1 Koleentë 1 - N’KANGULU WUMOONË

Sibweekë

¹ Poolë, wutelu mu n'vwiilu Nzaambi, mu kuba m'bunzi wu Kliistu Yeesu i Sosteenë mwaanë nguli.

² Ku Cingangë ci Nzaambi cike ku Koleentë, ke banë bëke kuunë, bëtelu mu kuzingilë mu Nzaambi i mu kuba sisaantu, yimunë bakë booso, fosuku faamë, bën'sambililë Fumwiitu Yeesu Kliistu, Fumwaawu i yiitu beeso:

³ Biikë Tatiitu i Fumwiitu Yeesu Kliistu bëluvaanë muulë i n'sikë.

Mëboti bëtambulë mu Kliistu

⁴ Kadë vyaasi yin'toondë Nzaambi mu cibilë ciinu, mu muulë kuluvaanë mu Kliistu Yeesu.

⁵ Licyelikë, mu lubundunu yimunë Kliistu, beeno lwawaalë businë bu mpaapë mëkabu, kulu-kulu yiveko më libuungu i më luzaabu.

⁶ Cimbaanji bëteelë mu Kliistu cyakangëmë mu beeno,

⁷ lukaambwaanu ko lyosuku likabu li Nzaambi, mu beeno lulë mu kuciingë ntaangu yo Fumwiitu Yeesu Kliistu kun'kwisilë.

⁸ Mati naandi wuluciinzi tee yi kunë siitu, bwiinji bëleembu kulufundisi mu lyosuku lidiifë mu cilumbu ci lwisulu lwaandi.

⁹ Nzaambi naveekë wulutelë mu kuzingilë mu lubundunu yimunë mwanaandi Yeesu Kliistu Fumwiitu : naandi wusulëmë mu tukanyu twaandi.

Butaandu mu Cingangë

¹⁰ Baanë bë nguli, beeno yin'loombë mu lizinë li Fumwiitu Yeesu Kliistu : yuwusënaanu, nubaanu ko yi butaandu mu benuveekë. Lwe baanu muutu wumweekë, mbalulu mweekë, ciminu cimweekë.

¹¹ Licyelikë, baanë baami bë nguli, basë cifuumbë ci Kolowe bakun'zabikini ti twambulu tweekë mu beeno.

¹² Yuwaano mo yakulukaambë : mu beeno, kadë muutu wulë mu kutubë : « Miinu, waami Poolë ». Wun'ka: « Waami Apoloosë ». Wun'kooso « Waami Pyeelë ». Wun'ka « Waami Kliistu. »

¹³ A buni! Kliistu wukabuke? A buni! Poolë na bëkomë fë kuluusu mu cibilë ciinwe? Vo! Mu lizinë li Poolë mwa lubatizyaalu?

¹⁴ Mëtoondo ke Nzaambi, miinu yisye batizyaalë wun'viipë ko mu beeno, kanuku Kilispiisë i Ngayuusë.

¹⁵ Mu bwaawu, bisë m'podi ko kutubë ti, beeno lubatizyaalu mu lizinë lyaami.

¹⁶ Aa! Mati licyelikë, miinu yivaandi yibatizyaalë cifuumbë ci Stefanaasë, kasi yisë m'balë ko ti yibatizyaalë wosuku wun'ka.

¹⁷ Kliistu wusye kun'filë ko mu kubatizyaalë, kasi wukun'filë mu kutendulë Mpolu Mboti i yaaku ti mu kusalilë mu bungelë bu cimuutu, bwiinji ti lufwa lu Kliistu fë yilu kuluusu luleembu kubotulë lutumu lwaandi.

Yeesu Kliistu, luleendo i bungelë bu Nzaambi

¹⁸ Licyelikë, kutendulë lufwa lu Kliistu fë kuluusu bulawu mu banë bëke mu kunyambëkënë, kasi mu beeso tukeeli mu nzilë luvukulu, lwaawu luleendo lu Nzaambi.

¹⁹ Licyelikë, mësonëmë : « Yin'tyamunë bungelë bu bangë bungelë, i yivaafë mëlyeelë më bangë mëlyeelë. »

²⁰ Mu bwaawu, buni bufwenikinyooso kutubë bangë bungelë? Kaambofo baatu bëlubukë? Kaambofo sinzoonzi sintaangu be yiiyi? Nzaambi waleesi ti bungelë bu buloongo be buubu bulawu!

²¹ Licyelikë, baatu mu bungelë bwaawu booso bësye zaabë Nzaambi ko mu bungelë bwaandi, mati mu bulawu bu lutendulu lutoonzi Nzaambi mu kuvuuci bo bata maanë.

²² Sizwiifë bën'loombë biliimbu i singeleekë bën'toombë bungelë.

²³ Bunë beeso tun'tendulaangë Kliistu wo bëkomë: mati saangu luvukumuku mu Sizwiifë i bulawu mu bo bëkeeli ko Sizwiifë.

²⁴ Kasi mu banë Nzaambi kutelë yivaandi Sizwiifë i bo bëkeeli ko Sizwiifë, Kliistu na luleendo i bungelë bu Nzaambi.

²⁵ Cibilë bulawu bu Nzaambi buvyokilili bungelë bu baatu i budeci bu Nzaambi buvyokilili n'viingu i mëngolo më baatu.

²⁶ Monaanu, baanë bë nguli, nani lukeeli, beeno banë Nzaambi kutelë: mu beeno, mu mweeno baatu, bëcyo bangë bungelë, bëcyo bangë luleendo, bëcyo baatu bëcinzëmë.

²⁷ Tiilyoko, Nzaambi wusoolë cyo cike bulawu fë meeso më buloongo mu kufwiisi sonyi bangë bungelë. Naandi wasoolë cyo cike budeci mu kufwiisi sonyi bangë mëngolo.

²⁸ Naandi wasoolë cinë cikaambu n'ciinzë, ciyengulu kaambofo cikaambu nteendu fë meeso më buloongo, mu kutyamunë cinë cim'monikë n'ciinzë.

²⁹ Bwaawu, muutu lu moonyi ve wuyituunvi fë nduunzi Nzaambi.

³⁰ Kasi Nzaambi wulubuundë yi Kliistu Yeesu i naandi wavaangë mu Kliistu bungelë bwiitu: mati Kliistu watuvangisi kusulëmë fë nduunzi Nzaambi, wutuvangisi beeso kuzingilë mu Nzaambi i mu kutukobulë mu lisumu.

³¹ Mu bwaawu bunë busonëminë: « Ningë wun'viipë wun'zolë kuyizanjikë, kwe vangilë lwaawu mu linë Fumu kwavaangë. »