Sam 87 - Natqgu

Sam Kranzpnu-rtqmz-nrade-rlimz (87) Jerusalem Apule Lxe Neidu Amrlx

Nabz ne nqvi lr Kora.

¹ Yawe wz-ngrde mzteadau Jerusalem Mz newz kxtr nyzde.

² X mzteadau lc nzmrlzba-krdele Myaszpxle mztea kc-kzng ngr Israel.

³ Delc nimu lr mztea nyzde, Naxlr-ngrnamu natq kxmrlz kcng tzycmnetr-ngrdr Jerusalem.

⁴ Gct rpile kx, “Mzli kc na-aplxtipx-ngrbo leplz nengeng, lr mrkzble kcng tzmnc-ngalelr Israel sa naprtr-kzng mz dzbede nenge, Krlcng Ijipt, Bxbilon, Filistia, Taea, x Itiopia.

⁵ X sa narpibzlr kx Jerusalem lxe neidu amrlx murde nzrmctitrpzlr nzlungr bade. X ninge, Yawe kc tqmyatxlz-esz'ngr, sa na-atu-amqngix nide.

⁶ X sa nayrox drtq leplz amrlx kcng tzbrti drtwrdr ninge, Mz nzprtr-krdr mz neidu lr Israel.

⁷ X mzli lcde, leplz nengeng lcng amrlx sa naelang x narpilr mz nzngr-krdr kx, ‘Mztea nyzgu, Jerusalem, ngi narlue ngr me vzkipxm da kxmrlzting amrlx.’”