Taetus 1 - Natqgu

¹ Nim la Taetus. Ninge Pol. Wztrpo mz Gct x ninge aposol ne Jiszs Kxnzmcpx, murde nzwz-krnge na-aetunepxle nzrlxngitikr leplz ne Gct kcng tqmcpxleng. X nayokaetipxbo nzalvztrngr angidrng, mz nzokatr-krnge nidr mz nzvz-nqblq-krdr me pnz drtwr Gct.

² Leplz neng Gct na-abrtrpzlr drtwrdr bade mz nzrka-krbzle nzlungr kxboi. Murde pipx pnz Gct mzli kc bqnc, x trpokiatx-pnzu.

³ Zbz kx krlzbzle kc mzli kc tqyrlqle, sc tqaelwapx-ngrde nzlungr lc tqboi mz Nrpa ngr Kxnzmcpx. Delc, Gct rgu tqmcpx-ngrde ninge mz nzyapwxti-krbo Nrpakxmrlz lc.

⁴ Taetus, apubo bam Trtem angidr mz nzrlxngiti-krgi. X krka'-ngrne kx Gct Trtegu x Mevalu rgu Jiszs Kxnzmcpx, naokatrlr nim mz zmrlz ngrdr kxmyalz x namnc-zpwxq.

Ncblo Kx Takitrde Nzwzngr Mz Nzaclve-krde Dzbe Lrmakxtr

⁵ Taetus, amnctx-ngrne nim mrla mz Trmctu Krit, murde na-atubqtiq da kcng tqyctxtrbe. Kx ayrnrngr, narmcpxq kxnzaclveng mz mztea amrlx kx nanginidr nar dzbe lrmakxtr.

⁶ Kxaclve nangi ncblo kxtubq kx trnzpibqtiu leplz. Nayrlzti-txpwzle olvz naesz', mz mzli kxesz', x bzkq aoti drtwrde nzvz-krbzle mz olvz kzbleng. X doa nedeng nalxngiti-kzlr Jiszs, x bzkq nzxpqbrlr-ngrdr nide mz lxedr.

⁷ Ncblo kx na-aclvele dzbe lrmakxtr nangi ncblo kxtubq mz nzobqkr leplz. X bzkq kx mz drtwrde natqde nangidati zvz, trlalztqpwzu mz kztedeng, drtwrde trka ani, rmnq zlwz, ota zvz, x prlvz mzte trau.

⁸ A' naokatrle lr narnrlc mz nzadwatr-krde nidr mz ma nyzde x mrlzbz bade da kxmrlz. X nanginide ncblo kxyrplapx, x tubq x tr, kx aclve-lzbq.

⁹ X natu-amqngi mz nzlxngiti-krde nzalvztrngr angidrng, murde na-alvztr-ngrde da angidr x na-atubqtile nzrkrlzkr leplz kcng nardr tryatrkapz mz da angidr.

¹⁰ Taetus, ncblo lcng na-aclveng nakrlz-zpwxlr nzalvztrngr angidrng, murde leplz nzkqlu kx nznginipedr enqmi r Nrpakxmrlz, kxmule-esz' nzrpilr kx nzlxngitilr Jiszs. Mrlx lcng nzxpqbrlr-ngrdr kxnzrmailzng, x nzycmne-lukurnr-ngrng, x nzesabrting leplz, myapxbz lr Jiu kcng tzalvztr-ngrdr kx, “Ncblo napakrng amrlx mz nzaxvctr-krbzlr mz lrmakxtr.”

¹¹ Bzkq rlr-ngrbzme mz leplz kxnzmulr lcng nzalvztr-krdr mz makxtr. Murde nzapqtrpzlr drtwr leplz kxkqlu mz nzvz-nqblq-krdr nzpokiangr lc. X nzalvztr-krdr lc trngiu dalr nzokatr-krdr leplz, a' ngi dalr nzmabz-krdr trau.

¹² X kzdq lr Krit kx ngi profet, pi-zpwxle mz nzrpi-krde kx, “Lr Krit nzpokia-katong. Nzapulr poi kx mu ncblo. Namu-txpwzng, a' drtqdr sa zlwz.”

¹³ X natq profet lc ngi da zpwx. Delc, naxplrmibz natqm badr, kx nzalvztr-krdr lcng naesakitxpeng, murde natu-amqnging mz nzrlxngiti-krdr Nrpakxmrlz.

¹⁴ X mou, kxnzaclvelr dzbe lrmakxtr lcng bzkq nzlxngiti-zvzlr be ngr nqmq kr lr Jiu kcng trngiu da angidr. X bzkq nzvz-nqblqlr natq kcng tzkapx leplz kcng tzpxtxpx-ngrdr da angidr.

¹⁵ Ncblo lcng tzalvztr-rbrng nzaoti txpwz drtwrdr nztubqngr kx vzpxm mz nzvz-nqblq-krdr Loukxtr. A' doa kxnzrlxngiting nztubqpebzng mz nzobqkr Gct, x trpengr da kx batrpzle badr trnztakitr-krdru Loukxtr. A' mz drtwr kxtrnzrlxngitiung kcng tzpxtxpx-ngrdr Nrpakxmrlz, trpnzngr da kxtubq. X nqmq nr nabzdr x nzao-krdr drtwrdr nztrkapeng rlilrdr.

¹⁶ Ncblo kxnzmulr lcng, mz drtwrdr nzrpilr kx nzkrlzlr Gct. A' trmckuu mz nzmnc-krdr. Murde nzalelr da kx myangr drtq x nzxpqblrlr-zvz-ngrdr Gct. X rblxbz badr nzalengr da kxmrlz.