Sam 91 - Natqgu

Sam Kranzpnu-rpwxmz-nrade-esz' (91) Doa Kx Mnc-xglele Yawe Lrpalvc Kx Rlakitrq

¹ Mz nzmnc-xgle-krm Yawe kc tqmyalz-esz'ngr Sa natubz mz nibrm.

² X narpibzme mz Gct kc tqrninr kx, “Nim Gct rnge kc tqabrkitrx drtwrnge, Mz nzapu-krme bange lrpalvc kx rlakitrx.”

³ Murde sa na-arlapxle nim mz nzatrkangr kx yc kapq, X mz nzrpibqtingr.

⁴ Sa na-aclve-zpwxle nim, Na-apule kio kc tqwxbulvzole neideng. X sa na-angidatibzle natqdeng Mz nzapu-krbzle bam temz ngr lomrm kc tqyrputrngr nipna.

Bzkq Mwxlrq

^5-6 Bzkq mwxlrq mz nrlckxbq x nrlckxngrlx, Mz nzmwxlrti-krm drka', ncblo kxayo, x zyagox kxnabzngr.

^7-8 Murde kxmule-esz' siu ngr leplz nzbz-aepztrpzng bam, Mzli kc Gct na-ayrplapx-ngrde kxdrka'-ngrng, X mcq mz mzpq nzbz-krdr, A' trtxpnzngr nzatrkati-krdr nim.

⁹ Murde mz nzrpi-krbzme mz Yawe kx nide me rlakitrq, X mz nzmnc-xgle-krm nide kc tqmyalz,

¹⁰ Trpnzngr doa x da kx na-atrkale nim, X trpnzngr kz zyagox kx navztrpq ma nyzm.

Yawe Aclve-zpwxle Nim

¹¹ Murde pipebz Yawe mz enjrl nedeng nztu-krbzlr mz nibrm, X nzaclve-zpwx-krdr nim drlvekeng vzkiq.

¹² Naglqlr nim mz mqdr, Murde nanycm ma tqtcprtr mz rplz.

¹³ Mz nzrmcti-krm ningidoe kc bqnc, sa na-aovxioq nide. Kxmule-esz' nide drka' kxmatq, a' sa narnzlvzoq nide.

Yawe Ycmnebzle Bam

¹⁴ Murde Yawe Gct rpile kx, “Sa na-arlapxx doa kx mrlztile ninge, X sa na-aclvex nide mz nzmnc-xgle-krde ninge.

¹⁵ Mz nzkqle-krde ninge, sa na-ayzlubo natqde. Kxmule-esz' da kx prtz, a' sa namnc-aepztrpo bade, X sa nakatxpxx nide mz nzkxpu-krdeng, X sa na-armyalzx nide.

¹⁶ X doa lc sa namcle nzarlapx-krnge nide, X nakabo bade nzlungr kxboi kx na-abrtz-ngrde.”