Sam 95 - Natqgu

Sam Kranzpnu-rpwxmz-nrade-nzlvqn (95) Namnclzbzku Mz Yawe, King Kc Tqngi Kxrpalz Nangrbzku Mz Yawe

¹ Nangrbzku mz Yawe mz nzabrtzngr. Murde nide butqbr kc tqrlakitrku.

² Na-awibzku bade Mz nzngr-kato-krbzku bade mz nabz kxyrlvi!

³ Murde Yawe nide Gct kc tqmyalz-esz'ngr, X King kc tqmyaszlzle kxnzmncng mzlilxlr amrlx.

⁴ Me boongr yc mz mqde. X nyz-kzde newz kxmyalzng.

⁵ Prla x drtc' nyzdeng Murde wz-ngrde mz nzngini-krde Kxrpalz.

⁶ Na-angioku Yawe kc tqwz-ngrde nigu Mz nzyrngzlvzo-krgu nide.

⁷ Murde nide Gct rgu, x nigu leplz nedeng, Apuku sip kx aclveleng. X naxlramu natqde mzbq ka, Mz nzrpi-krbzle bamu kx,

Naxlrku Natqde

^8-9 “Bzkq nabzmu mqngipe, da kc tzwailr melrmqmung. Murde kxmule-esz' nzmc-zvzlr nzrkati-krbo da kxmrlzting badr, Mz nzmnc-krdr mrkc lzke, a' otablrkr badr mrkc Meriba, X nzatalzlr ninge mrkc Masa, mz nzxpqbrlr-krdr ninge.

¹⁰ Mz yiz lcng nzpnu-pwx ngyati zvz ngr drtwrnge nidr. Murde nidr leplz kx nzvz-rbrng mz nabzdr x trnzvz-nqblqlru nqmq krngeng.

¹¹ X mz nzangya-krmlr drtwrnge, sc tqesalzpex kx, Trtxpnzngr nzprtr-krdr mz nzmnc-zpwxngr kc nakabo badr.”