Sam 98 - Natqgu

Sam Kranzpnu-rpwxmz-nrade-rtqmz (98) Na-angrlvzku Yawe, King Kc Tqmatq-esz'ngr Na-angrlvzku Yawe

¹ Nangr-ngrbzku mz Yawe nabz kxmrna mz nzale-krde da kcng tqmyapxbzng. Murde aovxiole enqmi rdeng mz nzetukr zmatq ngrde.

² X sc tqaelwapxpe-ngrbzle nztubq-krde mz lr mrkzbleng amrlx, Mz nzarlapx-krbzle leplz nedeng mz mq enqmi rdrng.

³ X aodule nigu lr Israel mz nzatutr-zvz-krde natqde. Murde leplz mz nrlc tulvzo nakrlzlr kx arlapxle nigu.

Naglqpxku Nide

⁴ Nigu leplz amrlx mz nrlc na-angrlvzku Yawe Mz nabz kx yrlvi.

⁵ Naglqpxku nide Mz nzayrni-krbzku bade gita,

⁶ X mz nzvxu-krbzku trpu. Na-angrlvzku Yawe, kc tqngi King!

Nangrbzku Bade

⁷ Nimu prla x drtc' x dalrmung amrlx Drtwrmu naelalzm!

⁸ Nimu lue na-amqmq-lzbqamu mz nztalio-krmu mz nabzde. X nimu newz na-angrlvzamu Yawe!

⁹ Nigu amrlx nangrbzku bade. Murde sa tqvzm mz nzaclve-krde lr nrlc, X nzayzlu-krbzle da mz leplz sa natubq x narsakrlrngr.