Sam 94 - Natqgu

Sam Kranzpnu-rpwxmz-nrade-pwx (94) Gct Sa Na-ayrplapxle Kxdrka'-ngrng Yawe, Ayrplapx Kxdrka'-ngrng!

¹ Yawe, nim Gct kc tqayzlubz mz leplz kxnzvz-rbrng da kxnzalelr. Aelwapxngr zmatq ngrm.

² Nim kx na-ayzlubz da mz lr nrlc. Ayrplapx kxnzglqlz-lzbqng navz-nqblqle nike nzalelrng.

³ Yawe, bzkq rlr-ngrbzme mz kxdrka'-ngrng Nzabrtz-krdr mz da kxtrka kcng tzalelr.

⁴ Nzpivxitilr da kxtubq, X nzbilvzlr nzale-krdr alwx.

⁵ Nzatrkatilr nigr, leplz nemqng, Mz nzaetqti-krbzlr drtqgr.

⁶ Kxnzetung nznibqtilr olvz kxnzabzong, x doa kxnzbzszng, X lr mrkzbleng kx mnckrng badr.

⁷ Nzrpilr kx, “Trtxpnzngr nzmckr Yawe nigu. X trycneu mz drtwr Gct rdr da lcng tqaletikung.”

Yawe Obqplxle Nzaokr Drtwr Leplz

⁸ A' nimu kx nardr mqngi, nalalztqmamu bange. ?Myx mzli kx nayrplapx-krlzu-rnamu?

⁹ ?Mz drtwrmu rpiamu kx Gct kc tqwz-ngrde nradrtqgu x mzku, Nradrtqde ngq x mzte mwi?

¹⁰ X sc tqayrplapxpele lr mrkzbleng. ?Myx kxmule, trtxpnzngr nzayrplapx-kz-krde nimu? X alvztrle leplz amrlx. ?Mz drtwrmu trpnzngr da kx krlzle?

¹¹ Yawe obqplxle nzaokr drtwr leplz, X krlzle kx drtwr kx nzyrlqlr mane.

Mrlz Nzpnanatikr Yawe Leplz Nedeng

¹² Yawe, namrlzbz mz krkcng tqpnanatiqng, Mz nzalvztr-krm nidr mz loukxtr scm.

¹³ X trnarlrpx-ngrnqu nzkxpu-krdr, a' amnc-zpwxq nidr, Vz vz mzli kx ayrkro-ngrn kxdrka'-ngrng mz gq.

¹⁴ Yawe, trpxtxpx-ngrnqu leplz nemqng, X tr-rlasz-ngrnqu nigr kcng tqmcpxq.

¹⁵ Mzli kc navzm, nzaclvekr kxnzrmailzng sa natubq, X krkcng nabzdr tqlqngi sc tzabrtz-ateng.

¹⁶ Yawe, nim txpwz kx tum mz nibrnge, X nim kztenge mz nzarlapx-krbzme ninge mz kxdrka'-ngrng.

Yawe Tu-zvzbzle Mz Nibr Kxnztubqng

¹⁷ Nzmu trnaokatrwq ninge, Mzli trnaboiu x ninge kc tqbzpex.

¹⁸ A' mzli kc tqkqle-ngrne nim mz nzkxpu-krnge, Lolvz-amqngiq ninge mz nivz lrm.

¹⁹ X mzli kc tqtalvzongr drtwrnge, Zvz amqtrpe' drtwrnge x abrtz-moux.

²⁰ Px-ngrn nzngi-te-krmu badr kxnzetung kxdrka'-ngrng Mz nzrnzlvzo-krdr loukxtr scm.

²¹ Murde nzyrlwrpx-lxblr-ngrdr mz nzrpwa'-krdr kxnztubqng, X nzaprc-krdr kxnzmrlzng mz nzrnibqngr.

²² A' Yawe, Gct rnge, nide lrpalvc nyznge, X butqbr kc tqrlakitrx.

²³ Yawe, Gct rgr, sa naodatile nidr mz nqmq krdr kc tqtrka, Mz nzrtxlvzlz-krdr alwx ngrdrng amrlx.