Sam 92 - Natqgu

Sam Kranzpnu-rpwxmz-nrade-li (92) Da Kx Mrlzvxitxm Bange Mrlzvxitxm Bange Nzangio-krnge Nim

Nabz ngr Sabat, zbqkxnzamati.

^1-3 Yawe myatxlz-esz'ngrn. X mrlzvxitxm bange nzawi-krbo bam X nzglqlz-krnge nim, Mz nzayrningr gita x ukzlele, Mzli kznike angrlvz-ngrne nivz lrm mz nourla, X nzyrlq-angidr-krm natqmqng mz milzpq.

⁴ Murde aelalz-ngrme drtwrnge da kxetuting kcng tqwz-ngrn. X nangrbo mz nzabrtzngr mz da lcng tqaleq.

Murde matq-esz'ngrn

⁵ Yawe, nzwz-krmqng matq-esz'ngr, X nqmq nr drtwrm vzo zlwz la.

⁶ Kxnzglqpx-lzbqng nzngqngung X nardr mqngi mz nztatrkr nzalvztr-krmqng mz nardr.

⁷ Leplz kxdrka'-ngrng nzetu-krdr Nzapulr nabztqkr betepu kc tqwou mzli kx mrbcnepwz. X da kxtrka kcng tzalelr nradr trnayc-zvzu, A' nzodati-krdr tqvzpe tqvzpe.

⁸ Krlc tqmu-ngrde lc, Murde nim kx rmyalz zvz.

⁹ Yawe, obq ena! Murde enqmi rmqng sa nabzng Mz nzaovxio-krm kxdrka'-ngrng amrlx.

Apux Nounc Kc Tqpa Zvz

¹⁰ A' ninge kx xplr zlwz, Mz nzrka-krme bange zmatq ngrm.

¹¹ Mcpex nzaovxio-krm kxnzmnc-kapqng mz nznibq-krdr ninge. X xlrpex nzyrnikr kxdrka'-ngrng lcng mz nzaetq-ngrbz drtqdr.

^12-13 Leplz kxnztubqng kcng tztung ma nyz Yawe, X nzyrlwr-lxblrng mz makoa nyzde nzapulr nounc kxetung. X nzmnc-zpwxng x nzxplrng Murde dzbrdr nzvzong mz drtc' kc tqngi natqde.

¹⁴ X kxmule-esz' nznginipedr lrtzlvz, A' sa navz zvz nzvz-nqblq-krdr me pnz drtwrde, X nradr nayc-zvzbz, Mz nzapu-krdr nounc kc tqpa zvz.

¹⁵ Krlc aelwapx-ngrde nzmrlzkr Yawe, X nztubq-krde mz nzngini-krde butqbr kc tqrlakitrx.