaawu bun'tubilë Libuungu: « Baatu bisë kalë mu kulya i kunwa, tee baawu bisë telëmë mu kusakënë. »

⁸ Twe leembwaanu kuyilekulë mu busafu, buke bën'ka mu baawu bëlivaangë i mëkumwaali më biveefi bi tatu bi baatu bëfwa mu cilumbu ci mweekë.

⁹ Tuseenjyaanu ko Kliistu buke bën'ka mu baawu bësiilë i bëfwiilë mu myangëlë sinyokë.

¹⁰ Oboobo, leembwaanu kwaambë, bo bëmesë mu baawu bësiilë i yaanzi lufwa wusë voondë bakë booso.

¹¹ Mënyoonyi be moomë misë bëyisilë mu kuba cifwaani mu bëmesë. Bësonikinë maawu mu kutubikini, cibilë beeso tulë mu kuzingilë mu sintaangu si siitu.

¹² Mu bwaawu, wunë wum'balë ti naandi wutelëmë, kwe keelë kulëbwa.

¹³ Tuseengu tunë beeno lwabakë tum'monikinaangë ke baatu. Nzaambi wusulëmë mu tukanyu twaandi i naandi wusë n'vangisi ko ti beeno luseengu, kusombukë mëngolu miinu. Kasi, mu ntaangu yin'kwisilë luseengu, naandi wuluvaanë mëngolo mu kuciindë i boobo, mëkanë më kuvukilë.

¹⁴ Mati mu bwaawu, a sindiku syaami, leembwaanu kukuundë sin'kosi.

¹⁵ Miinu yilë mu kulukaambë buke baatu bëkeeli yi bunketë. Lwe balyaanu benuveekë manë yilë mu kutubë.

¹⁶ Lwe balyaanu mbuungu yi lusakumunu yinë tun'vutulilaangë mëtoondo ke Nzaambi. Bunë beeso tuyinwangaangë, yaawu yisë tubuundaangë kwe yimunë meengë më Kliistu? Limpa linë tum'mukënaangë : bunë tulilyangaangë, lyaawu lisë tutulaangë cintwaali ko yimunë nyitu Kliistu?

¹⁷ Lyaawu like limpa limweekë, vandi, bosuku tubeeli mpaapë, beeso tuke nyitu mweekë, cibilë tuke yi cikuuku mo mu limpa limweekë.

¹⁸ Lwe monyaanu mboongu Islayeelë: bo bën'lyangaangë bibulu bëvakulë, bëke mu lubundunu yimunë Nzaambi civakululu bësakumunë.

¹⁹ Buni yim'podi kutubilë fa foofë? Nkosi kaambofo mbisi meengë yinë bëyindulilë fë civakululu bikeeli yi losuku luvunu kwe?

²⁰ Moniko, kasi miinu yin'sisimini ti linë banë bëkaambu kuta maanë bën'vakulaangë bin'veewaangë ke biluunzi bibi yaaku ti ke Nzaambi. Kosuku miinu yisë n'zolë ko beeno kubuundë n'kangulu yimunë biluunzi bibi.

²¹ Beeno kupodi ve kunwiinë mu mbuungu yi Fumu i mu mbuungu biluunzi bibi. Beeno kupodi ve kulilë fë meesë më Fumu i fë meesë më biluunzi bibi.

²² Kaambofo beeso tun'toombë likwaafi li Fumu? Beeno lum'balë ti beeso twiinji mëngolo i naandi?

Kusalilë makë mooso mu bumpumu bu Nzaambi

²³ « Makë mooso mëke yi n'swa », bo lun'tubilaangë. Cibeeni, vandi kasi yaaku makë mooso mëkeeli mëboti ko. « Makë mooso mëke yi n'swa », vandi kasi makë mooso mëkeeli n'ciinzë ko mu libuundu.

²⁴ Muutu ve wun'toombë n'ciinzë wo waandi naveekë, kasi wo wu bayaandi.

²⁵ Beeno lusyalulu mu kulya cyosuku cin'sumbusu ku zaandu, mbisi meengë i cyosuku cyuufu kufulë ve mu kumaangë mbalulu yimbi.

²⁶ Cibilë, bo bësonikinë, « mati Fumu wubakisi n'toto yimunë byakë byooso binë bike mwaawu ».

²⁷ Ningë muutu wukaambu kuta maanë, bëluvekilë mu kulya i beeno lube vitikë mu kweendë, lyaanu byakë byooso bëluvaanë i byuufu kufulë ve mu kumaangë mbalulu yimbi.

²⁸ Kasi ningë wun'viipë bëlukaambë : « Mbisi meengë be yiiyi yifuminë mu civakuli ciyindulë ke sinkosi », oboobo, leembwaanu kulya mu cibilë ci nawoowo waluzabikini mu kumaangë kuba mbalulu yimbi.

²⁹ – Miinu yin'tubilë afa yaaku mu mbalulwiinu, kasi mu yi wumesë. « Kasi cibilë-mbici bën'loombilë lusyalulu lwaami, lwaawu lun'sikiminë mu mbalulu yi muutu wun'ka?

³⁰ Ningë yilë mu kutoondë Nzaambi mu cinë yilë mu kulya, cibilë-mbici lukun'sungilë mu bilya byo yavutulilë mëtoondo? »

³¹ Bwaawu, keti lulë lya, lulë nwa, keti lulëvaangë lyosuku, vangaanu makë mooso mu bumpumu bu Nzaambi.

³² Zingilaanu mu kuleembu kuvukumunë Sizwiifë, keti bo bëkaambu Sizwiifë, keti Cingangë ci Nzaambi.

³³ Zingilaanu bo buke miinu : yilë mu kuvaangë buumë mu kutoonzi bakë booso mu makë mooso. Miinu yisë n'toombë ko liboti lyaami miveekë, kasi lililaangu li baatu, bwiinji bëvuukë.