Sam 90 - Natqgu

Sam Kranzpnu-rpwxmz (90) Nzmrbckr Nzlukr Leplz Kxrpalz Kc Tqmnc-alo

Nabz ne Mosis, ncblo ne Gct.

¹ Kxetu, yzutr pnz mzli kc, krlzmle mzbq ka Nzngini-krm me rlakitrkr.

² Mzli kc trwzka-ngrn nrlc x newz ngrdeng, mncpe-kaiq. Murde nim Gct, x nzmnc-krm la tqyc tqyc.

³ Rpime bagr kx, “Yzlu-mouamu,” X mz nzbz-krgr yzlu-moukr mz drtc' kc tqwz-ngrn nigr.

⁴ Mz drtwrgr, yiz kx siu mz nrlc ngi mzli kxboi, a' mz drtwrm mzli mrbcnepwz, Apunede zbq kx esz' kx yrkrpxpe.

^5-6 Mz nzmilxtxo-krm nigr rblx nzrlolvzngr, Apunede nzrmwiblengr kc tqmrbrtr ani mz drtwr. X nzmnc-krgr mrbcne apunekr nabr kx yru mz nourla x nrpqdr mztr luli. A' kx krlzbzle milzpq sc tzblopeng x tztatiopeng murde nzpqkr nzulr nepi.

Nzmrbcnekr Nzlungr Mz Nrlc Ka

⁷ Da kc tqwai nzodati-krm nigr Mz nzpqkr zngya ngr drtwrm.

⁸ Murde zyzlr ngrm pnamilxtile alwx rgrng Kcng tqyrlq-kapqkrng.

⁹ X zngya ngr drtwrm amrbctrple nzlu-krgr. X mz nzbz-ani-krgr apukr zycmini kx esz'.

¹⁰ Nzmnc-krgr krlz-txpwzle yiz kxnzpnu-rlimz (70), A' nzmu nrkrdrtqgr kx tqxplrle krlzbzkr yiz kxnzpnu-rtqmz (80). Yiz lcng tqyctrngr nzwz-katongr x nzetqkr drtq, Nzyrkrpx-aning x sc tqbzpekr.

¹¹ Nzmu namckr nzxplrkr nzngyatikr drtwrm alwx Nzamrlue-krgr nim naetunepx kz mz nabzgr.

¹² Okatrp nigr mz nzkrlz-krgr drtwr ngr nzmrbcnekr nzlu-krgr, Murde nzmnc-krgr mz nrlc navz-nqblqle nzyrplapx-krm.

Yawe, Aelwa-mou-ngrm Zmrlz Ngrm

¹³ Yawe, bzkq ngyati-alo drtwrm nigr, kxnzawz nemqng, A' tekqtr drtwrm x nayc mz drtwrm nigr.

¹⁴ Namc-zvzkr nzaodu-krm nigr mz nourla kang kqlu, Murde navz zvz nzangrlvz-krgr nim mz nzabrtzngr.

¹⁵ Kxmule-esz' yiz kqlu avz-ngrbzme drtwrgr mz nzkxpu-krgr mzli kc, A' tekqtrpz yiz lcng mz nzaelalz-krme drtwrgr mzli ka.

¹⁶ X aelwa-mou-ngrm bagr rkx kcng tzkctipxng mz zmatq ngrm, Murde doa negrng namc-kzlr nzmyalz-krm.

¹⁷ Gct, Kxetu rgr, okatrp nigr mz zmrlz ngrm. Murde nra nzwz-krgr nayc-zvzbz.