Sam 97 - Natqgu

Sam Kranzpnu-rpwxmz-nrade-rlimz (97) Na-abrtzlvzku Yawe, King Kc Tqmyatxlz-esz'ngr Zmatq Ngrde

¹ Mrlz lr nrlc amrlx nzabrtz-krdr murde Yawe nide King kc tqmyatxlz-esz'ngr. X lr trmctu naelalz-ngrm drtwrdr kz nide.

² Zbo kxve x nzlo nzngrlelvzlr nide. X nzaclve-krde leplz mrlz x tubq.

³ Nyr rtwayznepx kai mz nzvz-krde, Nyr kx nangcngr enqmi kcng tztulvz-ngrdr nzti rde.

⁴ Bzlrpc ngrde kx pcpxle pnamilxtile nrlc, X drtc' ycngrlrlzm.

⁵ Yawe nide Kxetu r nrlc tulvzo. X mz nzmc-krdr nide newzng nzwxong nzapulr nzwxokr gq.

⁶ Lr Heven amrlx nzpipxlr nztubq-esz'ngr-krde, X lr nrlc amrlx nzmclr nzmyatxlz-zlwz-krde.

Myaszpxle Kxnzmncng Mzlilxlr

⁷ Krkcng amrlx tzangiolr kx trngiu Yawe Gct angidr, drtqdr la namya zlwz. X kxnzmncng mzlilxlr amrlx nzmu na-angiolr nide.

⁸ Yawe Gct rgr, nigr lr Jerusalem x lr mztea amrlx ngr nqvi lr Judz abrtz-zlwz-ngrgr nim Nzayrplapx-krm enqmi rgrng.

⁹ Murde lr nrlc amrlx nzmnclzbzng mz zmatq ngrm, X nzmyalz-zlwz-krm myaszpxle kxnzmncng mzlilxlr amrlx.

Namnclzbzku Bade

¹⁰ Nigu kcng tzmrlztilr Yawe napxtxpx-ngrgu da kxtrka. Murde tu-zvzbz mz nibr kxnztubqng mz nzarlapx-krbzle nidr mz mq kxdrka'-ngrng.

¹¹ Yawe amrlzle kxnztubqng, kx nabzdr lqngi. Murde na-abrtzlvzlr nzngini-krde Gct kxtr.

¹² Delc, nigu kcng tztubqng na-abrtzlvzku Yawe, Mz nzawi-krbzku bade.